Լեւոն Տեր-Պետրոսյանը Նիկոլ Փաշինյանին նոր Մարտի 1 անելու ֆորա է տալիս

«Հասանք ֆինիշին, հրաշալի քարոզարշավ անցկացրեցիք`լուրջ, զուսպ, գրագետ, համբերատար եւ սառնասիրտ։ Ուզում եմ ձեզ շնորհակալություն հայտնել դրա համար»,-այս մասին հայտարարել է ՀՀ առաջին նախագահ Լեւոն Տեր-Պետրոսյանն՝ ՀԱԿ նախընտրական ամփոփիչ հավաքի ժամանակ։
Այո, առաջին նախագահը, հիրավի, սառնասիրտ քարոզարշավ իրականացրեց՝ հոգու խորքում անթաքույց հրճվելով ստեղծված աղետալի վիճակի վրա միայն նրա համար, որ հայտարարեր, թե տեսեք, որ ասում էի Ղարաբաղը չեք կարող պահել, չէիք ընդունում, սառնասրտորեն խոստովանեց, որ Ղարաբաղն Ադրբեջանի մաս է կազմում, աշխարհն էլ այդպես է ընդունում, ուստի մեզանից՝ հայերիցս այլեւս կախված չէ ղարաբաղյան հարցի լուծումը, մենք զրո դերակատար ենք, չգործոն եւ պետք է փորենք մեր գերեզմանափոսը ու սպասենք, թե երբ են մեզ այնտեղ թաղում: Այո, առաջին նախագահը սառնասրտորեն ոչնչացրեց այն հույսի նշույլը, որ կա եւ ապրեցնում է պատերազմից հետո քարուքանդ եղած, ջախջախված հայությանը, ասաց, որ մեր երկիրն ապագա չունի՝ ոտքի կանգնելու, հաղթելու եւ հզորանալու ոչ մի շանս չկա, ամեն ինչ այլեւս անդառնալի է։
Այո, զուսպ ու գրագետ փորձեց խանգարել իշխանափոխության ծրագրին եւ նպաստել Նիկոլ Փաշինյանի՝ իշխանության մնալուն՝ իր բոլոր հարցազրույցներում կարմիր թելի պես ձգելով, թե երկրորդ նախագահ Ռոբերտ Քոչարյանին ոչ մի կերպ ձայն տալ չի կարելի, որովհետեւ նա մեզ նոր պատերազմի կտանի՝ նոր զոհերով, նոր կորուստներով:
Փոխարենը որեւէ անգամ չխոսեց՝ եթե ինքն այդքան ճիշտ էր, համոզված, որ այսպիսի աղետի առաջ ենք կանգնելու, ինչու իմաստուն էիք եւ վստահ, որ այսպիսի հեռանկար ենք ունենալու, ինչո՞ւ գլուխն առավ եւ փախուստի դիմեց պատասխանատվությունից, ինչու 1997-ին չիրագործեց իր ծրագիրը, կամ դրանից հետո ահազանգեր չհնչեցրեց, տասը տարուց ավել լռեց, իսկ 2008-ի քարոզչության ժամանակ Արցախի խնդրի փոխարեն մոնղոլթաթարական իշխանական համակարգ էր քննադատում: Եթե առաջին նախագահին թվում է, թե մարդիկ չհասկացան, որն էր իր քարոզարշավի քողարկված նպատակը, ապա չարաչար սխալվում է: Մանավանդ , որ <<ֆինիշում>> նա ավելի բաց խաղ սկսեց՝ Նիկոլ Փաշինյանին փորձելով դուրս դնել պատասխանատվության դաշտից:

Առաջին նախագահը չարագուժում է ընտրություններից հետո սպասվող հետընտրական վտանգավոր զարգացումների մասին եւ ողջ պատասխանատվությունը դնում Ռոբերտ Քոչարյանի ու Սերժ Սարգսյանի վրա: Առաջին նախագահը կրկին հիշեցրել է այն պայմանները, որով ինքը առաջարկել էր դաշինք կազմել․ «Ես դրանում հարյուր տոկոսով հավատացած եմ։ Հարցի մյուս կողմն այն է, որ եթե այդ դաշինքը հաջողվում էր, այսօր Նիկոլի ֆենոմենը գոյություն չէր ունենում։ Նիկոլը կարող էր դրանից գուցե մեկ -երկու շաբաթ հետո թողնել, փախչել Հայաստանից։ Ուրեմն այս ընտրությունների բոլոր բացասական հետեւանքների գլխավոր մեղավորները Ռոբերտ Քոչարյանն ու Սերժ Սարգսյան են, որոնք վիժեցրին այս պլանը>> ասում է նա, ըստ էության, ֆորա տալով Նիկոլ Փաշինյանին նոր Մարտի 1 սարքել.<< Հիմա մեզ սպասվում է դժվարին ընտրություններ, մենք մեր խոսքն ասացինք, մեր խոսքը բավականին լայն արձագանք գտավ, այնպես չէր ինչպես նախորդ ընտրություններին։ Այն ժամանակ էլի նույն բաներն էինք ասում, բայց այն ժամանակ այնքան հզոր էին մեր դիմացի ուժերը, որ մեզ իրենց մեդիա ռեսուրսով լռեցրին։ Հիմա փառք աստծո, վերջին մեկ ամսում մենք ունեցանք հնարավորություն օգտվել բոլոր մեդիա ռեսուրսներից։ Սա կարելի է ասել, ի պատիվ Նիկոլի, նույնիսկ հանրային հեռուստաընկերությունը մեզ հսկայական տեղ տվեց։ 2008-ին, 2017-ին չունեինք այս հնարավորությունը> Փաշինյանի գովքով էլ եզրափակում է քարոզարշավը։

Անի Սահակյան