Սյունիքի հանձնումը սկսված է. Փաշինանն առաջին քայլերն է անում

Հուլիսի 7-ին Նիկոլ Փաշինյանը կայցել Մոսկվա: Դեռեւս գաղտնի է պահվում հանդիպման օրակարգը, թեեւ ԱԽ քարտուղար Արմեն Գրիգորյանն այս մասին Հանրայինի եթերում հայտարարել է, որ Նիկոլ Փաշինյանը և Վլադիմիր Պուտին Մոսկվայում հայ-ռուսական հարաբերությունների լայն օրակարգի շուրջ հարցեր են քննարկելու, որի առանցքում անվտանգությունն է: Նրա խոսքով՝ քննարկումների օրակարգում են ԼՂ հիմնախնդրի խաղաղ ճանապարհով կարգավորման վերաբերյալ հարցեր, ինչպես նաև 2020թ-ի նոյեմբերի 9-ի և 2021թ.-ի հունվարի 11-ի եռակողմ հայտարարությունները:
«Բնականաբար, քննարկվելու է սահմանային այս իրավիճակը և լուծումները, որովհետև հայ-ռուսական հարաբերությունները և նաև այս հարցում դիրքորոշումները, կարող եմ միանշանակ ասել, որ համանման են, և մեր դիրքորոշումները նաև նույնական են այս հարցում։ Վարչապետը պետք է քննարկում ունենա, թե ինչպես ենք առաջ գնում, որ սահմանային հարցը լուծում ունենա»,- նշել է Գրիգորյանը։
Իսկ ոչ պաշտոնական աղբյուրների փոխանցմամբ` Բաքու-Մոսկվա փոխհամաձայնությամբ Հայաստանին պարտադրելու են ստորագրել դեմարկացիայի եւ դելիմիտացիայի պայմանագիր, որի արդյունքում փաստացի Արցախը կդառնա Ադրբեջանի մաս եւ Հայաստանը կճանաչի Ադրբեջանի տարածքային ամբողջականությունը: Դրանից բացի ՀՀ բոլոր սահմանների անվտանգությունը կվերապահվի ռուս սահմանապահներին եւ Հայաստանը Ռուսաստանի հետ նոր պայմանագիր կստորագրի, բնականաբար կսկվեն ճանապարհների ապաշրջափակման եւ Մեղրիի միջանցքի կառուցման աշխատանքները: Կարծիք կա, որ այս նպատակով է Նիկոլ Փաշինյանը մաքրություն սկսել Սյունիքում եւ քրեական հետապնդումների է ենթարկում մարզի համայնքապետերին ու վարչական շրջանի ղեկավարներին:

Երեկ ձերբակալվեց Գորիս համայնքի Քարահունջ բնակավայրի վարչական ղեկավար Լուսինե Ավետյանը. նրան ընտրական մի շարք հանցագործություններ կատարելու մեղադրանք է առաջադրվել։ Հատուկ քննչական ծառայության քննիչը միջնորդություն է ներկայացրել դատարան Լուսինե Ավետյանին կալանավորելու համար:

Ըստ Հատուկ քննչական ծառայության՝ Ավետյանը Քարահունջի 4 բնակիչների այս տարվա մայիսին 100-220 հազար դրամ է փոխանցել ու նրանց հարկադրել մասնակցել «Հայաստան» դաշինքի Գորիսի հանրահավաքին, հետո էլ նրանց ստիպել մասնակցել ընտրություններին ու ընտրել նույն դաշինքին։ Քարահունջի մեկ այլ բնակչի էլ 100 հազար դրամ ֆինանսական աջակցության տրամադրումն է կազմակերպել՝ սոցիալական առողջական խնդիրների լուծման համար, հետո այդ բնակչին ու նրա ամուսնուն գումարը ներկայացրել որպես ընտրակաշառք՝ «Հայաստան» դաշինքի քարոզարշավին՝ ապա ընտրությանը մասնակցելու դիմաց։ 47-ամյա Լուսինե Ավետյանն այժմ ձերբակալված անձանց պահման վայրում է, մեղադրանքը չի ընդունում, ասում է նրա փաստաբան Րաֆֆի Ասլանյանը: «Լուսինե Ավետյանը պնդել է, որ ինքը որևէ մեկին չի հարկադրել մասնակցել, տվյալ անձինք չեն էլ մասնակցել այդ քարոզարշավներին», - ասել է Ասլանյանը:
Ըստ փաստաբանի՝ Գորիս խոշորացված համայնքի Քարահունջի վարչական ղեկավարը համայնքի բյուջեից դրամական աջակցություն տալու լիազորություն չունի էլ, ըստ քաղաքացիների դիմումների՝ սոցիալական աջակցության որոշում Գորիսի համայնքապետարանն է կայացնում: Այսինքն խնդիրը Գորիսի քաղաքապետ Առուշ Առուշանյանն է, իսկ վարչական շրջանի ղեկավարի դեմ ցուցմունք տվողներն, ավելի ուշ պարզ դարձավ, որ ՔՊ-ական է ուղղորդել, ըստ էության նման ցուցմունքներով հավանաբար դժվար էր լինելու Առուշանյանի դեմ գործ հարուցել, եւ որոշել են վարչական շրջանի ղեկավարին ձերբակալել: Իհարկե, գուցե հաջողվի Սյունիքի անհնազանդ բոլոր համայնքապետերին էլ չեզոքացնել, բոլորին գցել բանտերը, բայց միթե դրանից փոխվում է այս իշխանության բնույթը, հանցանքի ծանրությունը եւ նրանց կատարած մեծ ոճիրը: Ինչ էլ անեն, իրենք մնում են Արցախի 75 տոկոսը թուրքին հանձնած, տաս հազար զոհ, նույնքան վիրավոր տված կապիտուլանտ, ազգակործան պատուհասները:

Անի Սահակյան