Նիկոլ Փաշինյանին տված պողպատե մանդատի ուժով՝ դրական մեսիջներ Ալիևին

ՀՀ ԱԳ մամուլի քարտուղար Վահան Հունանյանի պատասխանը «Sputnik Արմենիա» լրատվական գործակալության հարցին Նիկոլ Փաշինյանի վարած արտաքին քաղաքականության կոնկրետ դրսևորումն է։

<< Ադրբեջանի ՊՆ տեղեկատվություն էր տարածել, համաձայն որի՝ «Լաչինի շրջանում Ադրբեջանի ու Թուրքիայի համատեղ զորավարժություններ են մեկնարկել»: Խնդրում ենք Ձեր մեկնաբանությունն այս առնչությամբ>> հարցին խոսնակը տվել է հետևյալ պատասխանը:

<< Թուրք-ադրբեջանական զորավարժությունների անցկացումը Հայաստանի ու Արցախի սահմանների և Լաչինի միջանցքի մերձակայքում գնահատում ենք որպես դեէսկալացիային միտված քայլերին վնասող գործողություն, որը չի համապատասխանում 2020թ․ նոյեմբերի 9-ի եռակողմ հայտարարության ոգուն և խաթարում է տարածաշրջանում տևական խաղաղություն, անվտանգություն և կայունություն հաստատելու ջանքերը>>։

Փաստորեն, ՀՀ ԱԳՆ մամուլի խոսնակը ընդունում է Լաչինը որպես Ադրբեջանի տարածք, այլ կերպ որո՞նք են այն սահմանները, որոնց մերձակայքում ընթացող գործողությունների մասին գնահատական է տալիս Արարարատ Միրզոյանի խոսնակը։

Փաստն այն է, որ խնդրո առարկա վարժանքները տեղի են ունենում Արցախի Հանրապետո ւթյան Բերձորի շրջանի տարածքում, որն այս պահին Ադրբեջանի կողմից օկուպացված է։ Բայց այդ տարածքը Արցախը Հայաստանին կապող միակ ցամաքային ճանապարհն է և այն ուղղակի չի կարող չլինել Արցախի տարածքից դուրս և կոչվել սոսկ Լաչինի միջանցք։  Համենայն դեպս հ այկական դիվանագիտության խնդիրն այն է, որ այդ տարածքը հռչակվի որպես Արցախի հատված, ինչպիսին եղել է պատմականորեն,   վերջին 30 տարում նաև որպես փաստացի իրողություն։ 
ՀՀ ԱԳ խոսնակն իր հայտարարության մեջ օգտագործում է այն տերմինաբանությունը, որը թելադրվում է Ադրբեջանի կողմից, այկ կերպ ասած Ադրբեջանին ուղարկում է դրական մեսիջներ՝ տարածքային ամբողջականության ճանաչման ադրբեջանական օրակարգին տալով համաձայնություն: Եվս մի քանի այսպիսի հայտարարություն և ադրբեջանական կողմը կհայտարարի, որ պաշտոնական Երևանն այլևս Արցախը ճանաչում է ադրբեջանական տարածք։

Տեղի ունեցածը այս իշխանությանը խիստ բնորոշ գործելաոճ է և սա պետական քաղաքականություն է, ոչ թե վրիպում։ Ճիշտ այնպես, ինչպես վրիպում չէր ՀՀ կառավարության նիստում Նիկոլ Փաշինյանի կողմից հայկական բնակավայրերը թուրքական անուններով կոչելը։ Նիկոլ Փաշինյանն առ այսօր անգամ չի էլ փորձել որևէ կերպ խմբագրել ու սրբագրել իր խայտառակ հայտարարությունը, հետևաբար նա շարունակում է մնալ այն համոզմանը, թե այդ բնակավայրերի անունները իրապես թուրքական են։ Ավելին՝ հայկական դիվանագիտությունն արդեն կարծես թե հաշտվել է կամ էլ օրինաչափ է դիտում ադրբեջանական զինուժի ներկայությունը Գեղարքունիքի և Սյունիքի հատվածներում։ Հակառակ պարագայում ԱԳ խոսնակը կարող էր առիթն օգտագործելով հիշատակել, որ Սոթքի և Սև լճի հատվածում  արդեն ավելի քան 5-6 ամիս շարունակվող ՀՀ սուվերեն տարածքի ոտնձգության մասին։ Սա այն է, ինչ մենք ունենք՝ շնորհիվ Փաշինյանին  տրված պողպատե մանդատի։

Հայկ Դավթյան