«Գեղեցկադեմ վարչապետ» օպերացիա` Սերժ Սարգսյանի բռունցքի համար

Կառավարությունը երեկ արտահերթ նիստում հաստատեց և խորհրդարան ուղարկեց կառավարության ծրագիրը: Դա ՀՀ կառավարության հերթական՝ 2017-2022թթ. ծրագիրն է: Համաձայն այդ ծրագրի՝ Կարեն Կարապետյանի կառավարությունն իր գործունեության հերթական իննամսյակում կենտրոնանալու է ապագա սերնդի արժանապատիվ ապրելու հեռանկարների վրա: Ինն ամիս կառավարությունը գլխավորած Կարեն Կարապետյանը ընդգծում է, որ գործադիրի ծրագիրը «բավականին հավակնոտ է»: Հարցը ներկայացնող՝ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանն ասաց, որ առաջիկա հինգ տարիների համար նախատեսված այս ծրագրի առանցքը «լայնամասշտաբ բարեփոխումներն են»: Կառավարությունը մինչև 2022թ. կարելի է ասել, խոստումներ է տալիս, թե ինչ է պատրաստվում իրականացնել: Տնտեսական աճի համար նախատեսված 5 տոկոսը, ՀՆԱ-ի նկատմամբ արտահանման 40 տոկոս մակարդակի ապահովումը: Կառավարության ծրագրի քննարկման նպատակով հունիսի 21-ին գումարվելու է խորհրդարանի առաջին նստաշրջանի հերթական նիստը: Նոր կառավարության ձևավորումից հետո 20 օրվա ընթացքում ծրագրի ներկայացումը խորհրդարանին Սահմանադրության պահանջն է: Կարեն Կարապետյանի գլխավորած գործադիր մարմինն առաջին անգամ անցած հոկտեմբերին ներկայացրել էր վեցամսյա ծրագիր, որը բաղկացած էր 33 էջից: Այս անգամ գործադիրի կազմած ծրագիրը զետեղված է ավելի քան 100 էջում և նախատեսված է 2017-2022թթ. համար: Կառավարության ծրագրում, ըստ էության, կրկնվում են վերջերս ՀՀԿ-ի հայտարարած զարգացման նպատակները: Օրինակ, ծրագրում նշվում է, որ 2017-2022թթ. ընթացքում նպատակադրված է ապահովել միջին հաշվով շուրջ 5 տոկոսի տնտեսական աճ: Գործադիրն, այդուհանդերձ, չի հստակեցնում՝ արդյո՞ք այդ հինգ տոկոս աճը վերաբերում է հնգամյա ժամանակահատվածի յուրաքանչյուր տարվան: Նախ` գանք խնդրի տնտեսական մասին: Տարեկան 5 տոկոսի տնտեսական աճը «հավակնոտ ծրագիր» կարելի է՞ համարել, մանավանդ, որ նման ցուցանիշների մասին նախկինում էլ է հայտարարվել է, մինչդեռ մեր հասարակությունն այդ խոստումների արդյունքը չի տեսել ու չի զգացել: Ի՞նչ կոնկրետ քայլեր է անելու Կարեն Կարապետյանը հինգ տարում աղքատության նվազման նպատակով, մենաշնորհների վերացման և ազատ տնտեսական պայմաններ ստեղծելու համար... Հարցերը կարելի է անվերջ շարունակել: Այս հարցերից է, որ            առաջ է գալիս Կարեն Կարապետյան վարչապետի նշանակման քաղաքական նշանակության բացատրությունը: Ի սկզբանե նրա նշանակման շուրջ «ֆուրորը» ոգևորություն առաջացրեց, բայց հիմա, տևական ժամանակ անց` հստակ է արդեն «գեղեցկադեմ վարչապետ» օպերացիայի իմաստը: Ո՞ւր են Կարեն Կարապետյանի խոստացած ներդրումային «բումի» հիմքերը... Դա փուչիկ էր, որ շատ արագ պայթեց: Առասպել առաջին` Սերժ Սարգսյանի և Կարեն Կարապետյանի միջև պայքար է ընթանում, հետևաբար, իշխանական բուրգում վերադասավորումներն անխուսափելի են... 2018-ից հետո իշխանական բուրգում, այո՛, փոփոխություններ կլինեն, բայց ոչ այն պատճառով, որ այսօր Սերժ Սարգսյանի ու Կարեն Կարապետյանի միջև հակասություններ կան: Դրանք կլինեն Սերժ Սարգսյանի գծած սցենարով` Կարեն Կարապետյանի հետ, կամ` առանց նրա: Հետևաբար, Սերժ Սարգսյան-Կարեն Կարապետյան հակասությունները կեղծ են, ավելի ճիշտ` արհեստածին են մի քանի պատճառներով: Կարեն Կարապետյանը մաքուր, անբիծ, անբասիր գործիչ չէ, որը դուրս գա ընդդեմ մենաշնորհային, թալանող համակարգի: Կարեն Կարապետյանն այս համակարգի անբաժանելի մասն է եղել, ավելին` հենց այդ համակարգի գոյությամբ է հարստացել` ղեկավարելով մի համակարգ, որը Հայաստանի ամենափտած, կոռումպացված ճյուղն է: Բացի այդ, Կարեն Կարապետյանն այդ համակարգում չի հարստացել` միայնակ, հետևաբար, մտածել, թե իբր հանկարծ Կարեն Կարապետյանը այս համակարգը ցանկանում է քանդել, ծիծաղելի է, նա այդ համակարգի ծնունդ է, ծառայել է այդ համակարգին և չի կարող այն քանդել, այդ իսկ պատճառով էլ «բերվեց» ՌԴ-ից, ավելի ճիշտ` նա թողեց «տաքուկ» Ռուսաստանն ու գայթակղվեց Հայաստանի վարչապետի պաշտոնով: Իհարկե, Ռուսաստանից Կարեն Կարապետյանի գալը որոշակի աշխարհաքաղաքական քննարկումների տեղիք էլ տվեց այն առումով, թե քանի որ նրան Մոսկվայից են նրան գործուղել, ուրեմն, Ռուսաստանը Կարեն Կարապետյանի միջոցով փորձում է զսպել Սերժ Սարգսյանի իշխանությունը: Սա էլ մեկ ուրիշ բլեֆ է: Ռուսաստանի դերը մենք արդեն սկսել ենք հիվանդագին գերագնահատել ամեն մանր հարցում, և հավատացեք, Մոսկվայի համար Հայաստանի վարչապետի հարցն, իսկապես, մանր հարց է: Կրեմլում` նախ գիտեն, որ ում էլ Սերժ Սարգսյանը նշանակի վարչապետ` նրանք պատրաստ են շաբաթը մեկ-երկու անգամ մեկնել Մոսկվա ու հավատարմության երդում տալ: Բացի այդ` Սերժ Սարգսյանը հակառակվե՞լ է Մոսկվայի քաղաքականությանը որևէ հարցում այն աստիճան, որ հանկարծ ռուսները որոշեն, որ Հայաստանում իրենց նշանակած վարչապետը պետք է «տեղը դնի» նախագահին... Ուրեմն, ավելորդ էին «գեղեցկադեմ վարչապետի» շուրջ բոլոր հնարավոր ու անհնար առասպելները: Եվ ամենակարևոր հետևությունը, որը պետք է անել Կարեն Կարապետյանի նշանակմամբ, հետևյալն է` իրականում այս նշանակմամբ Հայաստանի տնտեսությունը մեկ-երկու տարով էլ սպանելու, զարգացման իրական հնարավորությունները խեղդելու կոնկրետ քայլ է իրականացվել: Իսկ մնացած ամեն ինչ Կարեն Կարապետյանի շուրջ, ինչպես ասում են` պարզապես լիրիկա է... Մետաքսյա Շալունց