Հայաստանն ու Պուտինը տարբեր լեզուներով են խոսում
Մեկ շաբաթ է Հայաստանի տարածք է ներխուժել ադրբեջանական բանակը, պաշտոնական Երևանը դիմել է թե՛ ՀԱՊԿ-ին, թե՛ Ռուսաստանին: Ուղիղ մեկ շաբաթ հետևելուց հետո ՀԱՊԿ-ից հնչեց, մեղմ ասած՝ մի ծիծաղելի հայտարարություն:
ՀԱՊԿ-ն, պարզվում է, ուշադիր հետևում է Հայաստանի Սյունիքի մարզում իրավիճակի զարգացմանը, հայտարարել է կազմակերպության գլխավոր քարտուղար Ստանիսլավ Զասը՝ Դուշանբեում ՀԱՊԿ արտգործնախարարների խորհրդի նիստից հետո: «Նշում ենք, որ 2020 թ. նոյեմբերի 10-ի եռակողմ համաձայնագրերի իրագործումն այլընտրանք չունի», - ասել է Զասն` ընդգծելով, որ ՀԱՊԿ-ն աջակցում է հայկական և ադրբեջանական կողմերի բանակցություններին Ռուսաստանի միջնորդությամբ: Նա նաև հավելել է, որ իրավիճակի բարելավմանը նպաստել է ռուսական խաղաղապահ զորախմբի մուտքը ղարաբաղյան հակամարտության գոտի: «Մենք այնտեղ տեսնում ենք երկարաժամկետ խաղաղություն հաստատելու հեռանկար: Նրանք այլևս չեն կրակում: Բայց իրավիճակը դեռ լարված է», - ասել է Զասը:
Իհարկե, վաղուց պարզ էր, որ ՀԱՊԿ-ն անարդյունավետ դաշինք է, բայց որ այսպիսի անմեղսունակություն կցուցաբերի՝ արդեն իսկապես զավեշտի ժանրից է:
Գրեթե նույն՝ անկյուն քշվածի տպավորություն է թողնում նաև Ռուսաստանը: Ահա ինչ է այսօր հայտարարել Լավրովը...
Ռուսաստանն առաջարկել է միջնորդ դառնալ Հայաստանի և Ադրբեջանի միջև սահմանազատման քննարկումներում. «Ըստ կողմերի միջև նախնական պայմանավորվածության՝ Ռուսաստանի Դաշնությունն առաջարկել է աջակցություն ցուցաբերել սահմանների սահմանազատման և սահմանագծման մեկնարկում և ընթացքում»: Լավրովի խոսքով՝ Մոսկվան հանդես կգա որպես այդ հարցերի լուծման համար ստեղծվելիք հայ-ադրբեջանական հատուկ հանձնաժողովի խորհրդատու: Լավրովը նաև նշել է, որ մայիսի 18-ին ոչ պաշտոնական ռեժիմով իր աշխատանքներն են սկսել ՀԱՊԿ արտգործնախարարները: «Եվ երեկոյան կազմակերպված հանդիպման ընթացքում մենք ուսումնասիրել ենք են մեր հայ գործընկերների խնդրանքը: Ըստ այդ խնդրանքի՝ մենք քննարկել են Երևանի և Բաքվի հարաբերություններում ստեղծված իրավիճակը»,- ասել է Լավրովը:
Եվ ի՞նչ... Մուրադովը մեկ շաբաթ է, ինչ բանակցությունների է մասնակցում, ավելի ճիշտ կլինի ասել՝ բանակցություններ է կազմակերպում, բայց ՌԴ ԱԳՆ-ն, կարծես, դրանից անտեղյակ նորից հայտարարում է, թե ՌԴ-ն առաջարկել է աջակցություն ցուցաբերել սահմանների սահմանազատման և սահմանագծման մեկնարկում և ընթացքում:
Որ Մոսկվան ցանկանում է եռակող ևս մեկ բանակցությունների հարթակ՝ դա հասկացանք: Իսկ ի՞նչ անել ադրբեջանական ներխուժման հետ, դրան որևէ կերպ Ռուսաստանն ու ՀԱՊԿ-ն հարկ չե՞ն համարում արձագանքել:
Սա՞ է Մոսկվայի պատասխանը Հայաստանի դիմումներին ի պատասխան՝ եկեք սահմաններ որոշենք՝ Հայաստանի տարածք ադրբեջանական բանակի ներխուժման պայմաններո՞ւմ...
Մետաքսյա Շալունց
Հետևեք մեզ Viber-ում
