Աստծո դատաստանից փախչողները
Երկու վախը մի մահ է: Նոր խորհրդարանի ձեւավորումից հաշված օրեր առաջ Ազգային ժողովում անվտանգության խիստ միջոցառումներ են ձեռնարկվել։ Նաեւ լրացուցիչ միջոցներ են հատկացվել՝ մոտ 130 միլիոն դրամի։ Դահլիճի մուտքերի մոտ տեղադրվել են կամարաձեւ ռենտգեն սարքեր, բոլոր պատգամավորները դահլիճ մուտք գործելիս այսուհետ ստիպված կլինեն անցնել դրանց միջով։
Մինչեւ վերջերս նման սարքերը տեղադրված էին խորհրդարանի երկու մուտքերի՝ Բաղրամյանի եւ Դեմիրճյանի անցակետերում միայն։
Թե ինչից է վախենում իշխանությունը, խորհրդարանի ապագա խոսնակ Ալեն Սիմոնյանը երեկ լրագրողներին պարզաբանել է, թե այս խորհրդարանում Հոկտեմբերի 27 է եղել եւ խորհրդարան են գալիս հենց այն ուժերը, որոնց առաջնորդները եղել են այդ օրերի պատասխանատուներ: Ալեն Սիմոնյանն ասել է նաեւ, որ անվտանգության միջոցառումներն այսքանով ավարտված չեն, դեռ նոր քայլեր կարվեն: Թագուհի Թովմասյանը տեղեկություններ ունի, որ իշխանությունը մտադիր է սահմանափակել նաեւ լրագրողների տեղաշարժը խորհրդարանում, թույլ չտալ չորրորդ իշխանության
ներկայացուցիչներին մուտք գործել խորհրդարանի շենք, շրջել միջանցնքներում, մոտենալ պատգամավորներին, առավել եւս, մուտք գործել նրանց աշխատասենյակներ: Սիմոնյանը փորձեց ցրել լրագրողների հարցերը, թե սահմանափակվելու է տեղաշարժը՝ ասելով, թե ինքը լրագրողներից վախեցո՞ղ է, ապա շարունակեց՝ հիշեցնելով, որ Հոկտեմբերի 27-ի իրագործողների պարագլուխը լրագրող է եղել:
Իշխանության ամենաանկեղծ պատգամավոր Հովիկ Աղազարյանն ամբողջովին բացեց իր թիմի վախկոտ դեմքը, ասելով, որ դահլիճի մոտ սարքեր են տեղադրվել, որ հանկարծ որեւէ պատգամավորի մտքով չանցնի դանակ, պատառաքաղ տանել դահլիճ: Ցռան վերգոների թագավորությունում, ըստ ամենայնի, սեփական ստվերից էլ են վախենում, իրենք հասկանում են իրենց արած հանցագործության աստիճանը եւ հասկանում, որ մարդկանց ցասումն այնքան մեջ է, որ իրենց հարցերը սովորական պատառաքաղով էլ կարող են լուծել: Այս մարիկ այդպես էլ չհասկացան, որ ինչ էլ անեն, յոթ պատով իրենց անվտանգությունը փակեն, Աստծո դատաստանից հնարավոր չի լինելու փախչել, իսկ իրենց հարցերը լուծելու են ոչ թե խորհրդարանի պատերի ներսում, այլ որտեղ պատահի ու առնվազն պետք է չքվեն այս երկրից, քանզի երբ էլ լինի, անմեղ զոհերի վրեժի ծարավը հանգիստ չի թողնելու հազարավոր մարդկանց:
Անի Սահակյան
Հետևեք մեզ Viber-ում
