Ինչից է հապճեպ փախչում Վաղարշակ Հարությունյանը

Հայաստանի սահմաններին վերջին օրերի ռազմական լարված դրության պահին հայտնի դարձավ, որ Վաղարշակ Հարությունյանն ազատման դիմում է ներկայացրել ՀՀ պաշտպանության նախարարի պաշտոնակատարի պաշտոնից: Թե ինչով է պայմանավորված Հարությունյանի հրաժարականը, չեն հաղորդում՝ ոչ կառավարությունից, ոչ պաշտպանության նախարարությունից: Այս լռությունը առավել վտանգավոր կանխատեսումների հիմք է տալիս: Նախ որեւէ բանական ուղում հնարավոր չէ տեղավորել, թե ինչպես է հնարավոր, երբ քո պետության տարածքում լարված ռազմական դրություն է, ու հենց այդ պահին պաշտպանության նախարարը հեռանում է, կամ ավելի ճիշտ՝ փախչում մպայքարից, գուցե պատասխանատվությունից: Հատկապես, որ Նիկոլ Փաշինյանը առայժմ չի կարող նրան փոխարինող նշանակել, Սահմանադրությունը դա թույլ չի տալիս , նոր կառավարությունը կձեւավորվի մոտ տաս օրից: Սակայն Վաղարշակ Հարությունյանը չդիմացավ տաս օր, ինչո՞ւ, այս հարցադրումը մեծացնում է վերջին օրերի տագնապները, որ Երասխում, Գեղարքունիքում, Տավուշում իրավիճակի լարումը կարող է հանգեցնել նոր՝ ավելի ցավոտ զիջումների արդեն Հայաստանի տարածքից: Սրանով է պայմանավորված Վաղարշակ Հարությունյանի փախուստը:

Հիշեցնենք, որ Վաղարշակ Հարությունյանը պաշտպանության նախարարի պաշտոնում նշանակվել էր 2020թ. նոյեմբերի 20-ին՝ պատերազմից անմիջապես հետո, այդ պաշտոնում փոխարինելով Դավիթ Տոնոյանին:

Դա մի ժամանակ էր, որ շունն անգամ Փաշինյանի ձեռքից ոսկոր չէր վերցնի: Վաղարշակ Հարությունյանի պաշտոնավարման շրջանում այնպիսի այլանդակ ու անհավատալի գործընթացներ տեղի ունեցան՝ Գլխավոր շտաբը գլխատելուց սկսած վերջացրած Սյունիքի Սեւ լճի եւ Գեղարքունիքի մի քանի գյուղերի հայկական տարածքում ադրբեջանցիների հյուրընկալություն, որ հիմա դժվար է հավատալ, թե մեզ սպասվում է ավելի վատագույնը ու դրանով է պայմանավորված, որ Վաղարշակ Հարությունյանը որոշեց ժամ առաջ ազատել գլուխը այտ տհաճ բեռից:
Հասկանալով, որ ինքն այլեւս ապագա կառավարությունում չի զբաղեցնելու այդ պաշտոնը եւ Նիկոլ Փաշինյանը այն խոստացել է իրեն հավատարիմ Արշակ Կարապետյանին, ըստ էության Վաղարշակ Հարությունյանը որոշել է իր ուսերին չվերցնել վերջի սպասվող իրադարձությունների պատասխանատվությունը:

Նշենք, որ արդեն հստակ է, որ նրան կփոխարինի Արշակ Կարապետյանը, ով վարչապետի հրամանով երեկ Պնախարարի առաջին տեղակալ նշանակվեց, իսկ մինչ Խոսքը ԶՈՒ գլխավոր շտաբի պետի առաջին տեղակալն էր, վերջին պաշտոնում նշանակվել էր այս տարվա ապրիլի 7-ին՝ ազատվելով վարչապետի խորհրդականի պաշտոնից։ Արշակ Կարապետյանն ունի գեներալ-մայորի զինվորական կոչում, մարտական գործողությունների մասնակից է: Նա մինչև 2016-ը եղել է ՀՀ Զինված ուժերի գլխավոր շտաբի հետախուզության վարչության պետը։ Ապրիլյան քառօրյա պատերազմից հետո՝ ապրիլի 26-ին, նա երեք բարձրաստիճան զինվորականների թվում էր, որոնք Սերժ Սարգսյանի հրամանագրերով ազատվեցին պաշտոնից։ Երեկվանից համացանցում պտտվում է տեսանյութ, որում Փաշինյանի թիմակիցներ Տիգրան Ավինյանն ու Արայիկ Հարությունյանը հեղափոխության օրերին քննարկում են Կարապետյանի ձախողումները՝ համարելով նրան ռուսական կցորդ:
2018-ի դեկտեմբերի 18-ին Արշակ Կարապետյանը նշանակվել էր վարչապետ Նիկոլ Փաշինյանի խորհրդական, նրան վարձահատույց էին եղել Մարտի 1-ի գործով, Ռոբերտ Քոչարյանի դեմ ցուցմունք տալու համար:

Անի Սահակյան