Թրամփին մեղադրում են արտերկրից եկամուտ ստանալու մեջ

Դոնալդ Թրամփը խախտեց Սահմանադրությունը հենց այն պահին, երբ երդվեց այն պաշտպանել, հայտարարում են Կոնգրեսի դեմոկրատները: «Նա բացահայտ ու միանշանակ խախտում է աշխատավարձ ստանալու հոդվածը», - նշում է սենատոր Ռիչարդ Բլումենթալը: Հոդվածի համաձայն, ընտրյալ պաշտոնյաները արտերկրից աշխատավարձ ստանալուց առաջ պետք է ստանան Կոնգրեսի հավանությունը: «Մենք չենք կարող հավանություն տալ մի բանի, որից տեղյակ չենք, մի բանի, որը Դոնալդ Թրամփը թաքցնում է», - ավելացնում է Բլումենթալը: Նախագահ Թրամփն արտերկրից եկամուտ է ստացել իրեն պատկանող ընկերությունների միջոցով, իսկ Կոնգրեսի դեմոկրատներն այդ պատճառով նրա դեմ երեք դատական հայց են հարուցել: Ընդդիմադիր օրենսդիրների խոսքով, արտերկրից ստացվող եկամուտը կարող է ազդել նախագահ Թրամփի արտաքին քաղաքականության ոլորտի որոշումների վրա: «Որտեղի՞ց իմանանք, թե արդյոք նախագահ Թրամփն այդ որոշումները կայացնում է Ամերիկյան ժողովրդի, այլ ոչ թե սեփական շահերի հիման վրա», - հարց է տալիս սենատոր Թոմ Ուդալը: Կոնգրեսի դեմոկրատների պահանջի հետ համամիտ չեն որոշ մասնագետներ: «Արտերկրում ձեռնարկատիրական գործունեությունը տարբերվում է արտերկրից աշխատավարձ ստանալուց: Դա հայցատուների ամենաթույլ կողմն է», - նշում է Մայնութ համալսարանի իրավաբան Սեթ Բարեթ Թիլմանը: Իրավաբանի խոսքով, դեմոկրատների առաջին քայլը՝ Դոնալդ Թրամփի ֆինանսական գործունեության մանրամասները բացահայտելն է լինելու. «Նրանք նախ փորձում են ձեռք բերել նախագահի հարկային փաստաթղթերը: Հաջորդ քայլը կլինի իմպիչմենտի գործընթացը»: Ամեն դեպքում դեմոկրատ կոնգրեսականների այս նախաձեռնությունը կարող է հեռու գնացող հետեւանքներ ունենալ:   Ամերիկայի ձայն