Հովիվի բացահայտած ադրբեջանական ներխուժում. Մոսկվան «դժվարանում է», 5 օր պարզ է, որ ոչինչ պարզ չէ

Մի քանի օր է, ինչ հայ հասարակությունը հետևում է մամուլի հրապարակումներին, որպեսզի հասկանան, թե ինչ է կատարվում Հայաստանի սահմաններից ներս: Սյունիքի մարզում ավարտվել են ադրբեջանական կողմի հետ բանակցությունները, Գորիս համայնքի ղեկավարի տեղակալ Մենուա Հովսեփյանը մամուլին հայտնել է, թե այլ մանրամասներ այս պահին չի կարող փոխանցել:

Մի քանի օր է, որ բանակցություններ են ընթանում ռուսական խաղաղապահ զորքերի հրամանատար Ռուստամ Մուրադովի գլխավորությամբ: Այս պահի դրությամբ, սակայն դիրքերում փոփոխություններ չեն եղել, սակայն նախնական տեղեկություններով որոշում է կայացվել, որ ադրբեջանական զորքերը պետք է նահանջեն:

Հիշեցնենք, որ ՀՀ ՊՆ մամուլի ծառայությունը հայտնեց, որ մայիսի 12-ի առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Հավելենք՝ ՀՀ ՊՆ-ն հայտնել էր, որ գիշերը ադրբեջանական կողմը փորձել է թիկունքային ապահովման որոշակի աշխատանքներ իրականացնել, ինչը կանխվել է հայկական ստորաբաժանումների կողմից:

Գիշերը հայտնի դարձավ ԱՄՆ պետքարտուղար Էնթոնի Բլինքենը հեռախոսազրույց է ունեցել Ֆրանսիայի արտգործնախարար Ժան-Իվ Լը Դղիանի հետ, որի ընթացքում, ի թիվս այլ հարցերի, քննարկել է նաև Արցախում ստեղծված իրավիճակը: «Պետքարտուղար Բլինքենը և արտգործնախարար Լե Դղիանը նաև խոսել են իրենց՝ որպես ԵԱՀԿ Մինսկի խմբի համանախագահ երկրներ գործակցության մասին և ընդգծել Լեռնային Ղարաբաղի հակամարտությունում երկարաժամկետ քաղաքական կարգավորման անհրաժեշտությունը»,- ասվում է Պետդեպի տարածած հաղորդագրության մեջ:

Ադրբեջանի և Ֆրանսիայի արտգործնախարար Ջեյհուն Բայրամովը և Ժան-Իվ Լը Դղիանը հեռախոսազրույցում քննարկել են հայ-ադրբեջանական սահմանին առաջ եկած լարվածությունը: Ըստ Ադրբեջանի ԱԳՆ հաղորդագրության. «Նախարար Ջեյհուն Բայրամովը զրուցակցին տեղեկացրել է երկար ժամանակ հետո մեր երկրին պատկանող ադրբեջանական դիրքերին սահմանակցող Հայաստանի սահմանին ամրապնդման աշխատանքների իրականացման մասին»: Բայրամովը նաև ասել է, թե ադրբեջանական կողմը «կառուցողական մոտեցում» է ցուցաբերում կողմերի միջև տարաձայնությունները լուծելու համար, և որ «անթույլատրելի է ուռճացնել և քաղաքականացնել սահմանային լարվածության հարցը»: Նշվում է, որ զրույցը նախաձեռնել է ֆրանսիական կողմը:
Հայաստանի տարածք ադրբեջանական ներխուժումից ժամեր անց Ֆրանսիայի նախագահի արձանագրումը, որ Ֆրանսիան կարող է նախաձեռնել ՄԱԿ-ի ԱԽ-ում ՀՀ տարածքային ամբողջականության թեմայով քննարկում, բավական զարմանալիորեն ձգվում է՝ Մուրադովի մասնակցությամբ բանակցություններով:

Ի՞նչ է ասում պաշտոնական Մոսկվան... Ռուսաստանի նախագահ Վլադիմիր Պուտինը համոզված է, որ Լեռնային Ղարաբաղի վերաբերյալ եռակողմ համաձայնագրերի իրագործումն այլընտրանք չունի, ասել է Ռուսաստանի նախագահի մամուլի քարտուղար Դմիտրի Պեսկովը. «Նախագահը կողմնակից է եռակողմ համաձայնագրերի իրագործմանը ոչ մի այլընտրանքի, և այժմ ակտիվ ջանքեր են գործադրվում՝ լարվածությունը թուլացնելու և սահմանին իրավիճակը շտկելու համար»:

Պեսկովը դժվարացել է պատասխանել այն հարցին, թե Պուտինը ստացե՞լ է նամակը Հայաստանի վարչապետ Նիկոլ Փաշինյանից՝ ռազմական օգնության խնդրանքով: Նա նշել է, որ «բոլոր խնդիրները բազմիցս քննարկվել են երկկողմ շփումների ընթացքում»: Կրեմլի խոսնակը հավելել է, որ Ռուսաստանը մշտական կապի մեջ է Ադրբեջանի ու Հայաստանի հետ`Լեռնային Ղարաբաղում իրավիճակի կարգավորման հարցի շուրջ:

Այսինքն, արդեն մի քանի օր է, ինչ Հայաստանը պաշտոնապես դիմել է ՀԱՊԿ-ին ու Ռուսաստանին, իսկ Պեսկովը դժվարանում է ասել, թե արդյոք ՌԴ նախագահը ստացել է նման դիմում, թե՞ ոչ: Այսինքին, ինչն է այս՝ ժամանակն անվերջ «ծամելու» պատճառը: Մինչև ընտրությունների ավարտը արագ թուրք-ադրբեջանական դաշինքի սպասելիքները բավարարե՞լը:

Այսինքն, երկրի ներսում հայտնվում են ադրբեջանական ստորաբաժանումներ, որոնց հայ հովիվ է հայտնաբերում, ու 250 ադրբեջանցի նստում է մի քանի օր մեր պետության ներսում, թելադրում պահանջներ, բանակցությունների օրակարգ թելադրում, Հայաստանում չկա իշխանություն, մեր պետության անունից Մուրադովն է բանակցում, իսկ Պուտինը Պեսկովի միջոցով ասում է՝ արագացրեք, տվեք Ադրբեջանին այն, ինչ խոստացել եք, դիմում-նամակների ժամանակը չէ:

Իսկ մեր երկրում մի քանի օրվա մեջ մի քանի անգամ Փաշինյանն Անվտանգության խորհրդի նիստ է անցկացնում, որից պարզ է դառնում, որ ոչինչ պարզ չէ, որ որևէ արդյունք չկա, ընդհակառակը՝ վատ սցենարը չի բացառվում, այսինքն` նոր պատերազմ արդեն Հայաստանի տարածքում:

Մետաքսյա Շալունց