Երեք ամիս ՀՀ տարածքը՝ հարձակման տակ. Գնահատականը կա, հակաքայլը՝ չկա
Կարծում ենք, որ հայ-ադրբեջանական սահմանին տեղի ունեցող միջադեպերը սպառնալիք են ՀԱՊԿ անդամ Հայաստանի անվտանգությանը, սա ՀԱՊԿ գլխավոր քարտուղար Ստանիսլավ Զասի խոսքերն են, որը նա արտաբերել է այսօր Երևանում:
«Մենք կազմակերպված մշտադիտարկում ենք իրականացնում, այդ թվում՝ հայկական պետական կառույցների օգնությամբ: Իհարկե, մենք կարծում ենք, որ Հայաստանի և Ադրբեջանի սահմանին տեղի ունեցող այն միջադեպերը, որոնց մասին խոսում եք, սպառնալիք են ներկայացնում ՀԱՊԿ-ի պատասխանատվության Կովկասյան տարածաշրջանի և, իհարկե, նաև կազմակերպության անդամ Հայաստանի անվտանգության համար: Եթե խոսենք խնդրի լուծման ուղիների մասին, ապա մենք կարծում ենք, որ այս իրավիճակի քաղաքական կարգավորման հնարավորությունները սպառված չեն, և իրականում դա ամենալավ տարբերակը կլիներ բոլորի համար», - ասել է ՀԱՊԿ գլխավոր քարտուղարը։
Կարելի է ասել, որ երեք ամիս հետ այն բանից, երբ ադրբեջանական ստորաբաժանումները ներխուժել են Հայաստանի տարածք, ՀԱՊԿ-ն բառի ընտրության հարցում փոքր-ինչ ադեկվատ գնահատական է ընտրել՝ «սպառնալիք» որակելով ՀՀ-ի տարածքում տեղի ունեցողը:
Բայց ի՞նչ նկատի ունի Զասն, ասելով՝ «Հայաստանի և Ադրբեջանի սահմանին տեղի ունեցող միջադեպերը...»: Այսինքն՝ դա միջադե՞պ է, երբ 3 ամիս շարունակ ադրբեջանական զորքեր են ներխուժում օտար երկրի տարածք, թե՞ դա հարձակման, զավթման գործողություն է, որին պետք է համարժեք արձագանքել գոնե մեկ պարբերությամբ հայտարարության ընդունմամբ...
Երեկ՝ օգոստոսի 9-ին ՀՀ պաշտպանության նախարար Արշակ Կարապետյանն ընդունել էր Ստանիսլավ Զասին։ Ողջունելով հյուրին՝ պաշտպանության նախարարը, մասնավորապես, նշել է. «Մենք Ձեր այցին սպասում էինք դեռ մայիս ամսին: Հայաստանի համար այդ պահին բավական լարված ժամանակահատված էր, բայց, ցավոք սրտի, Ձեր այցը տեղի չունեցավ: Այսօր մեր սահմաններին ձևավորվել է կայուն ծանր իրավիճակ: Մայիս ամսին ադրբեջանական զինված ուժերը, երկու ուղղությամբ, ներխուժեցին հայկական տարածք: Դա մեզ անչափ անհանգստացնում է: Մենք խաղաղության կողմնակից ենք: Մենք, որևէ պարագայում, չենք ուզում իրադրության լարում մեր սահմաններին: Միևնույն ժամանակ, մենք պատրաստ չենք համակերպվել գործողությունների հետ, որոնք կարող են հանգեցնել Հայաստանի պետական սահմանի խախտմանը: Մենք վճռականորեն պաշտպանելու ենք մեր տարածքները: Մենք, իհարկե, ձգտում ենք խաղաղ ճանապարհով լուծել այս խնդիրը՝ ի ցույց դնելով մեր խաղաղասիրությունը: Միևնույն ժամանակ, մեր համբերությունը նույնպես անսպառ չէ, և մեր սահմաններին ստեղծված իրադրության խաղաղ հանգուցալուծման բացակայության պարագայում մենք իրավունք ենք վերապահում խնդիրը լուծել ուժի կիրառմամբ»:
ՀՀ պաշտպանության նախարար Արշակ Կարապետյանն ափսոսանք է հայտնել, որ ՀԱՊԿ-ում առկա որոշումների կայացման և ճգնաժամային իրավիճակներին արձագանքման մեխանիզմները չեն համապատասխանում օպերատիվ իրադրության զարգացման ներկայիս պահանջներին:
Ըստ ամենայնի Արշակ կարապետյանի երեկվա բավական կոշտ հայտարարությունը, ՀԱՊԿ կառույցի, ըստ էության, անպիտանիության, ոչ գործունակ գործելաոճի արձանագրումն է եղել պատճառը, որ Զասն այսօր Հայաստանի համար սպառնալիք է որակել ՀՀ տարածքում ադրբեջանական ստորաբաժանումների առկայությունը:
Բայց հաջորդ կարևոր հարցը հետևյալն է՝ իսկ ինչ է առաջարկել Զասը, ի՞նչ գործուն քայլեր է ձեռնարկելու այդ՝ անգործության մատնված կառույցը: Դեռ որքան ժամանակ են Հայաստանում դիտարկելու, որ այդ կառույցը որևէ նշանակալի քայլ չի կարող իրագործել ընդդեմ ադրբեջանական ագրեսիայի:
Թե՞ Հայաստանը դատապարտված է այդ կառույցի մասին խոսելիս առաջնորդվել՝ «լավ, կամ ոչինչ» սկզբունքով ու պարզապես մոռանալ ՀԱՊԿ-ին:
Մետաքսյա Շալունց
Հետևեք մեզ Viber-ում
