Հարթվում է ՔՊ-ականների ճանապարհը դեպի ռեկտորի աթոռ

Կառավարության վերջին նիստում որոշում է ընդունվել ռեկտորներին ներկայացվող պահանջները մեղմացնելու վերաբերյալ։ Ըստ այդմ՝ հանվում է դոկտորի գիտական

աստիճան և պրոֆեսորի կոչում ունենալու պահանջը, որը մինչ այս ռեկտորի համար հիմնականում պարտադիր էր: Արվեստի բուհերի պարագայում՝ Երևանի Կոմիտասի անվան կոնսերվատորիայի ու Երևանի թատրոնի և կինոյի պետական ինստիտուտի ռեկտորին ներկայացվող պահանջներից հանվել է ժողովրդական արտիստի կամ վաստակավոր արտիստի, արվեստի վաստակավոր գործչի կամ մշակույթի վաստակավոր գործչի պատվավոր կոչում ունենալու պահանջը: Այսուհետ բոլոր ուսումնական հաստատությունների ռեկտորներին ներկայացվող պահանջները հետևյալն են՝ գիտական աստիճանի առկայություն/ ցանկացած գիտական աստիճան/ և առնվազն 5 տարվա ակադեմիական ու գիտական գործունեության ստաժ:

Որոշման հիմնավորման մեջ նշված է, որ նախագծի ընդունումը պայմանավորված է ռեկտորին ներկայացվող պահանջների նկատմամբ միասնական չափանիշներ ամրագրելու անհրաժեշտությամբ, որովհետև պետական մի քանի բուհերի կանոնադրություններում ռեկտորի ընտրության համար նախատեսված չեն դոկտորի գիտական աստիճանի և պրոֆեսորի կոչման պահանջներ, փոխարենը առկա է ուղղակի գիտական աստիճանի և աշխատանքային ստաժի պահանջ: Այդ համալսարաններն են Հայաստանի ազգային ագրարային համալսարանը, Հայաստանի ազգային պոլիտեխնիկական համալսարանը, Գավառի պետական համալսարանը, Վ. Բրյուսովի անվան պետական համալսարանը, Հայաստանի ֆիզիկական կուլտուրայի և սպորտի պետական ինստիտուտը, Հայաստանի գեղարվեստի պետական ակադեմիան:
Որոշման մեջ նշված է նաև, որ առաջարկվող փոփոխությունը պետական համալսարանների կառավարման խորհուրդներին կընձեռի հնարավորություն ռեկտորների ընտրության հարցում ցուցաբերել ճկունություն՝ նպաստելով բուհի կառավարման արդյունավետությանը:

Այսպիսով՝ իշխանությունը ձեռնարկում է համառորեն չհանձնվող բուհական համակարգի գրավման նախապատրաստական քայլերը։ Ըստ ամենայնի՝ Նիկոլ Փաշինյանին չի հաջողվում դոկտոր-պրոֆեսորի կոչումով յուրայիններ գտնել, ուստի որոշվել է հանել այդ պահանջը։ Հաջորդաբար կարող է փոփոխություն կատարվել նաև բուհերի կանոնադրություններում՝ դոկտոր-պրոֆեսորի պահանջը չեղաչկելով նաև ֆակուլտետների դեկանների, ամբիոնների վարիչների և վարչական այլ պաշտոնների համար ևս։ Ի վերջո, եթե ռեկտորի համար նման պահանջ չի դրվում, տրամաբանական չի լինի դոկտոր-պրոֆեսորի պահանջ սահմանել ավելի ցածր պաշտոնի համար։ Ի դեպ, բարձրագույն կրթության ոլորտը կարգավորող դեռևս գործող <<Բարձրագույն և հետբուհական կրթության մասին>> ՀՀ օրենքով ռեկտորը միաժամանակ նաև գիտական խորհրդի ղեկավարն է։ Ստացվում է, որ ընդամենը գիտությունների թեկնածուի գիտական աստիճան ունեցող ռեկտորը ղեկավարելու է  բուհի բարձրագույն գիտական կառույցը՝ գիտական խորհուրդը, որում ընդգրկված են ավելի բարձր ակադեմիական ցենզ ունեցող գիտնականները՝ դոկտոր-պրոֆեսորներ, ակադեմիայի թղթակից անդամներ և ակադեմիկներ։

Հայտնի է, որ կառավարությունը տևական ժամանակ չի կարողանում լուծել ԵՊՀ ռեկտորի ընտրության խնդիրը։ Այնտեղ այժմ նշանաված է երեք հոգուց բաղկացած ժամանակավոր կառավարման խորհուրդ, որն առաջիկայում նշանակելու է ԵՊՀ կառավարիչ՝ մինչև ԵՊՀ հոգաբարձուների խորհրդի նոր կազմի ձևավորումը և նոր ռոկտերի ընտրությունը։ Բացի ԵՊՀ-ից մի շարք այլ բուհերում ևս մինչև տարեվերջ կավարտվեն հոգաբարձուների խորհուրդների և ռոկտորների գործունեության ժամկետները։ Այսպիսով՝ նոր ռեկտորների հարցը լուծում կստանա Նիկոլ Փաշինյանի սրտով։ Գիտությունների թեկնածուի կոչումով ՔՊ-ականների ճանապարհը դեպի ռեկտորների աթոռներ, այլևս բաց են։

Իսկապես, ինչ մի ավելորդ թիթիզություն է՝ գիտությունների դոկտոր-պրոֆեսոր․․․․  Փաշինյանը, առանց բարձրագույն կրթություն ստանալու, երկիր է կառավարում, բուհի կառավարումն ի՞նչ է, որ դրա համար դոկտորի աստիճան պահանջվի։ Որախ եղեք, որ գիտությունների թեկնածուի պահանջն էլ դեռ պահպանվել է ։

Հայկ Դավթյան