Ալիևը բացեց կապիտուլյացիայի նոր ճակատ․ Նիկոլի ծպտունը դուրս չի գալիս

Ադրբեջանի նախագահ Իլհամ Ալիևը երեկ Հայաստանի տարածքների նկատմամբ հերթական հոխորտանքներով է հանդես եկել։ Նա ոչ ավել, ոչ պակաս հայտարարել է, որ Զանգեզուրի միջանցքի ստեղծումը լիովին համապատասխանում է Ադրբեջանի ազգային, պատմական և ապագայի շահերին: «Մենք կիրագործենք Զանգեզուրի միջանցքի ստեղծման առաջադրանքը, ցանկանա դա Հայաստանը, թե ոչ: Եթե Հայաստանը ցանկանա, դա հեշտ կարելի է լուծել, եթե չցանկանա, մենք դա ուժով կլուծենք»,- ասել է Ալիևը AzTV հեռուստաալիքին տված հարցազրույցում:

Ալիևը հավելել է նաև, թե «101 տարի անց ադրբեջանցի ժողովուրդը կվերադառնա Զանգեզուր»: Բացի այդ, Ալիևը նշել է, որ «Բաքուն չի կարող թույլ տալ Հայաստանին իր բանակը հասցնել այնպիսի վիճակի, որով այն կարողանա սպառնալ Ադրբեջանին»:
Ալիևին գրեթե կես տարի համարժեք չարձագանքելու հետևանքներն ավելի ցցուն են դառնում։ Թե միջազգային հանրության, թե Հայաստանի իշխանության ոչ համարժեք պահվածքը ստեղծել է մի իրավիճակ, երբ Ադրբեջանի նախագահը դառնում է ավելի ու ավելի սանձարձակ։

Ի՞նչ եք կարծում, երեկվանից Սյունիքի մարզ մեկնած Փաշինյանը կարո՞ղ էր գոնե մեկ անգամ վերջապես Ալիևին հենց Սյունիքից արձագանքել․․․ Ոչ, նա շարունակում է իր գիծը՝ Ադրբեջանի նախագահի ֆաշիստական հայտարարություններին։

Երեկ պաշտոնական Երևանն արձագանքել է Ալիևի՝ «101 տարի անց Զանգեզուր վերադառնալու» և ուժի կիրառման մասին հայտարարությանը ՀՀ ԱԳՆ մամլո խոսնակ Աննա Նաղդալյանի մակարդակով, խստորեն դատապարտելով Հայաստանի տարածքային ամբողջականության դեմ Ադրբեջանի նախագահի նկրտումները և ուժ կիրառելու սպառնալիքները:

«Նման հայտարարությունները լրջորեն վնասում են տարածաշրջանային խաղաղությանը և կայունությանը: Դրանք բացահայտում են խաղաղության և հաշտության վերաբերյալ վերջին ժամանակներում Ադրբեջանի հայտարարությունների սին և կեղծ բնույթը: Հատկանշական է, որ նման սպառնալիքներ արվում են Հայոց ցեղասպանության տարելիցին ընդառաջ և նպատակ ունեն ուժի դիրքերից խոսելու հայ ժողովրդի հետ: Մենք մշտական կապի մեջ ենք մեր ռազմավարական դաշնակցի, ինչպես նաև Հարավային Կովկասում խաղաղությամբ շահագրգռված բոլոր գործընկերների հետ: Հայաստանը կձեռնարկի բոլոր անհրաժեշտ միջոցները՝ իր ինքնիշխանությունը և տարածքային ամբողջականությունը պաշտպանելու համար»:

Ակնհայտ է, որ Ադրբեջանի նախագահի ապրիլի 20-ի հարցազրույցը ցեղասպան քաղաքականության ապացույց է, այն պարունակում է միջազգային իրավունքով բարցարձակ արգելված՝ Հայաստանի ողջ բնակչությանն ուղղված ահաբեկումներ, իր հերթին ֆեյսբուքյան իր էջում գրել է ՀՀ ՄԻՊ Արման Թաթոյանը:

Նկատի ունենալով Հայաստանի ինքնիշխան Հանրապետության տարածքը՝ նա խոսել է, այսպես կոչված, «Զանգեզուրի միջանցք» ստեղծելու և Հայաստանի բնակչության դուրս շպրտելու մասին՝ անկախ Հայաստանի կամքից: Ադրբեջանի նախագահը նաև նշել է. «Բոլոր ուժերը մոբիլիզացված են ծրագիրն իրագործելու համար: Այսպիսով, 101 տարի անց ադրբեջանական ժողովուրդը վերադառնում է գրավված Զանգեզուր»: Դրանից առաջ էլ՝ 2021թ. ապրիլի 12-ի և 13-ի ելույթներով Ադրբեջանի նախագահը բացահայտ նշում է, որ Հայաստանում ու Արցախում ապրող սովորական մարդիկ, ողջ հայ ժողովուրդն ունեն հոգեբանական խեղումներ, թույնով են լցված, անհասկացող են, վայրենի են, մեծամիտ են, չունեն բարոյականություն և այլն: Փոխարենը՝ ի ցույց է դնում, իր կարծիքով, Ադրբեջանի ժողովրդի առավելությունները, նրանց հայ ժողովրդի հետ համեմատությամբ համարում դասով, բարոյականությամբ ու հոգեբանությանբ առավել բարձր: Ակնհայտ է, որ Ադրբեջանի նախագահի ապրիլի 20-ի հարցազրույցը ցեղասպան քաղաքականության ապացույց է, այն պարունակում է միջազգային իրավունքով բարցարձակ արգելված՝ Հայաստանի ողջ բնակչությանն ուղղված ահաբեկումներ են: Այս ամենն իրականացվում է պատմական փաստերի բացահայտ աղավաղմամբ՝ ներկայացնելով Զանգեզուրը իբր ադրբեջանական պատմական տարածք:

ՄԻՊ-ը հատուկ արձանագրել է, որ Ադրբեջանի նախագահը 2020թ. սեպտեմբեր-նոյեմբեր ամիսների պատերազմից հետո հատկապես է անում հայտարարություններ, որոնք ֆաշիստական քաղաքականության վկայություն են: «Ակնհայտ է, որ Ադրբեջանի նախագահն այս կերպ պետական բարձրագույն մակարդակով զարգացնում է էթնիկ ատելություն, այսինքն՝ հայատյացություն ու իրականացնում թշնամանքի հրապարակային քարոզ»:

ՄԻՊ-ը հրավիրել է միջազգային, հատկապես՝ մարդու իրավունքների մանդատ ունեցող կազմակերպությունների ուշադրությունն այս ցեղասպան ու ֆաշիստական բնույթի հայտարարություններին: «Միջազգային կառույցները պարտավոր են հաշվի առնել, որ նրանց լռությունն էր, որ պատերազմի ընթացքում նպաստեց ադրբեջանական ավելի մեծ դաժանությունների, իրավունքների անհավանական կոպիտ խախտումների: Դա է նաև պատճառը, որ Ադրբեջանի նախագահի կողմից արվում են նման բացարձակ ագրեսիվ, միջազգային իրավունքի հիմքերը խարխլող հայտարարություններ: Անհրաժեշտ է վճռական, իրական արդյունք ապահովող միջոցներով կանխել ադրբեջանական ցեղասպան ու ֆաշիստական քաղաքականությունը, հայատյացության ու թշնամանքի պետական քարոզը՝ բացառելու համար իրավունքների նոր խախտումներ, նոր պատերազմական հանցագործություններ ապագայում»:

Ֆաշիստական քաղաքականություն տանող Ալևին համարժեք արձագանքող իշխանություն Հայաստանը չունի։ Սա իսկապես վտանգավոր իրավիճակ է։ Ակնհայտ է, որ Ադրբեջանի պահվածքը նոր իրավիճակ է ստեղծում։ Հայաստանն ու Ռուսաստանը պարտավոր են այս իրավիճակում համարժեք գործել՝ միասնական։

Բայց ամբողջ խնդիրն այն է, որ Ադրբեջանի նախագահի ներկայիս սադրիչ կեցվածքին պատասխան չի տրվում այսպես ասած, ոչ ներսից, ոչ դրսից։ Միջազգային հանրությունը, Ռուսաստանն իր խնդիրներն ունի, իսկ Հայաստանի «թավշյա» իշխանության ղեկավարը զբաղված է Հայաստանի կործանմամբ։

Մեր աչքի առջև մեր երկիրն անդունդի եզրին կանգնած տեսնում ենք, թե ինչպես է մի ոչ ադեկվատ մարդ խաղում մի ամբողջ ժողովրդի ու պետության բախտի հետ։

Մետաքսյա Շալունց