Հանուն մոր՝ Աննա Հակոբյանի եւ որդու, Քյարամյանն «արիացավ»

Քննչական կոմիտեի փոխնախագահ, Ազգային անվտանգության ծառայության նախկին տնօրեն Արգիշտի Քյարամյանն Արցախի Հանրապետության նախագահ Արայիկ Հարությունյանի հրամանով պարգևատրվել է «Արիության համար» մեդալով։
Արցախի Հանրապետության պետական «Արիության համար» մեդալով կարող են պարգևատրվել Արցախի Հանրապետության պաշտպանության բանակի շարքային, հրամանատարական և ղեկավար կազմի զինծառայողները, որոնք մեծ դերակատարություն են ունեցել Լեռնային Ղարաբաղի Հանրապետության թշնամիների դեմ մարտերում, ռազմական գործողություններում, պետական սահմանների անձեռնմխելիությունը պաշտպանելիս, դիվերսանտների, լրտեսների և հանրապետության այլ թշնամիների դեմ պայքարում։
«Արիության համար» մեդալով պարգևատրվում են նաև Պաշտպանության բանակի շարքերում չգտնվող այն անձինք, որոնք Արցախի թշնամիների դեմ պայքարում եղել են հմուտ և ձեռներեց, ինչպես նաև սեփական կյանքը վտանգի ենթարկելով ռազմաճակատում մարտական գործողությունների հաջողությանը, հանրապետության բնակչության, մարդկանց կյանքի և առողջության անվտանգության ապահովմանը նպաստած անձինք։ Թե հատկապես նշվածներից որ սխրանքի համար է Քյարամյանը պարգեւատրվել, ԱՀ նախագահականից չեն ցանկացել մանրամասնել: Հիշեցնենք, որ 44-օրյա պատերազմից մոտ մեկ շաբաթ անց՝ հոկտեմբերի 8-ին, Արգիշտի Քյարամյանը ազատվեց ՀՀ ԱԱԾ պետի պաշտոնից, իսկ այնուհետև գնդապետ Քյարամյանը եղել է Շուշիում։
Սակայն այդպես էլ պաշտոնական պարզաբանում չտրվեց նրա ազատման վերաբերյալ՝ ճանապարհ բավելով ոչ պաշտոնական վարկածներին: Այսպիսով՝ համաձայն դրանց Արգիշտի Քյարամյանի անվան հետ է կապված ազգությամբ ադրբեջանցի Իրանի հազարավոր քաղաքացիների ՀՀ անձնագրեր տրամադրելու սկանդալային պատմությունը, որը ևս մինչ օրս չի պարզաբանվել: Պատերազմի ավարտից հետո «Ազգային անվտանգություն» կուսակցության նախագահ Գառնիկ Իսագուլյանը հայտարարեց, որ անձնագրային բաժանմունքների ղեկավարների միջոցով 1400 հայկական անձնագիր է բաժանվել հայերեն իմացող ադրբեջանցիների, ինչն ապահովել է ԱԱԾ` այն ժամանակվա տնօրեն Արգիշտի Քյարամյանը: ԱԱԾ տնօրենի պաշտոնից նրա ազատումը կապվում է հենց այս հանգամանքի հետ։
Քյարամյանի պաշտոնանկությունից հետո մամուլում նաեւ լուրեր հայտնվեցին, թե Քյարամյանին ասել են, որ նրա հեռացումը կապ ունի դավաճանության դեպքի բացահայտման հետ: Դրանից հետո աշխատանքից ազատվեց ՀՀ ազգային անվտանգության ծառայության ռազմական հակահետախուզության դեպարտամենտի պետ, գնդապետ Լեւոն Վազգենի Շահումյանը:
Բայց առավել ուշագրավն այն է, որ ազատումից հետո Նիկոլ Փաշինյանը նրան կրկին գործուղեց Արցախ: Այդ օրերին Արամ Գաբրիելիանովը գրեց, թե

ԱԱԾ նախկին տնօրեն Արգիշտի Քյարամյանն Արցախ մեկնել է ԱԱԾ 30 աշխատակիցների հետ: Գլխավոր խնդիրը, որ նրանց առջև դրել է Նիկոլ Փաշինյանը, եղել է իր կնոջ՝ Աննա Հակոբյանի ու որդու՝ Աշոտ Փաշինյանի անվտանգությունն ապահովելը: Այսպիսով, բացի անձնական թիկնապահներից, Աննա Հակոբյանի անվտանգությունն ապահովել են 10 լավ զինված հատուկջոկատայիններ:
Նույնիսկ Արցախի հատուկջոկատայիններն են զարմացած եղել, թե ինչպես են զինված եղել Հայաստանից ժամանած հատուկջոկատայինները:
Եվս 10 աշխատակից էլ պահպանել են Աշոտի անվտանգությունը:
Մյուսները մշտապես գտնվել են Արգիշտի Քյարամյանի տրամադրության տակ:
Mediaport-ի աղբյուրների փոխանցմամբ էլ՝ Քյարամյանը գնդապետի համազգեստով ազատ ելումուտ է ունեցել Պաշտպանական բանակի բունկեր՝ ներկա գտնվելով ռազմական օպերացիաների քննարկմանը։
Ավելին, նոյեմբերի սկզբին նա նշանակվել է Շուշի պաշտպանության կազմակերպման պատասխանատուի տեղակալ և տեղափոխվել Շուշի։ Երբ ԱՀ ՊՆ նորանշանակ հրամանատար Միքայել Արզումանյանն առարկել է Արայիկ Հարությունյանին՝ նշելով, որ անթույլատելի է որևէ ռազմական փորձ չունեցող Քյարամյանին նշանակել այդպիսի պատասխանատու պաշտոնին, Արցախի նախագահ Արայիկ Հարությունյանն ասել է , որ դա Նիկոլ Փաշինյանի ուղղակի հանձնարականն է։Սակայն Ադրբեջանական առաջին փոքրաթիվ դիվերսիոն խմբի ներթափանցումից ժամեր առաջ՝ նոյեմբերի 6-ի վաղ առավոտյան Արգիշտի Քյարամյանը հայտնել է, որ Արցախում իր պարտականությաւններն ամբողջությամբ կատարված են, և նստելով Ինկասացիայի մեքենան, հեռացել է Շուշիից։
Ըստ լուրերի՝ Շուշիի բանկերի միլիարդները հենց նրա ուղեկցությամբ է հասել Երեւան:
Պատերազմի ավարտից հետո Քյարամյանը նշանակվեց Քննչական կոմիտեի նախագահի տեղակալ, այս նշանակումը կրկին բազում հարցեր առաջ բերեց, թե ինչու է պատերազմի օրերին ազատված պաշտոնյան կրկին բարձր պաշտոնի նշանակվում, հետո գրվեց, որ Փաշինյանը Քյարամյանին ավելի բարձր պաշտոնում է տեսնում եւ որ նշանակումը ժամանակի հարց է, դիցուք ՔԿ ղեկավարի, կամ կրկին ԱԱԾ տնօրենի: Կասկած չկա, որ Արայի Հարությունյանը Փաշինյանի ցուցումով է պարգեւատրել երիտասարդ պաշտոնյային թերեւս հող նախապատրաստելով նրա՝ ավելի բարձր պաշտոնի նշանակվելու համար:

Անի Սահակյան