Ալիևի առաջին ռեակցիան՝ ԱԺ-ում «թավիշի» պոռոտախոսության մրցաշարին. Ադրբեջանը ՀՀ-ում միջպետական ճանապարհ փակեց

Մինչ Հայոց խորհրդարանում 2 օր իշխանական պատգամավորներն իրենց ղեկավարի աչքի առջև սադրանքներ են կազմակերպում, ուժի ցուցադրություն ապահովում, գիշերը, Հայաստանի Կապան-Գորիս միջպետական ճանապարհի մի հատվածում Ադրբեջանն էլ իր ուժը ցուցադրեց Նիկոլ Փաշինյանին:

Նախ՝ Նաիրա Զոհրաբյանը ֆեյսբուքում կեսգիշերն անց հայտնեց, որ 2 ժամից ավելի է՝ ադրբեջանցիները փակել են Կապան-Գորիս միջպետական ճանապարհի մի հատվածը՝ Կատարի-Կարմրաքար` 16-18 կմ հատվածը: «Այդ հատվածում են մնացել մոտ 40 մեքենաներ, որից 25-ը մարդատար, որոնցում կան երեխաներ», տեղեկացրեց ԱԺ նախկին պատգամավոր Նաիրա Զոհրաբյանը՝ հավելելով. «ՀՀ սահմանապահ զորքերը ռուս խաղաղապահների հետ տեղում են, սակայն, ինչպես ինձ փոխանցեցին, ադրբեջանցիները հրաժարվում են բացել ճանապարհը: Թե ի՞նչ է տեղի ունեցել՝ ինձ փոխանցված շրջանառվող վարկածները չեմ հրապարակում և սպասենք պաշտոնական պարզաբանումներին»։

Իսկ ԱԺ «Հայաստան» դաշինքի պատգամավոր, սյունեցի Աննա Գրիգորյանը իր ՖԲ էջում հիշեցրեց. «Գորիս-Դավիթ-Բեկ, Կապան-Ճակատեն ճանապարհները բոլորիս մեջքի ետևում, առանձին հուշագրով հանձնվել են ադրբեջանցիների վերահսկողությանը»:
Ապա` Նաիրա Զոհրաբյանը տեղեկացրեց, որ ռուս խաղաղապահները ՀՀ սահմանապահների հետ միասին շարասյունով հանել են շրջափակման մեջ հայտնված բոլոր մեքենաները:

ՀՀ ՄԻՊ Արման Թաթոյանն ևս անդրադարձել էր խնդրին. «Այս արարքները հանցավոր են, սահմանափակել են մարդկանց, ողջ քաղաքացիական բնակչության, այդ թվում՝ երեխաներ, կանայք, տարեցներ, ազատ տեղաշարժը: Այս ամենը հավաստող ահազանգեր ենք ստանում քաղաքացիական բնակիչներից, ստուգել ենք ամբողջը: Այդքան զգուշացնում եմ այս վտանգի մասին ու ասում եմ, թե պետությունը ինչ պետք է անի ու հրատապ անի. ադրբեջանական զինված ծառայողների ներկայությունը ՀՀ Սյունիքի համայնքների միջև ճանապարհներին հանցավոր է և վերջ: Դա ինքին խախտում է մարդկանց կյանքի, ազատ տեղաշարժման և միջազգայնորեն երաշխավորված այլ կենսական իրավունքներ»:

Այնուհետև ՀՀ ՄԻՊ-ը արձանագրեց. «Փաստերից ինձ համար ակնհայտ է, որ սա նախապես պլանավորված բացահայտ հանցագործություն է ՀՀ քաղաքացիական բնակչության դեմ: Տեղյակ եմ, որ ՌԴ սահմանապահ ծառայողները տեղում վարել են ճանապարհը բացելու բանակցություններ և նրանց ջանքերով քաղաքացիական մեքենաները դուրս են բերվել: Ըստ ստուգված տվյալների՝ բանակցությունները առավոտ են շարունակվելու. հրաժարվել են բացել: Վաղ առավոտյան այս միջադեպով հատուկ հաղորդումներ կուղարկվեն համապատասխան միջազգային մարմիններին»:

Առավոտյան արդեն ՀՀ ազգային անվտանգության ծառայությունը տեղեկացնում է, որ օգոստոսի 25-ին, ժամը 23:00-ի սահմաններում ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: «Նշված հատվածում գտնվող տրանսպորտային միջոցները տարհանվել են: Աշխատանքներ են իրականացվում ճանապարհը բացելու, մարդկանց և տրանսպորտային միջոցների տեղաշարժի բնականոն աշխատանքը վերականգնելու ուղղությամբ»:

Ի՞նչ է սա նշանակում, երբ երկրիդ ԱԱԾ-ն արձանագրում է, որ՝ «ադրբեջանական կողմը փակել է Կապան-Գորիս միջպետական ճանապարհ»: Մեր երկրի մեջ ադրբեջանական կողմը միջպետական ավտոճանապարհ է փակում ու դա արձանագրում է ԱԱԾ-ն, այն էլ 8-9 ժամ ուշացով, երբ այդ ճանապարհը ռուսների օգնությամբ ու միջամտությամբ արդեն իսկ բացվել է:

Ո՞ւր են ԱԺ-ում պոռոտախոսության մրցումների դուրս եկած «թավշյա» պատգամավորները: Սա է՞ «ապագա կա»-ն:
Իրականում, ԱԺ-ում 2 օրերին տեղի ունեցող գործընթացները կարող են կապ ունենալ

Հայաստանի ու Ադրբեջանի միջև նախապատրաստվող որևէ նոր փաստաթղթի ընդունման հետ: Մի կողմից հասարակությանը կարելի է զբաղեցնել ԱԺ-ի «խփոցիներով», մյուս կողմից՝ սուսիկ-փուսիկ Ալիևի հետ նոր փաստաթուղթ ստորագրել:

Կարող է նաև այլ տարբերակ լինել. Խորհրդարանում ընդդիմադիրների պահվածքը մատնանշելով փորձել հրաժարվել հերթական խայտառակ համաձայնության կատարումից, որի արդյունքում էլ Ալիևը պարզապես Փաշինյանին ասում է. «Խելքդ, գլուխդ հավաքիր, ԱԺ-ի բեմականացված տեսարաններդ էլ քեզ պահիր»:

Մետաքսյա Շալունց