Գեւ ջանը վերադարձել է… լույս աշխարհ է եկել զոհված զինծառայողի եղբայրը (լուսանկար)

2016 թվականի օգոստոսի 2-ին ԼՂՀ պաշտպանության բանակի զորամասերից մեկում ականի պայթյունից զոհված կրտսեր սերժանտ Գեւորգ Հարությունյանի մայրը՝ Անահիտ Վանյանը, դարձյալ մայրացել է: Մոտ մեկ տարի առաջ տիկին Անահիտը կորցրեց իր միակ որդուն՝ Գեւորգին: Երկու օր առաջ լույս աշխարհ եկավ Անահիտ Վանյանի որդին, ում կոչել է նույն անունով` Գեւորգ Հարությունյան: Անահիտ Վանյանի հետ Araratnews.am-ի առաջին զրույցը տեղի էր ունեցել այս տարվա ապրիլի 19-ին: Տիկին Անահիտը պատմել էր, որ Գեւորգի ծննդյան օրը վատ էր զգացել, հիվանդանոցում պարզվել էր, որ հղի է: Մայրական կրծքի տակ նոր կյանք էր ձեւավորվում: Այսօր արդեն տիկին Անահիտը դարձյալ գրկում է իր Գեւորգին՝ Գեւին: Նորածինը լույս աշխարհ է եկել հունիսի 11-ին՝ 2 կգ քաշով: «Հիմա նորմալ է երեխեն: Զոհված տղայիս անունն եմ դրել, իրա մի տարին դեռ չի լրացել, որոշեցի Գեւորգ Հարությունյան դնել, որ մեր տան մեջ ինքը միշտ լինի ու մեր հետ մշտապես ապրի»,- պատմեց մայրը, հավելելով, որ նորածինը նման է  ավագ որդուն՝ Գեւորգին: «Գծագիր է, որ արդեն մի քիչ դիմագծերը փոխվել են, ավելի է Գեւորգիս նմանվել, քաշով քիչ է ծնվել, բայց հայացքը որ նայում եմ, ոնց որ Գեւորգս այնտեղ պառկած լինի»,- ասաց տիկին Անահիտը: Հետո ուրախությունն ու հուզմունքը խեղդում են: Նշում է` մտովի պատկերացնում է, որ Գեւորգը  տանը շրջում է: «Երազանքս է, որ ինքը տանը լիներ, իրա ախպորը դիմավորեր, իրա թագավոր ախպորը, իրա սիրած ախպերն է: Մտածում էի` աչքերս բացեմ, տղես ծաղկեփնջով գալիս է, մորը դիմավորում, ասում է` աչքերս լույս, ախպերս լույս աշխարհ էկավ…  էն էլ` աչքերս բացեցի, տեսա մենակ փոքր Գեւորս էր… Բերեցին ասեցին` Ան ջան, աչքդ լույս, տղեդ ծնվեց` երկրորդ Գեւորգը: Ուրախ բալիկ լինի, առողջ, Գեւորգիս կիսատ թողած գործերն էլ ինքը շարունակի»,- ասաց Անահիտ Վանյանը: Նա, ինչպես խոստացել էր, Գեւորգի անավարտ գործերն է շարունակում եւ ավարտին հասցնում: Դեռ ծառայության տարիներին Գեւորգ Հարությունյանը խոստացել էր, որ տունը վերանորոգելու է: Մայրն ասում է` որդու երազանքը ինքն է կատարել: Վերանորոգված տանն ապրելու է դարձյալ Գեւորգ Հարությունյանի հետ: «Բնականաբար, Գեւորգիս գծերով պիտի գնա, ոնց Գեւս է եղել, հումորով, ուրախ, ժպտերես, ընկերասեր: Որ նայում եմ վիդեոները, ասում եմ` մի՞թե էս ամեն ինչը հիշողություն է…»- ասաց տիկին Անահիտը: Մի քանի օրից տիկին Անահիտը հիվանդանոցից դուրս կգրվի: Նա իր Գեւորգի հետ կվերադառնա տուն: Նորածին Գեւորգը մեծանալու է նույն այն սենյակում, որտեղ իր մանկությունն է անցկացրել ավագ եղբայրը, ով զոհվեց հանուն հայրենիքի: Նրա աչքի առաջ հերոս եղբոր լուսանկարներն են: Հարությունյանների ընտանիքից Գեւորգն այլեւս երբեք չի բացակայելու: «Գեւ ջանը վերադարձել է…»- եզրափակում է տիկին Անահիտը: Araratnews.am