Կանաչ լույս՝ Սյունիքը հանձնողների առջեւ

Առանձնապես խոշոր չափերով յուրացումներ կատարելու կասկածանքով երեկ ձերբակալվել են Գորիսի փոխքաղաքապետեր Իրինա Յոլյանը և Մենուա Հովսեփյանը։ Ընդ որում, Մենուա Հովսեփյանը կասկածվում է նաև ընտրական խախտումների մեջ:

Նրանցից բացի, ձերբակալվել են նաև Գորիսի համայնքապետարանի 2 աշխատակիցներ՝ Արմինե Չոփչյանը և Սուսաննա Սարգսյանը: Գորիսի քաղաքապետարանից առգրավվել են փաստաթղթեր, խուզարկություն է իրականացվել նաև ձերբակալվածների բնակարաններում։
Թե կոնկրետ ինչ յուրացումների մասին է խոսքը՝ իրավապահները դեռ չեն մանրամասնում։ Վստահաբար՝ առաջիկայում եւս չեն կարող հիմնավորել, քանզի ակնհայտ է, որ Սյունիքը գլխատելու երկրորդ արարն է սկսվել:
«Անհիմն է մեղադրանքը, այդտեղ մեղադրանք չկա, առաջադրված մեղադրանքներում մեղավոր չեն ճանաչում», - ասել է Մենուա Հովսեփյանի պաշպանը:
Հովսեփյանին մեղադրանքն առաջադրվել է պատերազմի օրերին ուղարկված օգնությունն աղքատության ոչ համապատասխան սանդղակ ունեցող ընտանիքներին բաժանելու համար, խոսքը 115 ընտանիքի մասին է, ինչը որակվել է որպես միջոցների վատնում՝ 3 միլիոն 530 հազար դրամի: Փոխքաղաքապետ Մենուա Հովսեփյանին նաև մեղադրանք է առաջադրվել ընտրական խախտումների համար, մասնավորապե, ընտրական հավաքի ժամանակ 80 անձ ապահովելու համար։ Այս մասով մեղադրանքը կառուցվել է` հիմնվելով ավելի վաղ Գորիսի քաղաքապետ Առուշ Առուշանյանի դեմ Քարահունջի վարչական ղեկավար Լուսինե Ավետյանի տված ցուցմունքի վրա: Հենց այստեղ էլ թաքնված է շան գլուխը, քանզի արդեն հայտնի է, թե ինչ հանգամանքներում են Ավետյանից ցուցմուք կորզել եւ ինչ գնով, դրանից հետո նրա փեսային պաշտոնի են նշանակել իրավապահ համակարգում:

Հիշեցնենք, որ ավելի վաղ կալանավորվել են Սյունիքի համայնքապետեր Մխիթար Զաքարյանը, Արթուր Սարգսյանը, Առուշ Առուշանյանը, Մանվել Փարամուզյանը: Պատահական չէ, որ համայնքային պաշտոնյաների երկրորդ էշելոնի ներկայացուցիչների նկատմամբ իրավական վակխանալիան կյանքի է կոչվում այս օրերին, երբ Հայաստանի սահմաններում կրկին սրվել է իրավիճակը: Գեղարուիքում եւ Սյունիքում թշնամին համառորեն առաջ է շարժվում՝ նպատակ ունենալով դիրքերն ամրապնդել: Կրկին զոհեր ունենք, չեն դադարում Ալիեւի հոխորտանքները՝ Զանգեզուրի նկատմամբ դրսեւորած նկրտումները: Իսկ զուգահեռ իրականությունում Հայաստանի իշխանությունը արդեն ընդդիմության հետ խորհրդարանում թիթեռ է նկարում: Արտահերթ նիստով քննարկման էր բերվել Սեւանից հերթական անգամ ջուր բաց թողնելու նախագիծը: Հայրենի ընդդիմադիրները իշխանության օրակարգը բոյկոտելու, սահմանային խնդիրներն առաջնային պլան բերելու փոխարեն մտել էր բովանդակային քննարկման մեջ եւ ըստ էության թելում էր իշխանության թելը: Անշուշտ, քննադատական ելույթներ էին ունենում, մի պահ անգամ իրավիճակը սրվեց եւ թեժ բանավեճ ծավալվեց ընդդիմության եւ Ջրային կոմիտեի ղեկավարի միջեւ, բայց սա երկրորդական, երրորդական խնդիր է:

Հայաստանի առջեւ այսօր ծառացած միակ մարտահրավերը սահմանն է՝ Սյունիքի, Գեղարքունիքի հարցը, որոնց նկատմամբ թշնամին անթաքույց նկրտումներ է դրսեւորում: Եթե ընդդիմությունը այս իրավիճաում իրեն կարող է նման շռայլություն թույլ տալ եւ այլ հարց քննարկել ազգակործանների հետ, նշանակում է համաձայնել, կամ կանաչ լույս վառել իշխանության առջեւ Սյունիքը Ալիեւին նվիրելու համար: Հակառակ պարագայում խորհրդարանը երեկ պետք է վերածվեր հանրահավաքային հրապարակ:

Անի Սահակյան