Սերժ Սարգսյանի հայտարարությունը`սառը ցնցուղ

«Ապրիլյան դեպքերից հետո Արցախի Հանրապետություն ՀՀ նախագահի այցից և նրա ելույթից հետո շատ դրական մոտեցում, տրամադրություն առաջացավ հասարակության մեջ, որն էլ  շատ կարևոր է Արցախի ազգաբնակչության համար։ Տարբեր կարգի մարդիկ խոսում են հողերը հանձնելու, միակողմանի զիջումների գնալու մասին, բայց այդ ելույթից հետո բավականին լուրջ աշխատանքներ են առաջնագծում տարվում. ընդ որում՝ տնտեսական նշանակություն ունեցող։ Այսօր մոտ 3 տասնյակից ավելի աշխատող հէկ-եր կան, դրանց քանակը գնալով շատանում է։ Արցախն էներգիա ներկրող երկրից դարձել է էներգիա արտահանող երկիր։ Հատկապես հացահատիկի տեսակների առումով էլ Արցախի Հանրապետությունը ոչ միայն ինքնաբավ է, այլ նաև կարողանում  է օգնել Հայաստանին այդ առումով»,- լրագրողներին ասաց  ԼՂՀ մշտական ներկայացուցչության խորհրդական, խորհրդատու Գառնիկ Իսագուլյանը:   «Բավականին լուրջ առաջընթաց կա նաև տնտեսական ոլորտում, և վերջին 10 տարիների ընթացքում Արցախի Հանրապետությունը միջին հաշվով կարողանում է երկնիշ տնտեսական աճ ապահովել։Հավատացե՛ք, թե՛ ՀՀ նախագահի ելույթը, թե՛ դրանից հետո Բակո Սահակյանի ելույթը, թե՛ ուժային կառույցների ղեկավարների ելույթները պետք է շատ ուշադիր կարդալ և հասկանալ այն խորքը, որ կա։ Դե ֆակտո գոյություն ունեցող պետությունը շուտով, հավատացե՛ք, որ դե յուրե կկոչվի»,- նկատեց բանախոսը։ Խոսելով Արցախում սպասվող հնարավոր զարգացումներից՝ Գառնիկ Իսագուլյանը նշեց, որ իր կարծիքով՝ այն տրամադրությունները, թե շատ շուտով հնարավոր է՝ պատերազմ  վերսկսվի, իրականությանը չեն համապատասխանում.« Սերժ Սարգսյանի այն հայտարարությունը, թե ինքը նույնիսկ աչք չի թարթի անհրաժեշտության դեպքում «Իսկանդերը» գործի դնելու համար՝ սառը ցնցուղ էր որոշ տաք գլուխների վրա։ Կարծում եմ՝ շատերը հասկացան, որ դրանք ոչ միայն խոսքեր են, այլև դա բավականին լուրջ է, և հետո էլ այն լուրջ քննարկման նյութ դարձավ Ադրբեջանում»: