Ինչու է իշխանությունը որոշել զավթել ԵՊՀ-ն

Օրեր առաջ կառավարությունը հաստատել է պետական բարձրագույն ուսումնական հաստատությունների կառավարման խորհուրդների ձեւավորման կարգը փոփոխելու վերաբերյալ նախագիծը, ըստ որի կառավարման խորհուրդների անդամների թիվը հասցվել է 20-ի, որից 55%-ին կնշանակի կառավարությունը, ԿԳՄՍՆ-ն՝ 10%, բուհի պրոֆեսորադասախոսական կազմը՝ 10%, ուսանողական կազմը՝ 25%։
Հիշեցնենք, որ Բարձրագույն կրթության եւ գիտության մասին օրենքի ընդարձակ փաթեթը, որում նաեւ վերոնշյալ առաջարկն է, այժմ գտնվում է Սահմանադրական դատարանում, նախագահ Արմեն Սարգսյանն է վիճարկում դրա սահմանադրականության հարցը: Սակայն դա չի խանգարում իշխանություններին, որ առանձին նախաձեռնությամբ հանդես գան:
Այս փոփոխության անհրաժեշտությունը, ըստ նախագծի հիմնավորման, պայմանավորված է բուհական համակարգի կառավարման արդյունավետության բարձրացմամբ եւ բարձրագույն կրթության բնագավառում իրականացվող բարեփոխումներով: Իրականում պարզ է, որ իշխանությունն ամեն գնով որոշել է ոչնչացնել բուհերի ինքնավարությունն ու կառավարելի դարձնել:
2018 թ.-ին բուհերի քաղաքականացված լինելը քննադատող Նիկոլ Փաշինյանի կառավարությունը այս որոշումն ըստ տեղեկությունների ընդունել է նախեւառաջ ԵՊՀ-ի համար:

Կառավարության համամասնությունը հոգաբարձուների խորհրդում 50%-ից դարձնելով 65՝ իշխանությունը ԵՊՀ ռեկտոր ընտրելու և կառավարման մյուս հարցերը որոշելու է հենց ինքը:
Ավելի վաղ, Նիկոլ Փաշինյանի հրահանգով լուծարվեց ԵՊՀ խորհրդի կազմը՝ տապալելու համար ԵՊՀ ռեկտորի ընտրությունը: Շուրջ 2 տարի առաջ՝ Արամ Սիմոնյանի պաշտոնանկությունից հետո, ԵՊՀ բարեփոխում խոստացող իշխանությունը շարունակում է քանդել մայր բուհը:
Այս նոր կարգն ընդունելուց հետո կձեւավորեն իրենց ուզած հոգաբարձուների խորհուրդը եւ ցանկալի թեկնածուին ռեկտոր կդարձնեն, իսկ երբ ՍԴ-ն այս դրույթը հակասահմանադրական ճանաչի, այն հետադարձ ուժ չի ունենա։

Իսկ դա անում են մինչեւ ընտրությունները, որպեսզի ի դեմս ԵՊՀ- իշխանությունը հավելյալ ռեսուրս ունենա ընտրություններին իր վերարտադրության համար:

Անի Սահակյան