Մի հուզիչ հրավերք Ալիևին Մոսկվայից. Օպերացիա՝ պոկել Ալիևին Էրդողանից
ՀԱՊԿ-ի դռները պետք է միշտ բաց լինեն բոլոր պետությունների, այդ թվում՝ Ադրբեջանի համար, «Իզվեստիա»-ի փոխանցմամբ, երեկ հայտարարել է Ռուսաստանի փոխարտգործնախարար Անդրեյ Ռուդենկոն՝ նշելով մի դետալ, որն այսօր խանգարում է Ադրբեջանի անդամակցությանը ՀԱՊԿ-ին։
Ընդգծելով, որ կազմակերպության կանոնադրության որոշ կետեր ենթադրում են դիվանագիտական հարաբերություններ մասնակից երկրների միջև՝ նա շեշտել է՝ պաշտոնական Բաքվի և Երևանի միջև նման համագործակցություն չկա։ «Հենց որ դրանք հաստատվեն, իսկ մենք հույս ունենք, որ վաղ թե ուշ դա տեղի կունենա, այդ ժամանակ հարցը հնարավոր կլինի դնել գործնական մակարդակի վրա», - ասել է Ռուսաստանի փոխարտգործնախարարը։
Տարիներ շարունակ Մոսկվան «աչքերը ջուր կտրած» սպասում է Ադրբեջանի հնարավոր անդամակցությանը թե՛ Եվրասիական տնտեսական միությանը, թե՛ Հավաքական անվտանգության պայմանագրի կազմակերպությանը: Դրա մասին խոսում են ռուսական տարբեր հարթակներում, ընդ որում՝ ամենաբարձր մակարդակով:
Բայց Բաքվից մշտապես ի պատասխան հնչել են սառը հայտարարություններ, որոնք այսպես ասած՝ դիվանագիտորեն հարցից շրջանցելու, հեռանալու միտում են ունեցել:
Հիմա, փաստորեն, քննարկումներն առավել ակտիվ են դարձել ղարաբաղյան պատերազմից հետո։ Ավելին՝ արդեն կա որոշակի զգուշավոր գործընթաց ԵԱՏՄ-ի շրջանակներում։
Ղազախստանը ադրբեջանական կողմին հրավիրեց մասնակցելու ԵԱՏՄ երկրների միջկառավարական խորհրդի վերջերս կայացած նիստին։ Երևանը դեմ էր, և քանի որ կոնսենսուս չեղավ, ադրբեջանական պատվիրակությունը չժամանեց Կազան, թեև պատրաստ էր ժամանել հյուրի կարգավիճակով:
Եթե դեպի ԵԱՏՄ-ի անդամակցության հնարավորության դեպքում որոշակի զգուշավոր կա Բաքվի կողմից, նրանք գերադասում են անորոշ պատասխաններ տալ, ապա ՀԱՊԿ-ի մասին Ադրբեջանի իշխանություններն ընդհանրապես չեն խոսում։
Հայաստանը ռազմաքաղաքական դաշինքի մեջ է Ռուսաստանի հետ ՀԱՊԿ-ում, իսկ Ադրբեջանը, գոնե անցյալ տարվա պատերազմի համատեքստում, Թուրքիայի աջակցությամբ ցույց տվեց, թե ով է նրա դաշնակիցը: Ադրբեջանի հիմնական ռազմաքաղաքական դաշնակիցը ՆԱՏՕ-ի անդամ Թուրքիան է։
Հայաստանն, իհարկե, Ռուսաստանի դաշնակիցն է, սակայն, վերջին զարգացումները ցույց են տալիս, որ Ադրբեջանը Ռուսաստանի համար պակաս կարևոր չէ, ավելին՝ թվում է, թե Ադրբեջանն ավելի մեծ արժեք է ներկայացնում իրենից Մոսկվայի համար:
Այլապես ինչպե՞ս բացատրեց ՌԴ փոխարտգործնախարարի հրավերքն Ադրբեջանին՝ ՀԱՊԿ:
Բայց մեծ հարցական է, թե Ալիևին պե՞տք է ՀԱՊԿ-ին անդամակցություն, նա առանց այն էլ ՀԱՊԿ-ականների հետ առանձին-առանձին ունի հրաշալի հարաբերություններ:
Հետևաբար՝ արժե՞ արևմուտքին զայրացնել ու անդամակցել ՀԱՊԿ-ին...
Ըստ ամենայնի, Ալիևը դիվանագիտորեն «կցրի» ՀԱՊԿ-ի թեման: Ինչի՞ն է պետք՝ ՀԱՊԿ-ին անդամակցությունը: Ադրբեջանը գերազանց, այդ թվում՝ ռազմատեխնիկական հարաբերութուններ ունի ՀԱՊԿ անդամ Ռուսաստանի, Բելառուսի հետ, իսկ ՀԱՊԿ անդամ վեց երկրներից երկուսը՝ Ղազախստանը և Ղրղըզստանը Ադրբեջանի հետ անդամակցում են թյուրքալեզու պետությունների կազմակերպությունում, և ունեն եղբայրական հարաբերություններ։
Եվ հետո՝ եթե անգամ Հայաստան-Ադրբեջան դիվանագիտական հարաբերություններ հաստատվեն՝ Մոսկվան համարում է, որ Ալիևը կցանկանա՞ ՀԱՊԿ-ին անդամակցել:
Իսկ ընդհանուր առմամբ, զարմանալի է Մոսկվայի ձգտումը՝ Ալիևին դեպի իր կողմ քաշել: Կրեմլում այդքան միամի՞տ են, որ կարծում են, որ Ալիևին կկարողանան կտրել Էրդողանից...
Մետաքսյա Շալունց
Հետևեք մեզ Viber-ում
