Ուժայինները համարում են, որ Փաշինյանի օրերը հաշվա՞ծ են
Մեկ շաբաթ առաջ ՀՀ գլխավոր դատախազությունը տեղեկացրեց, որ Արթուր Դավթյանը ՀՀ ազգային անվտանգության ծառայության տնօրեն Արմեն Աբազյանի, ոստիկանապետ Վահե Ղազարյանի, հատուկ քննչական ծառայության պետի տեղակալ Վլադիմիր Հովհաննիսյանի, ՀՀ դատախազությունում ստեղծված աշխատանքային խմբի անդամների մասնակցությամբ անցկացրել է խորհրդակցություն՝ 2021թ. հունիսի 20-ին կայանալիք խորհրդարանական արտահերթ ընտրությունների «օրինական ընթացքն ապահովելու, հնարավոր հանցավոր ընտրախախտումների կանխարգելման, դրանց դեմ իրավապահ մարմինների համատեղ քրեաիրավական պայքարի կազմակերպման խնդիրների շուրջ»:
«Խորհրդակցության ընթացքում քննարկվել են ընտրությունների նախապատրաստման և անցկացման ընթացքում հնարավոր ընտրական հանցագործությունների վերաբերյալ հրապարակումները, քաղաքացիների հաղորդումներին և ահազանգերին պատշաճ արձագանքելու, ստուգման առարկա դարձնելու, քրեադատավարական գործընթացներ նախաձեռնվելու դեպքում յուրաքանչյուր օղակի կողմից իր պարտականությունների կատարման անխափան ընթացքն ապահովելու կառուցակարգերը, աշխատանքային հնարավոր խնդիրները, դրանց կարգավորման եղանակները»,- տեղեկացրել էին դատախազությունից:
Մի քանի օր է իշխանությունը Նիկոլ Փաշինյանի գլխավորությամբ «մարտեր առանց կանոնների ոճում», նախընտրական քարոզարշավ է վարում, հայհոյում, սպառնում քաղաքական օպոնենտներին, վարչական ռեսուրսն անխնա օգտագործում՝ հրահանգելով պետական ապարատի աշխատակիցերին ներկա գտնվել Փաշինյանի հանդիպում-հանրահավաքներին: Այդ մասին բազում ապացույցներ կան մամուլի հրապարակումների տեսքով, սակայն իրավապահ կառույցները մատը մատին չեն խփում: Քաղաքացիական պատերազմի, քաղաքացիական եւ քաղաքական վենդետաների մասին Նիկոլ Փաշինյանի սպառնալից կոչերը միայն բավարար են, որ իրավապահները գործի անցնեն, հատկապես, որ իշխանությունն օրենք ընդունեց բռնության կոչերը քրեականացնելու վերաբերյալ, սակայն ինչպես եւ սպասվում էր Փաշինյանի գրպանում գործող ուժային կառույցներն իրենց գործառույթների մասին հիշելու են միայն ընդդիմադիր գործիչների պարագայում: Հայելի մամուլի ակումբում ասուլիս տալու եւ Փաշինյանին ուղղված քննադատական խոսք ասելու համար, օրինակ հարցաքննության են կանչել մի շարք ընդդիմադիր քաղաքական եւ հասարակական գործիչներ՝ Գառնիկ Իսագուլյան, Զարուհի Փոստանջյան, Արիանա Հովսեփյան եւ այլ: Իրավապահ կառույցները ոմանց սուտ մատնությյան հոդվածով են քաշքշում քննչական ու ՀՔԾ-ում: Նիկոլ Փաշինյանը, սակայն, իրեն թույլ է տալիս ոչ միայն բռնության կոչեր, վիրավորանք քաղաքական ընդդիմախոսների հասցեին, այլեւ անում է ամենաանապացուցեի, չփաստարկված հայտարարություններ: Մեծ հաշվով սպասելի է իրավապահների նման անգործությունը, եթե պատերազմից հետո ռազմական եւ քաղաքական գործիչների սկանդալային մեղադրանքները Փաշինյանի եւ տիկնոջ հասցեին մինչ օրս մնում են չքննված, ապա նախընտրական զրպարտանքներն ու սպառնալիքները Փաշինյանի կողմից միանգամայն անտեսվելու էին: Ցանկացած օրինական, իրավական հռչակված պետությունում արտգործնախարարի սկանդալային հայտարարությունը կդառնար իրավապահների քննության առարկա: Հիշեցնենք, որ Այվազյանը բառացիորեն հայտարարեց , որ հրաժարական է տվել, «որպեսզի որևէ կասկած չլինի, որ ԱԳՆ-ն կարող է համաձայնություն տալ ինչ-որ գաղափարների, որոնք մեր պետականության, ազգային և պետական շահի դեմ են եղել»: Իրավապահները, սակայն, չհետաքրքրվեցին այլեւս նախկին պաշտոնյայից, թե ով էր նման բան պարտադրում եւ արդյոք Հայաստանի կառավարությունը հակապետական քայլերի է պատրաստվում:
Միգուցե գլխավոր դատախազն ու մնացած ուժային ղեկավարները համարում են, որ Փաշինյանի իշխանության օրերը հաշված են եւ նրան պետք է հանգիստ թողնել, հոգեդարձ չանել, դա այլ հարց է:
Անի Սահակյան
Հետևեք մեզ Viber-ում
