Ինչպե՞ս է տեղի ունեցել դեպքը սահմանին.Դավիթ Բաբայան

galatv.am-ի թղթակցի հարցերին պատասխանում է Արցախի նախագահի մամլո խոսնակ Դավիթ Բաբայանը։ Ըստ Արցախի նախագահի մամլո խոսնակի՝ ներկայումս իրավիճակը սահմանին վերահսկելի է, ու պաշտպանության բանակը շարունակում է իր ձեռքում պահել ռազմավարական նախաձեռնողականությունը: Կմնա՞ արդյոք անպատասխան թշնամու այս գործողությունը, Դ. Բաբայանն ասաց. «Հակառակորդի բոլոր նման քայլերը, սադրանքները ճնշվել են, ճնշվում են ու ճնշվելու են: Տեղի ունեցածը մեզ համար մեծ ողբերգություն է, բոլորիս համար, որ զոհվեցին մեր երիտասարդ տղաները, սա բոլորիս համար անձնական կորստի պես մի բան է, ու բոլորս էլ սգում ենք, մեր հակառակորդը նույնն է՝ հանցավոր, ֆաշիստ»,- ասաց Դ. Բաբայանը: Այս միջադեպը սահմանին տեղի ունեցավ ԵԱՀԿ Մինսկի խմբի համանախագահների՝ Հայաստան ու Արցախ այցելությունից անմիջապես հետո: Մինսկի խումբն առաջիկայում  նախատեսում է այցելություն նաև Բաքու: Դավիթ Բաբայանն ասում է, թե հակառակորդը սովորաբար նմանատիպ այցելությունների նախօրեին ու դրանցից հետո է ակտիվանում. «Սա անտրամաբանական է, բայց դա այդպես է, և նման այցերի ժամանակ, և այցերից հետո խախտում են հրադադարի ռեժիմը, հիմա պետք է գնան Բաքու: Մինչ այդ Ալիևն է խոսում՝ աննորմալ գաղափարներով է հանդես գալիս, մինչ այդ Էրդողանը՝ ահաբեկիչների գլխավոր հովանավորներից մեկը, նույնպես քննադատեց Մինսկի խմբի համանախագահների աշխատանքը, սա մի ընդհանուր շղթա է ու առողջ տրամաբանության մեջ չի տեղավորվում, բայց դա այդպես է»,- ԳԱԼԱ-ի հետ զրույցում ասաց Դ. Բաբայանը: Դ. Բաբայանից հետաքրքրվեցինք նաև, թե ինչ պայմաններում է տեղի ունեցել միջադեպը սահմանին. «Սա անմիջական գործողություն է, նրանք հեռավորությունից կրակել են, օգտագործել են նռնականետեր ու ականանետեր, ինչպես անում է ահաբեկիչը»,- եզրափակեց Արցախի նախագահի մամլո խոսնակը: