Ով է ում ընդդիմությունը, կամ ում շահերը պաշտպանեց «Ելք»-ը

Վարչատարածքային բաժանման մասին օրենքում փոփոխություններ եւ լրացումներ կատարելու մասին, կամ կարճ ասած՝ գյուղերի խոշորացման մասին աղմկահարույց նախագիծը ընդունվեց իշխող ՀՀԿ-ի ու ՀՅԴ-ի կողմ ձայներով։ Ընդդիմադիրները անխնա քննադատեցին կառավարության հերթական վտանգավոր նախաձեռնությունը, ինչի արդյունքում կարող են գյուղեր դատարկվել ու բարձրանա արտագաղթի մի նոր ալիք։ «Ելք» խմբակցության ղեկավար Նիկոլ Փաշինյանն ասաց, որ խոշորացման գաղափարը վատ չէ, բայց չկա երաշխիք, որ վաղն էլ մարզերը չեն խոշորացնի ու դարձնեն քաղաքներ: ԱԺ փոխխոսնակ Էդուարդ Շարմազանովն էլ ասաց, որ պետք է արդյունք տեսնեն, եթե խոշորացումը արդյունավետ չլինի, հարյուր հատ միջազգային կազմակերպություն էլ մեզ հորդորի՝ դրան չպետք է գնանք՝ մոդային տուրք տալով: «Ծառուկյան» դաշինքի պատգամավոր Նաիրա Զոհրաբյանը դիմելով հիմնական զեկուցող, տարածքային կառավարման և զարգացման փոխնախարար Վաչե Տերտերյանին՝ ասաց, թե այսօր կա երկու տարբեր Հայաստան, որոնցից մեկում՝ «ֆեյք Հայաստանում», ապրում է Տերտերյանը. «Կա ֆեյք Հայաստան, որտեղ ապրում եք դուք, որտեղ բոլորն ամեն ինչից գոհ են, և դուք այստեղ ներկայացնում եք ծրագիր, որի արդյունավետությունը որևէ մեկս չենք տեսել, ներկայացնում եք բացարձակ ֆեյք իրականություն, և կա իրական Հայաստան, որի հետ դուք որևէ աղերս չունեք»։ Զոհրաբյանը նկատեց՝ խախտվել է Սահմանադրության 190-րդ հոդվածը՝ հանրային շահերից ելնելով՝ համայնքները կարող են օրենքով միավորվել կամ բաժանվել, ԱԺ-ն համապատասխան օրենք ընդունելիս՝ պարտավոր է լսել այդ համայնքների կարծիքը. «Հիմա դուք ասում եք՝ մենք լսել ենք համայնքապետերի, համայնքների կարծիքը. ո՛չ, հարգարժան կառավարություն, դուք չեք լսել, դուք կանչել եք մարզպետներին, նրանց ասել եք, որ սա քաղաքական որոշում է, և որևէ գյուղապետ կամ բնակիչ չհամարձակվի թպրտալ, և այս ծրագիրը պետք է իրականացվի։ Եթե սա համարում եք հանրային լայն քննարկում, ապա առաջարկում եմ Սահմանադրության մեջ կատարել փոփոխություն և «հանրային լայն քննարկում» հասկացությունը ձևակերպել այնպես, ինչպես դուք դա իրականացնում եք»։ Զոհրաբյանը վստահ է, որ համապատասխան մոնիտորինգ չի արվել, իսկ եթե արվել է, ապա արդյունքներն այնքան վատն են եղել, որ կառավարությունն այն ներկայացնելու համարձակություն չունի։«Որևէ մեկն իր խերից փախած չէ, եթե բնակչությունը տեսներ, որ համայնքների խոշորացումն ավելի արդյունավետ է, ապա իրենք կօգտվեին Սահմանադրությամբ իրենց տված լիազորություններից, տեղական հանրաքվեներ կանեին և իրենք կգային՝ կխնդրեին ձեզ՝ պահանջելով համայնքների խոշորացում։ Մեկ մոտիվացիա կարող էր լինել, որ մենք կողմ քվեարկեինք այս նախագծին. եթե դուք գայիք, ներկայացնեիք խոշորացված համայնքների արդյունավետությունը, բայց մենք հանրությունից այլ բան ենք լսել։«Ծառուկյան» դաշինքն այս նախաձեռնությանը կողմ քվեարկել չի կարող»,- եզրափակեց Ն. Զոհրաբյանը։ Նախագծին անցավ 57 կողմ, 23 դեմ ձայներով: Նիկոլ Փաշինյանը հայտարարեց, որ իրենք չեն մասնակցի քվեարկությանը: «Ելքի» դիրքորոշումը զարմացրեց Մելքումյանին, նա հիշեցրեց, թե ԱԺ նախագահի ընտրության ժամանակ, երբ առաջադրվել էր Էդմոն Մարուքյանը,«Ելք»-ն էր հորդորում , խոսում էր ընդդիմության միասնականության մասին․«Դա ձեր դաշինքի ներքին խնդիրն է, իհարկե, բայց չե՞ք կարծում, որ ընդդիմությունը պետք է միասնական լիներ: Չեմ կարողանում հասկանալ ձեր՝ քվեարկությանը չմասնակցելը»: Փաշինյանն արձագանքեց, որ Մելքումյանի ռեպլիկը հասկանալի չէ. «Դեմ չեմ, որ մեր դիրքորոշումները նույնական լինեն, հետեւաբար ձեր խմբակցությունն էլ կարող է այս հարցի քվեարկությանը չմասնակցել եւ մեր դիրքորոշումները 100 տոկոսով նույնական կլինեն»: ԱԺ նախագահ Արա Բաբլոյանը կատակեց. «Մենք չենք բացառում, որ ընդդիմությունն էլ կարող է ընդդիմություն ունենալ»: Անի Սահակյան