Մոսկվայի համբերության բաժակը լցվեց. Ռուսական ապտակները՝ Փաշինյանին զրնգուն դարձան

ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ անդրադարձել էր հայ-ադրբեջանական սահմանին տիրող իրավիճակին, որի ժամանակ նշել էր, որ Ռուսաստանն ակտիվ միջնորդական ջանքեր է գործադրում Հայաստանի և Ադրբեջանի միջև հարաբերությունների կարգավորման և Հարավային Կովկասում իրավիճակի կարգավորման համար: «Ռուս խաղաղապահներն ապահովում են խաղաղությունն ու անվտանգությունը Լեռնային Ղարաբաղում:

Ռուսական կողմը ներգրավված է նաև հայ-ադրբեջանական սահմանին տեղի ունեցող միջադեպի կարգավորմանը` նպաստելով լարվածության նվազեցմանը: Կանոնավոր կապ ենք պահպանում Բաքվի և Երևանի հետ»,- ասել է Զախարովան:

Ապա` նա շարունակել է. «Ինչ վերաբերում է սահմանային իրավիճակին, այն անմիջական առնչություն չունի Լեռնային Ղարաբաղի խնդրին: Հիմնական պատճառը հայ-ադրբեջանական սահմանի միջազգային իրավական ձևակերպման բացակայությունն է, որը մնացել է դեռևս խորհրդային ժամանակներից: Ելնում ենք այն հանգամանքից, որ նման հարցերը պետք է լուծվեն բացառապես խաղաղ-բանակցային եղանակով: Որպես երկարաժամկետ լուծում` տեսնում ենք հայ-ադրբեջանական սահմանի սահմանազատումը` դրան հաջորդող սահմանագծմամբ: Ռուսաստանը պատրաստ է ամեն կերպ աջակցել դրան»,- հավելել է Զախարովան:

Ահա, և վերջ: Ոչ մի խոսք ադրբեջանցի զինվորականների՝ Հայաստանի տարածք ներխուժելու մասին: Ավելին՝ ՌԴ ԱԳՆ ներկայացուցիչը բաց տեքստով ասում է, որ «այդ միջադեպն անմիջական առնչություն չունի Լեռնային Ղարաբաղի խնդրի հետ»: Այսինքն, ստեղծվել է մի վիճակ, որ Հայաստանի տարածքում հայտնված Ադրբեջանական բանակը՝ ստիպվա՞ծ է եղել այդպես վարվել:

Այսպես, Ռուսաստանը բռնել է՝ խաղաղ բանակցություններով սահմաններ գծելու հորդորներին: Սա նշանակում է, որ Փաշինյանը Պուտինին խոսք է տվել ստորագրել փաստաթուղթ, իսկ այժմ նա հանդես է գալիս նոր առաջարկներով՝ ԵԱՀԿ ՄԽ-ի պետությունների դիտորդների մասնակցությամբ: Փաշինյանն այսօր նշել է. «Մենք առաջարկում ենք, որ ընդհանրապես այդ տարածքներից զինված ուժերի ստորաբաժանումները վերադառնան մշտական տեղակայման վայրեր: Դրա փոխարեն ենթադրվող սահմանագծի երկայնքով տեղակայվեն միջազգային դիտորդներ՝ Ռուսաստանը կամ ԵԱՀԿ Մինսկի խմբի համանախագահությունը ներկայացնող: Դիտորդների ներկայությունն այդ տարածաշրջանում անհրաժեշտ է, որպեսզի կողմերը համոզված լինեն, որ դիմացի կողմը պայմանավորվածությունը կատարում է, այսինքն՝ զորքեր չի մոտեցնում սահմանագծին»:

Ռուսաստանի պատասխանը բավական արագ ստացվեց... Այսպես, Ռուսաստանը կոչ արեց Հայաստանին և Ադրբեջանին սահմանային վեճերը լուծել խաղաղ ճանապարհով. «Ռուսաստանը պատրաստ է ապագայում ևս հնարավոր աջակցություն ցուցաբերել կողմերին այս հարցում», - կրկին նշեցին Ռուսաստանի ԱԳՆ-ից։

Փաշինյանին Մոսկվայից գրեթե ասացին՝ «առաջարկներդ քեզ պահիր» ու մի զբաղվիր դեմագոգիայով: Մի քանի օր առաջ Փաշինյանը հայտարարում էր, թե նոր եռակողմ փաստաթուղթը համարում է՝ «100 տոկոսով հայամետ», այսօր նա նոր առաջարկություններով է հանդես գալիս:

Արդյունքում՝ հրաժարական տվեց ՀՀ ԱԳ նախարարի պաշտոնակատար Արա Այվազյանը, ինչը վկայում է այն մասին, որ հետպատերազմյան իրավիճակում հայկական դիվանագիտությունն անգամ ի վիճակի չէ տանել Փաշինյանի անհեթեթ ներկայությունը ՀՀ իշխանության ղեկին:

Մետաքսյա Շալունց