Բաց նամակ ՀՀ վարչապետին

Հարգելի պարոն վարչապետ

Ձեզ են դիմում Աշխատանքի և սոցիալական հարցերի նախարարության Զբաղվածության պետական գործակալության տարածքային կենտրոնների (այժմ արդեն նախկին) աշխատակիցները:

Սոցիալական ոլորտում ընթացող բարեփոխումների արդյունքում Աշխատանքի և սոցիալական հարցերի նախարարության կազմում ստեղծվել է Միասնական սոցիալական ծառայություն, որը միավորում է համակարգում գործող 4 կառույցներ` այդ թվում Զբաղվածության պետական գործակալությունը` իր տարածքային կենտրոններով: Նոր կառույցի կանոնադրության համաձայն` գործակալության գործունեությունը իր բոլոր գործառույթներով պահպանվում է նոր կառույցի կազմում, մինչդեռ ՀՀ վարչապետի 26.02.2021թ. 172-Լ որոշմամբ ապրիլի մեկից Զբաղվածության պետական գործակալության գործունեությունը վերակազմակերպման փոխարեն դադարեցվել է` այդպիսով ստեղծելով քաղաքացիական ծառայողներին պաշտոնից ազատման հիմք:

Տարբեր առիթներով իր ելույթներում ԱՍՀ նախարար Մ. Առաքելյանը հավաստիացրել է, որ իրականացվող բարեփոխումների արդյունքում որևէ քաղաքացիական ծառայող չի կորցնի աշխատանքը: Ոլորտի ղեկավարի նման մոտեցումը արդարացի էր, քանի որ այդպիսով կապահովվեր նոր ստեղծվող կառույցի գործունեության անխափան իրականացումը, մյուս կողմից կպաշտպանվեր քաղաքացիական ծառայողների օրենսդրությամբ սահմանված իրավունքները:
Սակայն իրականությունն այլ է:

Չնայած ««Սոցիալական աջակցության մասին» օրենքում փոփոխություններ կատարելու մասին» ՀՀ օրենքի անցումային դրույթներով (հոդված 8) սահմանված է, որ «hամապատասխան գործառույթներ իրականացնող քաղաքացիական ծառայողներին Միասնական սոցիալական ծառայությունում կարող են առաջարկվել քաղաքացիական ծառայության հավասարազոր կամ ավելի ցածր պաշտոններ», բազմամյա աշխատանքային փորձ ունեցող, տարիներ շարունակ պետական բյուջեի, նաև տարբեր միջազգային կառույցների միջոցներով բազմաթիվ վերապատրաստումներ անցած, իրենց մասնագիտության մեջ հմտացած քաղաքացիական ծառայողներին նոր ստեղծված կառույցում համապատասխան աշխատանքի առաջարկ չի արվում: Փոխարենը հայտարարվել են ժամանակավոր թափուր պաշտոնների մրցույթներ, որոնց կարող են մասնակցել նաև այլ անձինք:

Եթե անգամ, թափուր աշխատատեղերի մրցույթներում ընտրվեն զբաղվածության տարածքային կենտրոնների մասնագետները` հաշվի առնելով նրանց բազմապրոֆիլ մասնագիտական գիտելիքները, գործատուների, աշխատանք փնտրողների, միջազգային և տեղական գործընկերների հետ համագործակցելու տարիների ընթացքում ձեռք բերված փորձը, խախտվում են «Քաղաքացիական ծառայության մասին» ՀՀ օրենքով սահմանված նրանց իրավունքները, այն է` ընդհատվում է նրանց աշխատանքային ստաժը, զրոյանում է աշխատանքային ստաժով պայմանավորված աշխատավարձի բնականոն աճի հաշվին գոյացած աշխատավարձի մասը:
Հարգելի պարոն վարչապետ, հաշվի առնելով, որ քաղաքացիական ծառայության աշխատանքը մասնագիտական գործունեություն է ի շահ պետության, հեռու քաղաքական գործընթացներից, խնդրում ենք վերանայել ՀՀ վարչապետի 26.02.2021թ. 172-Լ որոշումը և վերականգնել զբաղվածության տարածքային կենտրոնների շուրջ 300 քաղաքացիական ծառայողների խախտված իրավունքները:

Զբաղվածության տարածքային կենտրոնների աշխատակիցներ