«Սուրբ Գրիգոր Լուսավորիչ» ԲԿ-ի նկուղում տղամարդու դի է հայտնաբերվել
Երևանի «Սուրբ Գրիգոր Լուսավորիչ» բժշկական կենտրոնի նկուղում տղամարդու դի է հայտնաբերվել։ Մահացած հայտնաբերված 57-ամյա տղամարդը հիվանդանոց էր ընդունվել դեպքի նախորդ օրը: Բուժհաստատության գլխավոր տնօրենի տեղակալ Գագիկ Մանուկյանը Armtimes-ի հետ զրույցում ասել է, որ նա հիվանդանոց էր դիմել շնչառական խանգարումներով: «Պառկած էր բաժանմունքում: Առավոտյան տեսել ենք անկողնում չէ, սկսել ենք փնտրել: Մի քանի ժամ հետո հայտնաբերեցինք, որ իջել է նկուղ»,- տեղեկացրեց փոխտնօրենը: Հիվանդանոցը տեսահսկվում է: Կորած տղամարդուն փնտրելիս տեսագրությունների միջոցով պարզել են, որ նա բաժանմունքից դուրս է եկել, բայց շենքից` չէ: Հարցուփորձ անելով պարզել են նաև, որ նրան տեսել են նկուղ իջնելիս: «Նկուղներում փնտրեցինք, գտանք: Նրա մոտ եղել է մեծ, սուր ինֆարկտ, թոքը` քայքայված: Այդքան ծանր հիվանդ էր: Եթե նույնիսկ բաժանմունքում մնար, անկողնու մեջ կմահանար»,- հայտնեց Գագիկ Մանուկյանը:
Հիվանդը բաժանմունքից դուրս է եկել առավոտյան ժամը 8-ի սահմաններում: Դին հայտնաբերվել է մի քանի ժամ անց: Ոստիկանության տեղեկատվության համաձայն` դիակի վրա նախնական զննությամբ, բռնության հետքեր չեն հայտնաբերվել:
Հետևեք մեզ Viber-ում
