Կառավարությունը 5 տարում պետք է ՀՀ-ում աղքատության մակարդակը 30 տոկոսից իջեցնի 12-ի

Երեկ ՀՀ կառավարությունն արտահերթ նիստում որոշել է հրավիրել Ազգային ժողովի արտահերթ նիստ, որի օրակարգում լինելու է կառավարության ծրագիրը։ Կառավարությունը երեկ հավանության է արժանացրել իր իսկ մշակած ծրագիրը։ «Հայկական ժամանակ»-ը գրել է. «Այս ծրագրով կառավարությունը ստանձնել է առաջիկա 5 տարիների Հայաստանում ապահովել 5 տոկոս տարեկան տնտեսական աճ։ Բացի այդ, 5 տարի անց մեկ երկրից ապրանքների և ծառայությունների արտահանման ծավալը պետք է կազմի համախառն ներքին արդյունքի 40-45 տոկոսը։ Նկատենք, որ օրինակ անցած տարի տնտեսական աճը կազմել է 0.2 տոկոս, իսկ ապրանքների ու ծառայությունների արտահանման ծավալը մոտ 3 միլիարդ դոլար է, այսինքն՝ ՀՆԱ-ի մոտ 30 տոկոսը։ Արտահանման նման ցուցանիշ ստացվում է միայն այն բանի շնորհիվ, որ զբոսաշրջությունը համարվում է ծառայությունների արտահանում։ Ծրագրում առկա ամենաանհավանական ցուցանիշը, որին ձգտելու է հասնել կառավարությունը, աղքատության մակարդակի նվազեցումն է։ Ըստ ծրագրի՝ 5 տարուց աղքատության մակարդակը Հայաստանում պետք է կազմի 12 տոկոս։ Եվ դա այն դեպքում, երբ ներկայումս այդ ցուցանիշը 30 տոկոս է։ Թե ինչպես է կառավարությունը գրավելու այս «բարձունքը», ծրագրից այնքան էլ հստակ չի երևում»: