Ադրբեջանցի սեփականատերը հեգնում է հայաստանցի արտահանողներին.միայն մի դեպքում ծիրանը կմտնի շուկա, եթե մակնշվի իբրև ադրբեջանական

Այս օրերին շարքային ստատուսագրերից մինչև ԱԺ պատգամավորներ սոցիալական ցանցերում փորձում են համոզել, որ «Սպայկա» ընկերությունը ոչ մի խոչընդոտ չի ստեղծում Ռուսաստանի Դաշնության Կրասնոդարի երկրամասում Հայաստանից ծիրան արտահանող անհատ ձեռներեցների համար, իրականությունը, սակայն այլ է: Արդեն օրեր շարունակ Կրասնոդարի մեծածախ շուկան փակ է մնում Հայաստանից ծիրան արտահանող անհատ ձեռներեցների համար: Շուկաներից մեկի ադրբեջանցի սեփականատերը Հայաստանից ծիրան արտահանողներին փոխանցել է, որ իրենց շուկայում ծիրան կարող է վաճառել միայն «Սպայկա» ընկերությունը: Նա նաև փոխանցել է, որ սահմանափակումները միայն ծիրանին են վերաբերվում, օրինակ, սմբուկի հարցում խնդիրներ չկան: Շուկայի ազերի սեփականատերը նաև հեգնում է հայաստանցի արտահանողներին, թե միայն մի դեպքում է պատրաստ թողնել, որ ծիրանը մտնի շուկա՝ այն պետք է մակնշվի իբրև ադրբեջանական: Սոցցանցերում «Սպայկայի» պաշտպանյալները վկայակոչում են ընկերության ղեկավարների հետ մասնավոր զրույցները, որտեղ վերջիններս հավաստիացնում են, որ իրենք կապ չունեն այդ ամենի հետ: Ավելին՝ պատրաստվում են պաշտպանել և օգտակար լինել փոքր արտահանողներին: NewsBook-ի հետ կապ հաստատած գործարարը տեղեկացրեց, որ ծիրանով բեռնված իր մեքենայով վաղը կլինի Կրասնոդարի շուկայում: Եթե, իսկապես «Սպայկայի» ղեկավարությունը պատրաստ է աջակցել շուկայի ղեկավարության հետ ընդհանուր հայտարարի գալու հարցում, ապա անհատ ձեռներեցը պատրաստ է ընդունել «Սպայկայի» մեծահոգությունը: Վերջին օրերին ծիրանի գների նվազեցման պատճառով գյուղացիները փողոց դուրս եկան և ցույց արեցին: Առաջացած աղմուկից «Սպայկան» այսօրվանից ծիրանի գինը բարձրացրել է: Գյուղացիների տեղեկացմամբ՝ այսօր «Սպայկան» ծիրանը գնել է 400 դրամով՝ մինչդեռ երեկ 350-ով էին վաճառել ընկերությանը: Ի դեպ, NewsBook-ի տեղեկություններով, ծիրանի գների կտրուկ նվազեցման համար  Արարատի մարզի Դվին գյուղի բնակիչները ընդդեմ «Սպայկայի» բողոքի ակցիայի են դուրս գալու: Նյութի աղբյուրը ` Newsbook.am