Փաշինյանի թիմը նոր պատերազմ կանխատեսեց, իսկ Կրեմլը մեզ հետ չէ

Ադրբեջանական զորքը շարունակում է մնալ Հայաստանի պետական սահմանի ներսում՝ Սյունիքի և Գեղարքունիքի հատվածներում, hաղորդում է Պաշտպանության նախարարությունը: Երեկ ՀՀ-ն, փաստորեն, դիմեց ՀԱՊԿ-ին, ՀՀ սահմանների սպառնալիքի փաստերի առիթով:

Այսօր, սակայն ՌԴ նախագահի խոսնակն, ըստ էության, ասել է, որ Փաշինյանը Պուտինի հետ հեռախոսազրույցի ընթացքում օգնություն չի խնդրել Սյունիքի մարզում տիրող իրավիճակի հետ կապված:

ՌԴ նախագահի մամուլի քարտուղար Դմիտրի Պեսկովը հարցին, թե Հայաստանի վարչապետի պաշտոնակատարը հեռախոսազրույցի ընթացքում օգնություն խնդրե՞լ է, և արդյոք խոսքը Ռուսաստանի Դաշնության հետ ռազմական համագործակցության ընդլայնման մասին էր, Պեսկովն ասել է. «Ո՛չ, Փաշինյանը օգնություն չի խնդրել: Նա ծայրաստիճան անհանգստություն է հայտնել սահմանին տիրող իրավիճակի կապակցությամբ, և այդ մտահոգությունը կիսել է նաև նախագահ Պուտինը, որն ընդգծել է եռակողմ համաձայնագրի բոլոր դրույթների կատարման անհրաժեշտությունը, առաջին հերթին՝ հրադադարի ռեժիմի դրույթը»:

Երեկ Փաշինյանն ու Պուտինը հեռախոսազրույց են ունեցել, քննարկել իրավիճակը հայ-ադրբեջանական սահմանին: Երկու կողմերի պաշտոնական հաղորդագրություններում տարբերություններ կան։

Հայաստանի ու Ռուսաստանի առաջնորդները երեկ հեռախոսազրույց են ունեցել հայ-ադրբեջանական սահմանին ստեղծված իրադրության շուրջ՝ վարչապետի պաշտոնակատար Նիկոլ Փաշինյանի նախաձեռնությամբ։ Ըստ պաշտոնական Երևանի, Նիկոլ Փաշինյանը Ռուսաստանի նախագահին տեղեկացրել է Ադրբեջանի զինված ուժերի կողմից Հայաստանի սուվերեն տարածք՝ Սյունիքի մարզ ներխուժման հետևանքով ստեղծված իրավիճակի, ինչպես նաև ՀԱՊԿ-ին դիմելու իր հանձնարարականի մասին։
Նախագահ Պուտինը, ըստ հայկական կողմի, «անթույլատրելի է համարել հետագա էսկալացիան», և համակարծիք եղել հայկական կողմի հետ, որ «այս իրավիճակի լուծումը պետք է արտահայտվի ադրբեջանական զորքերի՝ ելման դիրքեր հետ վերադարձով»։ Պաշտոնական Կրեմլի տարածած հաղորդագրության մեջ, սակայն, այս մասին որևէ բառ չի ասվում։ Ըստ Ռուսաստանի նախագահական նստավայրի, «Վլադիմիր Պուտինը ընդգծել է Հայաստանի, Ադրբեջանի և Ռուսաստանի առաջնորդների միջև նոյեմբերի 9-ին ու հունվարի 11-ին ձեռք բերված բոլոր պայմանավորվածությունների խիստ կատարման անհրաժեշտությունը, նախ և առաջ՝ հրադադարի պահպանման մասով։

Ռուսական կողմը, ըստ Կրեմլի, հաստատել է նաև ակտիվ միջնորդական ջանքերը շարունակելու պատրաստակամությունը, և Երևանի ու Բաքվի միջև սերտ կապերի պահպանումը՝ հանուն տարածաշրջանի կայունության ապահովման։

«Նիկոլ Փաշինյանը երախտագիտություն է հայտնել Ռուսաստանի նախագահին, կողմ է արտահայտվել կառուցողական երկխոսությանը և փոխգործակցությանը, որպեսզի ծագող բոլոր խնդիրները լուծվեն դիվանագիտական ճանապարհով։ Անդրադարձ է եղել նաև Հարավային Կովկասում տնտեսական ու տրանսպորտա-լոգիստիկ միջոցների վերականգնման հարցերին», - հաղորդում է Կրեմլը։

Նկատենք, որ Պուտին-Փաշինյան զրույցը կայացել է հայկական կողմի նախաձեռնությամբ։

Երեկվանից պարզ է, որ սկսվել է պրոցես՝ ՀՀ-ի կողմից ՀԱՊԿ-ին դիմելու գործընթաց: ՀԱՊԿ գլխավոր քարտուղարն այսօր հեռախոսազրույց է ունեցել ՀՀ պաշտպանության նախարարի պաշտոնակատար Վաղարշակ Հարությունյանի հետ` Սյունիքում ստեղծված իրավիճակի շուրջ։

Տիգրան Ավինյանը Գորիս այցի ընթացքում հայտարարել է, որ պետք է պատրաստ լինենք նաև հնարավոր վատ զարգացումներին։ Միաժամանակ նա տեղեկացրել է, որ Հայաստանն արդեն պաշտոնապես դիմել է ՀԱՊԿ-ին` ստեղծված իրավիճակով պայմանավորված, թեև ՀԱՊԿ-ից դեռ ասում էին, թե չեն ստացել: Դժվար է ասել, թե ինչպիսին կլինի ՀԱՊԿ-ի արձագանքը: Այն կարող է լինել՝ ստանդարտ, ոչինչ չասող: Սպասել, որ ՀԱՊԿ-ն կարող է միջամտել, թերևս ֆանտաստիկայի ժանրից կլինի: Սակայն, Հայաստանը որպես դաշնակից՝ դիմել է ՀԱՊԿ-ին, հիմա ՀԱՊԿ-ի հերթն է, ավելի ճիշտ՝ Ռուսաստանի:

44-օրյա պատերազմի օրերին ռուսաստանցի մեդիադաշտի հեղինակավոր անձիք անգիր արած մի բան էին կրկնում, շատ էին մեղադրում Հայաստանին, թե Հայաստանը չի դիմել ՀԱՊԿ-ին ու Ռուսաստանին օգնության համար.. Դե, հիմա դիմեց, տեսնենք՝ ինչպես եք օգնելու Հայաստանին: Ադրբեջանի կողմի՞ց եք, թե՞ դաշնակից Հայաստանի...
Արդեն 2 օր է ռուսական կողմի գործողությունները հիմք են տալիս եզրակացնելու՝ Մոսկվան անգամ հիմա ՀՀ սահմանների ներսում որեւէ էական հակազդման քայլի չի դիմելու ադրբեջանական ակնհայտ սադրանքներին ի պատասխան:

Ու այստեղ արժե մի հարց էլ Փաշինյանին տալ՝ վատ կլինե՞ր, որ հիմա ՀԱՊԿ-ում Յուրի Խաչատուրով ունենայինք...

Մետաքսյա Շալունց