ՀՅԴ-ն որոշել է լրիվ «ձեռքերը լվանալ» Անդրանիկ Կարապետյանից

«Իրավունքը» գրում է. Նախորդ շաբաթ խորհրդարանում Հակակոռուպցիոն մարմնի ստեղծման մասին հարցի քննարկման ժամանակ ՀՅԴ-ական նորընտիր պատգամավոր Անդրանիկ Կարապետյանի մտքի «գոհարներն» այն մասին, թե այն հայերիս հարիր չէ և նման է «գործ տալու» ինստիտուտին», բավական լայն արձագանք էր գտել։ Ուշագրավ էր այն, որ վերոնշյալի մասին ՀՅԴ-ական կարկառուն ներկայացուցիչները բավական չեզոք մեկնաբանություններ էին տվել՝ նաև ակնարկելով, որ Ա. Կարապետյանը կուսակցական չէ և ընտրվել է վարկանիշային ընտրակարգով։ Բայց պարզվում է՝ ՀՅԴ-ն միայն այսքանով չի սահմանափակվել և որոշել է լրիվ «ձեռքերը լվանալ» Ա. Կարապետյանից։ «Իրավունքը» երեկ խորհրդարանում նկատել է, որ Ա. Կարապետյանի աշխատասենյակը ոչ թե ՀՅԴ-ական պատգամավորների շարքում է, այլ ճիշտ հակառակ ուղղությամբ։ Հարազատ խմբակցության պատգամավորների փոխարեն, երիտասարդ պատգամավորի աշխատասենյակը հայտնվել է ԱԺ ՀՀԿ խմբակցության պատգամավոր, գեներալ Սեյրան Սարոյանի և Ծառուկյան դաշինք խորհրդարանական խմբակցության պատգամավոր Նապոլեոն Ազիզյանի աշխատասենյակների արանքում։ «Համաձայնեք, որ թեպետ երիտասարդ պատգամավորը զրկվել է ՀՅԴ-ական ընկերակցությունից, բայց լիովին իրեն ապահովագրել է, քանի որ հարևանությամբ «գործ տվողներ» հաստատ չեն լինի», - մեկնաբանել է թերթը: