Մոսկովյան դատարանը երկարաձգել է հայ գործարար Արամ Պետրոսյանի կալանքի ժամկետը

Մոսկվայի Պերսնենսկի դատարանը վճռել է մինչև օգոստոսի 24-ը երկարաձգել հայազգի գործարար Արամ Պետրոսյանի կալանքը, որն անցյալ տարվա ամռանը «Սիթիբանկ»-ի Մոսկվայի մասնաճյուղում մարդկանց էր պատանդ վերցրել, դատարանի դահլիճից հայտնում է РИА Новости-ի թղթակիցը։ «Քննության միջնորդությունը բավարարել, Պետրոսյանի կալանքի ժամկետը երկարաձգել մինչեւ օգոստոսի 24-ը», - ասել է դատավորը։ Միջնորդությունը հիմնավորելիս քննիչը պնդել է, որ քրեական գործը հատուկ բարդություն ունի, սակայն դատավորից նկատողություն է ստացել նախաքննությունը երկարաձգելու պատճառով։ Պետրոսյանն իրեն մեղավոր է ճանաչում պատանդառման համար, իսկ ահաբեկչության սպառնալիքի համար՝ ոչ։ 2016 թվականի օգոստոսին Պետրոսյանը Մոսկվայի «Սիթիբանկ»-ի մասնաճյուղում 4 մարդու է պատանդ վերցրել՝ սպառնալով պայթեցնել բանկը։ Սակայն հետո տղամարդը բաց է թողել պատանդներին ու հանձնվել իրավապահներին։