Ավտովթարներ Արարատի մարզում. նույն հատվածում բախվել են «07»-ը, Toyota-ն, «02»-ն ու ЗИЛ-ը. կան վիրավորներ. ՖՈՏՈՌԵՊՈՐՏԱԺ

Այսօր՝ հունիսի 23-ին, ավտովթարներ են տեղի ունեցել Արարատի մարզում։ Ժամը 10։00-ի սահմաններում Երևան-Երասխավան ավտոճանապարհի 38-րդ կմ հատվածում բախվել են Toyota մակնիշի 34 CՍ 327 համարանիշի և ВАЗ 2107 մակնիշի 34 TD 079 համարանիշի ավտոմեքենաները։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի մարմնական վնասվածքով տեղափոխվել է Արտաշատի բժշկական կենտրոն։ Դեպքի վայր են ժամանել Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի աշխատակիցները՝ դասակի հրամանատար Սանասար Հարությունյանի գլխավորությամբ։ Վթարի մասին ՃՈ օպերատիվ կառավարման կենտրոնի պատասխանատու հերթապահ Արմեն Հարությունյանը տեղեկությունը փոխանցել է ոստիկանության Արտաշատի բաժին, որտեղից ժամանել է օպերատիվ խումբը՝ Արտաշատի ոստիկանապետ Արթուր Հովհաննիսյանի գլխավորությամբ։ Մինչ տեղում ՃՈ հետաքննիչը նյութեր էր նախապատրաստում և դեպքի վայրի տեղազննություն էր կատարում, ВАЗ 2102 մակնիշի 27 ԼՍ 628 համարանիշի ավտոմեքենայի վարորդը բախվում է իր առջևով ընթացող ЗИЛ մակնիշի 01 ՍՕ 408 համարանիշի ավտոմեքենային։ Նշված վթարի հետևանքով հիվանդանոց են տեղափոխվում ևս 2 հոգի։ Նշված վթարի փաստով նույն ՃՈ հետաքննիչի կողմից նույնպես նյութեր են նախապատրաստվում։ Արտաշատի ոստիկանությունն ու ՃՈ հետաքննչական բաժանմունքը պարզում են վարորդների և վիրավորների ինքնությունը։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Գագիկ Շամշյանի