Կամ նա ինձ բանտ կտանի, կամ ես կսեղմեմ նրա ձեռքը․ դրամատիկ հանդիպում կառավարությունում

Հայտնի ճշմարտություն է՝ քաղաքականությունը հնրավորի արվեստ է։ Այսօր կարող ես պայքարել իշխանության դեմ, վաղը սեղմել այն նույն մարդու ձեռքը, ում հրաժարականն էիր պահանջում։
«Ասում եմ որպես Ծառուկյան Գագիկ անբարոյականի տղա լինեմ, թե հետ կանգնեմ, ինչ ուզում է սարքեն, չսարքեն, չորը մարդուն չի կպչում:
15 թվականից ամեն ինչ առաջարկել են, չեմ համաձայնել, այսօր էլ առաջարկել են, չեմ համաձայնել, 2 տարի ոչ մի բան, բոլորը ձախողել են, այսօր մարդիկ համապատասխան իրենց տեղերում չեն, բոլորը ձախողված են»։ Սա 2020 թվականի հունիսի 14-ին Գագիկ Ծառուկյանի՝ արած հայտարարությունն է՝ հերթական հարցաքննություից առաջ։
Մոտ մեկ տարի առաջ, Նիկոլ Փաշինյանը քաղաքական հետապնդում էր սկսել ԲՀԿ աեաջնորդ Գագիկ Ծառուկյանի դեմ որն, ի վերջո, ավարտվեց Ծառուկյանի կալանքով։
Իսկ արդեն 2021 թվականի հուլիսի 8-ին, ԲՀԿ առաջնորդ Գագիկ Ծառուկյանը սեղմեց Նիկոլ Փաշինյանի ձեռքը՝ լսելով նրա գործնական առաջարկությունները։
Քաղաքական ուժերի ղեկավարների հետ անցկացվող խորհրդակցությունների շրջանակում վարչապետի պաշտոնակատար Նիկոլ Փաշինյանը հանդիպման է հրավիրել նաև «Բարգավաճ Հայաստան» կուսակցության առաջնորդ Գագիկ Ծառուկյանին:
Նիկոլ Փաշինյանը շնորհակալություն է հայտնել Գագիկ Ծառուկյանին հանդիպման հրավերն ընդունելու համար և նշել. «Մեր գնահատականը ես արդեն հրապարակել եմ. դա այն է, որ խորհրդարանական ընտրությունների արդյունքում ներքաղաքական ճգնաժամը հաղթահարվեց: Կարծում ենք, որ մեր երկրի առաջ ծառացած խնդիրների լուծման համար անհրաժեշտ է բոլոր հնարավոր միջոցները ձեռնարկել՝ մեր համազգային, հանրային լավագույն ներուժն այդ մարտահրավերների լուծման հարցում համախմբելու և համագործակցության ուժերը մեկտեղելու, ճիշտ ֆորմատներ գտնելու ուղղությամբ:
Իհարկե, «Բարգավաճ Հայաստան» կուսակցությունը երկար տարիներ շատ շոշափելի դերակատարում ունի Հայաստանի Հանրապետության քաղաքական կյանքում: Այս ընտրությունների արդյունքում նա չի հաղթահարել խորհրդարան անցնելու համար անհարժեշտ շեմը, սակայն կարծում եմ, որ կուսակցությունը շարունակում է մնալ ազդեցիկ ուժ Հայաստանի ներքաղաքական կյանքում: Իհարկե, վերջին ամիսներին դժվար իրադարձությունների միջով ենք անցել, բայց մենք դեռ անցյալ տարի հանդիպելու, իհարկե կարճատև, քննարկելու հնարավորություն ունեցել ենք: Ես կուզենայի լսել Ձեր տեսակետները՝ քաղաքական կյանքի հետագա ընթացքի վերաբերյալ, թե ինչ կարող ենք անել, որպեսզի արտախորհրդարանական ընդդիմությունն ընդհանրապես, «Բարգավաճ Հայաստան» կուսակցությունը մասնավորապես, և կառավարությունը փոխադարձաբար ավելի լսելի լինեն միմյանց, որովհետև կարծում եմ, որ առավել ևս այս իրավիճակում պետք է ունենալ այնպիսի հաղորդակցության ֆորմատներ, որ լավ գաղափարները հնարավորություն ունենան կյանքի կոչվելու: Չեմ կարծում, թե լավ գաղափարներ ծնվում են միայն նրանց մոտ, ովքեր ավելի շատ ձայն են հավաքում խորհրդարանական ընտրություններում: Եվ եթե քաղաքական դաշտի մյուս ներկայացուցիչների կողմից այդ գաղափարները կիսելու, հաղորդակցվելու ցանկություն լինի՝ մենք պատրաստ ենք հնարավորն անելու, որպեսզի դրանք դրվեն, այսպես ասած, իրագործման հոսքագծի վրա: Այնպես որ, շատ հետաքրքիր կլինի լսել Ձեր դիրքորոշումներն այս հարցի վերաբերյալ»:
Գագիկ Ծառուկյանը իր ձևակերպմամբ <<պարոն վարչապետին>> հավատացրել է, թե իրենք շարունակում են մնալ ժողովրդի կողքին ։ <<Մենք ժողովրդի կողքին ենք, քննարկել ենք, մասնակցել ենք, տեղյակ ենք պահել մեր տեսակետը, մեր մոտեցումը, թե ինչպես կարելի է այս վիճակից դուրս գալ: Անկախ ամեն ինչից, մենք խորհրդարանում ենք, թե ոչ՝ դա չի նշանակում, որ մենք մեր ժողովրդի կողքին չենք: Ցանկացած բան, ինչ օգուտ կբերի, մեր հնարավորությունների սահմաններում միշտ էլ արել ենք, անում ենք, անելու ենք>>,- Փաշինյանի հետ հանդիպմանն ասել է Ծառուկյանը:
Ըստ էության, արտահերթ ընտրություններին ստացած պողպատե մանդատով Նիկոլ Փաշինյանը համագործակցություն է առաջարկել Ծառուկյանին՝ հատուկ շեշտելով նրա ազդեցիկ լինելու հանգամանքը։ Կարելի է արձանագրել, որ Ծառուկյանն ընդունել է այդ առաջարկը՝ հավանաբար շատ լավ հասկանալով, որ Փաշինյանի դեմ պայքարի արդյունքում կարող է հայտնվել բանտում։ Բացի այդ՝ Գագիկ Ծառուկյանն սեփական  բիզնեսն ու կապիտալը պաշտպանելու առաջնային խնդիր ունի։ Հենց այս պատճառով էլ Ծառուկյանն երբեք, որևէ իշխանության օրոք դասական իմաստով ընդդիմություն լինել չի կարող։
Փաստորեն Նիկոլ Փաշինյանի մուրճը, որ նա ընտրությունների ժամանակ աջ ու ձախ թափահարում էր՝ խոստանալով կադրային ջարդ ու քաղաքական վենդետա, նախատեսված է բացառապես ընդդիմադիրների համար։ Սյունիքի բոլոր հայտնի համայնքապետերի հանդեպ քաղաքական ռեպրեսիաներ են սկսվել, նրանք անցնում են տարբեր տեսակի շինծու գործերով։ Ավելին, այս պահին կալանքի տակ է հայտնի բժիշկ, պրոֆեսոր Արմեն Չարչյանը՝ իր աշխատակիցների կամքին իբր բռնանալու մաղադրանքով։ Քաղաքական հատուկ վերլուծությունների կարիք չկա, հասկանալու, որ Չարչյանի միակ մեղքն այն է, որ նա ներկյացված էր Հայաստան դաշինքի ցուցակով։
Իսկ ահա Ծառուկյանը, որին ժամանակին Նիկոլ Փաշինյանը մեղադրում էր ընտրակաշառք բաժանելու մեջ, այլևս դիտվում է բարեխիղճ և օրինավոր գործարար, ումից Փաշինյանը առողջ գաղափարներ է ակնկալում։

Հայկ Դավթյան