Պարգեւատրվում են հայրենիքը նոր թափով հանձնելու համար

Գեղարքունիքի մարզի Վերին Շորժա գյուղի սահմանային հատվածում Ադրբեջանը փոխհրաձգություն է հրահրել:
Այս մասին հայտնել է Զինված ուժերի գլխավոր շտաբի վարչական ապարատի տեղեկատվական բաժնի պետ, գնդապետ Սամվել Ասատրյանը՝ անդրադառնալով տարածված այն տեղեկությանը, որ հայ-ադրբեջանական սահմանին հայ և ադրբեջանցի զինծառայողների միջև փոխհրաձգություն է տեղի ունեցել:
«Ադրբեջանական զորքերն իրենք են հրահրել փոխհրաձգությունը: Հայկական կողմը ունի մեկ թեթև վիրավորում ստացած զինծառայող: Մեր տեղեկություններով՝ ադրբեջանական կողմը ունի երկու վիրավոր զինծառայող»,-ասել է Ասատրյանը:
ՄԻՊ-ն էլ իր հերթին է հայտարարություն տարածել, որ ինտենսիվ կրակահերթ է եղել, մոտ երեսուն րոպե փոխհրաձգությունը չի դադարել:
Մոտ երկու ամիս առաջ ադրբեջանական զինուժը Սյունիքի ու Գեղարքունիքի ուղղություններով հատեց սահմանը և մինչև օրս չի հեռացել Հայաստանի տարածքից։ Այս ընթացքում հայաստանցի ու ադրբեջանցի զինվորականների միջև պարբերաբար միջադեպեր են գրանցվում։
Հուլիսի 6-ին միջադեպեր են տեղի ունեցել նաև հայ-ադրբեջանական սահմանի Սյունիքի ուղղությամբ։ Տեղ համայնքի ղեկավար Ներսես Շադունցի տեղեկացմամբ, վաղ առավոտյան Խնածախ գյուղի հովվի խոշոր եղջերավոր անասուններից երեքը մոտեցել են ադրբեջանական զինված ուժերի տեղակայման վայրին, և ադրբեջանցի սահմանապահները վերցրել են անասուններին։ Մի քանի ժամ տևած բանակցություններից հետո անասուններին վերադարձրել են։

Ակնհայտ է, որ վերջին օրերի այս միջադեպերը կապված են Պուտին-Փաշինյան հանդիպման հետ։ Ինչպես հայտնի է հուլիսի 7-ին Նիկոլ Փաշինյանը մեկնում է Մոսկվա: Մոսկվան ու Բաքուն թերեւս շտապում են Հայաստանին պարտադրել «դեմարկացիոն ու խաղաղության» պայմանագրեր։ Իր հերթին, Բաքուն փորձում է ճնշում բանեցնել Հայաստանին այդ պայմանագրերը պարտադրելու համար։ Իսկ ինչ են անում Հայաստանում, այո, մեկ օր առաջ պարգեւատրում են ԱԱԾ տնօրեն Արման Աբազյանին գեներալ-մայորի կոչումով: Պարգեւատրում են մեկին, ով հատկապես վերջին ութ ամիսներին մոռացել է, որ կառույցի գլխավոր առաքելությունը ՀՀ անվտագության պահպանումն է,այլ ոչ թե մեկ մարդու, ում անվտանգության համար է կառույցն աշխատում առավոտից երեկո: ԱԱԾ-ն փաստորեն անգործության է մատված եւ անտեսվել է փաստը, որ մոսկովյան այցին ընթադառաջ նման սադրանքներ են սպասվում: Ադրբեջանցիները զավթել են մեր տարածքները եւ երկու ամիս շարունակ Նիկոլ Փաշինյանը հարկ չի համարում նրանց հեռացնել մեր սուվերեն տարածքից, այնինչ ՀՀ-ն ունի կանոնավոր բանակ, ԱԱԾ սահմանապահ զորքեր, Ոստիկանության ներքին զորքեր: Ի դեպ, հետպատերազմյան ճգնաժամի մեջ գտնվող Հայաստանում պետական համակարգի ծառայողների պարգևատրումները շարունակվում են։ NEWS.am–ի գրավոր հարցմանն ի պատասխան ոստիկանությունից ստացված տվյալներից պարզ է դառնում, որ 2021թ.-ի հունվար-մայիս ամիսներին ոստիկանության ծառայողների (աշխատողների) ամսական պարգևատրումների համար հատկացվել է 3.7 մլրդ դրամ կամ 7.1 մլն ԱՄՆ դոլար՝ ամսական միջինը մոտ 700 մլն դրամ։ Ոստիկանությունից սակայն չեն նշել, թե նշված ժամանակահատվածում քանի ծառայող է պարգևատրվել՝ պատճառաբանելով, որ ոստիկանության ստորաբաժանումների անձնակազմի ցուցակային թվաքանակի մասին տվյալները գաղտնագրված են և ենթակա չեն հրապարակման։

Անի Սահակյան