Արայիկ Հարությունյանը՝ ընդդեմ Նիկոլ Փաշինյանի

Արցախի նախագահ Արայիկ Հարությունյանը երեկ հրավիրած խորհրդակցության ժամանակ հայտարարել է, որ հայրենիքի պաշտպանությունից խուսափած պաշտոնյաների ու նրանց զավակների հետագա պաշտոնավարումը նպատակահարմար չէ։ «Պաշտոնյաները պետք է ազատվեն պաշտոններից։ Միայն Մարտունու շրջանում է, որ կատարել են պարտավորությունները, Մարտակերտ, Ասկերան, դեռ չեմ լսել, որ որևէ մեկին ազատել եք փախուստի կամ դասալքության պատճառով»,-ասել է նա` հավելելով, որ հանձնարարել է ԱԱԾ-ին հետևել, թե ինչով են զբաղված դպրոցի ու մանկապարտեզների տնօրենները, գլխավոր բժիշկները, նրանց ընտանիքների անդամները, որտեղ են եղել պատերազմի ընթացքում, ինչքանով է նպատակահարմար նրանց հետագա պաշտոնավարումը։
Հարությունյանը հանձնարարել է, որ 44–օրյա պատերազմի զորահավաքին չմասնակցած ու մարտական գործողություններից խուսափած քաղաքացիները չօգտվեն պետական աջակցության ծրագրերից։
Իհարկե, դասալիքությունը որեւէ կերպ չի կարելի խրախուսել, ավելի պատերազմի եւ ռազմական դրության ժամանակ դասալիքներին քրեական պատիժ է հասնում, ուստի դասալիքներին պատժելու ժամանակն ինչ-որ առումով անցել է, այն ուշացած է, բայց այստեղ ավելի մեծ խնդիր է հասկանալ՝ ով է ավելի դասալիք եւ դավաճան Արայիկ Հարությունյանը, ով 44 օր Նիկոլ Փաշինյանի հետ ստի հաղթարշավին էր մասնակցում, որի արդյունքում Արցախը հանձնվեց թշնամուն, թե մարդիկ, որոնք պարզապես չեն մասնակցել պատերազմին, չեն ստել, չեն մանիպուլացրել, չեն մոլորեցրել հանրությանը, ինչպես Արցախի նախագահը:
Արայիկ Հարությունյանի պատերազմի օրերին դրսեւորած հանցավոր անգործության կամ դիտավորյալ գործողությունների մասին անցած ութ ամիսներին բազմիցս անդրադարձել ենք՝ սկսած նրանից , որ կատարելով Փաշինյանի հրահանգը թույլ չտվեց արցախյան պատերազմի հաղթանակը կերտածներին մասնակից դառնալ 44-օրյա պատերազմի մշակման գործին, ինչպես նաեւ նախկին նախագահներին, փոխարենը Նիկոլ Փաշինյանի տիկնոջը պատվավոր տեղ հատկացրեց, վերջացրած նրանով, որ ստի հաղթարշավը համոզիչ դարձնելու համար կատարեց դավաճան կապիտուլանտի ցանկացած հրահանգ՝ հոլիվուդյան ժպիտով լուսանկարներ հրապարակելով առաջնագծից: Չենք խոսում, թե ինչպես պատերազմից ամիսներ առաջ բանակին վաճառեց իր այգիները, պատերազմից հետո թշնամուն՝ ՀԷԿ-երը: Մի խոսքով՝ ԱԱԾ- նախեւառաջ պետք է զբաղվի Նիկոլ Փաշինյանի հանցագործ խամաճիկով, որի անունը Արայիկ Հարությունյան է, ապա նոր միայն անցնի ավելի փոքր մեղք ունեցող դասալիքներին: Իսկ թե ինչ նպատակ է հետապնդում Հարությունյանի այս հանձնարարականը, շատ պարզ է, Նիկոլ Փաշինյանի հաղթանակից եւ պողպատյա մանդատ ստանալուց Արցախի խամաճիկը մեծ ոգեւորություն է ապրում եւ փորձում է ինքն էլ իր տարածքում թուրն աջուձախ կտրել: Կա նաեւ երրորդ տարբերակ, նա ազատում է մարդկանց, որպեսզի թափուր պաշտոններում նշանակի բոլորովին վերջերս իր հրաժարականը բահանջող հազարավոր քաղաքացիներից ամենաբողոքավորներին: Վերջին ժամանակները նրա դեմ բողոքի ակցիաները դադարել են: Լուրեր տարածվեցին, որ Հարությունյանը պաշտոններ է խոստացել հանրահավաքի նախաձեռնողներին: Հավանաբար հերթական աչքկապոցին մեկնարկել է եւ Հարությունյանը շուտով նոր պարտիայի կլռեցնի, ինչպես արեց պատերազմից հետո, երբ Արցախում ընդդիմադիր գործիչներին պաշտոնների նշանակեց:

Ի դեպ,Փաշինյանի ողջ թիմը դասալիք է եւ սա ինչ որ առումով նաեւ Փաշինյանի դեմ է:

Անի Սահակյան