«Դրական ազդակներ» Էրդողանից՝ զորավարժություններ Լաչինում

«Հայկական կողմը Թուրքիայի նախագահի հայտարարություններում տեսնում է Հայաստան - Թուրքիա հարաբերությունները կարգավորելու, հայ-թուրքական երկաթուղին ու ճանապարհները վերագործարկելու մասին խոսելու հնարավորություն», - այսօր կառավարության նիստում հայտարարել է Նիկոլ Փաշինյանը՝ հավելելով, որ պաշտոնական Երևանը պատրաստ է նման խոսակցության. - «Մենք պատրաստ ենք նման խոսակցության, որը վերը նկարագրված ֆոնին կարող է ավելի լայն համատեքստ ստանալ։ Մեծ հաշվով խոսքը մեր տարածաշրջանն արևելքն արևմուտքին, հյուսիսը հարավին կապող խաչմերուկ դարձնելու մասին է։ Ուրախությամբ պետք է արձանագրեմ, որ այս գործընթացին ակտիվորեն աջակցելու հրապարակային պատրաստակամություն է ցուցաբերել Ռուսաստանի Դաշնությունը։ Եվրամիությունը, Ֆրանսիան և Միացյալ Նահանգները նույնպես հետաքրքրված են այս գործընթացով»։

Փաշինյանը վերջին շրջանում կառավարության արդեն երկրորդ նիստին է արձագանքում Թուրքիայի նախագահ Ռեջեփ Էրդողանի հայտարարությանը։ Այսօր, ըստ էության, նա արձագանքեց վերջերս Էրդողանի արած այն հայտարարությանը, թե Անկարան պատրաստ է կարգավորել հարաբերությունները Երևանի հետ։ Մինչ այս էլ Փաշինյանը Էրդողանի՝ Հայաստան - Թուրքիա հարաբերություններին առնչվող ավելի վաղ արած հայտարարությունը դրական ազդակ էր համարել. - «Կրկին հարկ եմ համարում ընդգծել, որ տարածաշրջանի խաղաղությունը և կայունությունը մեր երկարատև ռազմավարությունն է, և մենք մեզ պատասխանատու ենք համարում այդ խնդրի լուծման համար։ Խաղաղությունը, կայունությունը, համագործակցությունը հեշտ հայտարարելի և ցանկալի նպատակներ են, բայց դրանց իրագործման համար խելամիտ, մտածված, պրագմատիկ ջանքեր են պահանջվում և Հայաստանի Հանրապետությունը պատրաստ է նման ջանքեր գործադրել»։

Փաշինյանը չգիտի՞, թե հայ-թուրքական հարաբերությունների վրա որքան մեծ է Ադրբեջանի ազդեցությունը, ու որ շատ բան նաև Բաքվի դիրքորոշումից է կախված:

Փաշինյանն ունի՞ երաշխիք, որ Ադրբեջանը կողմ է արտահայտվելու հայ-թուրքական սահմանի բացմանը, օրինակ՝ առանց Բաքվի ներկայացրած պահանջների կատարմանը, որոնք Ալիևը պարբերաբար ուղղում է Հայաստանին...

Եվ առհասարակ, որո՞նք են Փաշինյանի համար Թուրքիայից հնչող «դրական ազդակները»... Այն, որ արդեն Լաչինում՝ Հայաստանին կպած, թուրք-ադրբեջանական համատեղ զորավարժություննե՞րն են անցկացվում:

Առհասարակ, Էրդողանին հրապարակային ուղերձներ հղելուց բացի լավ կլիներ Փաշինյանը բաց ասեր, թե ինչ զիջումների դիմաց է Հայաստան-Թուրքիա սահմանը բացվելու, ինչին է ընդհանրապես ինքը պատրաստ:

Այլապես, մի օր կարող ենք արթնանալ, տեսնել հերթական փաստաթուղթն է ստորագրվել ու Հայաստանի առջև ինչ-ինչ պարտավորություններ են դրվել:

Մետաքսյա Շալունց