Անփոխարինելի վրիժառուն

Հայաստանում շատ պայթյունավտանգ իրավիճակ է, առաջիկա ընտրությունները լինելու են հանրապետության պատմության մեջ ամենավտանգավոր ընտրությունները, որովհետև երկու բևեռները՝ Փաշինյանն ու Քոչարյանը պատրաստ են ամեն ինչի իշխանություն ունենալու համար: Այս մասին հայտարարեց Հայ ազգային կոնգրեսի ղեկավար, առաջին նախագահ Լեւոն Տեր-Պետրոսյանը նախընտրական ծրագրի շնորհանդեսի ժամանակ: Սակայն առաջին նախագահի ելույթի այլ ուղերձներ հուշում են, որ ինքն էլ պակաս չի պայքարում իշխանության համար, եւ այդ ճանապարհին պատրաստ է երկրորդականը գերադասել առաջնայինից, մանիպուլացնել հանրությանը:
«Այդ խոսակցությունները, թե նախկինում իրար մորթել եք, հոշոտել եք, ինչ անբարոյական մարդիկ եք, որ հիմա հավաքվում իրար հետ դաշինք եք կազմում և այլն․․․ բայց միակ փրկության ձևը սա էր։ Հիմա սա չեղավ։ Ի՞նչ է լինելու։ Ճակատամարտ։ Դեռ չեմ ասում քաղաքացիական պատերազմ։ Առայժմ իրենց ռեսուրսների ճակատամարտն է, իրենց համակիրների։ Դրանով էլ չեն բավարարվելու, ընտրությունների ընթացքում երկու կողմից էլ հազարավոր խախտումներ են լինելու, հազարավոր խախտումների դեպքում անպայման միջադեպեր են լինելու տեղամասերում։ Դրանք կարող են արդեն անկառավարելի դառնալ», - ասաց նա, ըստ էության, հանիրավի հավասարության նշան դնելով երկու թիմերի միջեւ, ինչն, անշուշտ, պարզ մանիպուլացիա է, խառնակչություն: Ի վերջո, քաղաքացիական պատերազմ հրահրելու մեծ վարպետն ինքն է՝ Տեր-Պետրոսյանը եւ իր հոգեզավակ Նիկոլ Փաշինյանը, որից հիմա նա համառորեն փորձում է ձերբազատվել: Վկան Մարտի 1-ը:

Ըստ Տեր-Պետրոսյանի, Նիկոլ Փաշինյանն ու Ռոբերտ Քոչարյանը այսօր հանրությանը որևէ ծրագիր չեն ներկայացրել։ Սա արդեն մանիպուլացիայի գագաթնակետն է, ով ով, բայց Ռոբերտ Քոչարյանի ծրագրի վրա աշխատել են բարձրակարգ տասնյակ մասնագետներ եւ դրանք բաժիններով ներկայացվել է հանրությանը: Եթե անգամ Ռոբերտ Քոչարյանը ծրագիր չներկայացներ, նրա անցած ուղին եւ գործունեությունը վկայում է, որ պետության բացառիկ ղեկավարներից է, որի պաշտոնավարման տարիներին երկիր է կառուցվել, տնտեսական երկնիշ աճ ենք ունեցել, իսկ անվտանգության հարցը եղել է գրեթե անառիկ, ամենախաղաղը:
«Հիշեք, Ռոբերտ Քոչարյանը կամ Նիկոլ Փաշինյանը ինչ խոստումներ է տվել և որն է մինչև վերջ կատարել։ Էդպիսի բան չկա։ Գոյություն չունի Նրանք ասել են մի բան, արել են լրիվ ուրիշ բան»,- շարունակել է ՀԱԿ առաջնորդը - «Հիմա ընդամենը վրեժխնդրության հարց են լուծում։ Ռոբերտ Քոչարյանը չի էլ թաքցնում։ Ասում է՝ ես գալու եմ, մեկ-մեկ բոլորին պատժելու եմ․․․ Նույնիսկ իր շտաբների վրա ինչ-որ մի երկու հարձակում էր եղել, ասեց՝ իմացեք, բոլորիդ նկարել են, բոլորիդ էլ, հենց վարչապետ դառնամ, պատժելու եմ։ Նա ուրիշ բան չգիտի։ Ռոբերտ Քոչարյանը իր բնավորությամբ գիտե՞ք ինչպիսին է։ Եթե մանկապարտեզում մի երեխա պատահաբար իր ոտքը տրորել է, էդ երեխայից հետագայում ինքը հաստատ հաշիվ պահանջել է, պատժել է դրան։ Էդպիսի մարդ է»։

Ինչ ինչ, բայց հենց ինքը՝ առաջին նախագահն է, որ վրեժնդրության մաստեր-կլաս է ցուցադրել թե պաշտոնավարման տարիներին, թե դրանից հետո: Նրա ժամանակակիցներից բոլորը գիտեն, որ նա հատուկ նոթատետր ուներ եւ մի սեւ ցուցակ ու գիտեր երբ եւ ինչպես որեւէ մեկի նկատմամբ հաշվեհարդար լինել:
Թե ինչու ինքն ու Ռոբերտ Քոչարյանը մերժեցին Փաշինյանի բանավեճի հրավերը, առաջին նախագահը այսպես բացատրեց․ «Քոչարյանը իր ոճով, կամ իր էությամբ շատ հոյակապ պատասխան տվեց․ ասեց՝ ես Փաշինյանին ոչ թե բանավեճի, այլ մենամարտի եմ հրավիրում, ի դեպ՝ ցանկացած զինատեսակով։ Այսինքն՝ պարսատիկից մինչև ատոմային ռումբ․․․ Ես մերժեցի Փաշինյանին՝ ուղղակի խղճահարությունից ելնելով։ Խղճացի, որովհետև էդ բանավեճը կարող էր Նիկոլի համար ինքնասպանություն լիներ։ Էդ ես չեմ ասում, ինքն է ասել։ Ասել է 2009 թվականին՝ առաջին նախագահը մի ահավոր, շատ վատ խասյաթ ունի՝ ինքը վերջում միշտ ճիշտ է դուրս գալիս»:

Իհարկե, Փաշինյանի վերաբերյալ քննադատությանը կարելի ասել՝ <նո քոմենթ>, սա այն դեպքերից է, երբ հոգեւոր հայրն ամենալավն է ոչնչացնում ու տրորում իր ստեղծածին։ Իսկ Քոչարյանի հասցեին քննադատությունն էլ պետք է ըմբռնումով մոտենալ, Տեր-Պետրոսյանը, ինչպես դասական շարքային քաղաքական գործիչ, ով իր առջեւ խորհրդարան անցնելու խնդիր է դրել, հնարավոր եւ անհնարին բոլոր ճանապարհներն օգտագործում է ստեղծված մթնոլորտում դիվիդենտներ շահելու, եւ նախկիններին եւ գործողներին մերժելու ու երրորդ բեւեռ դառնալու համար:

Անի Սահակյան