Արշակ սրբազանի խոսքը՝ Սուրբ Գայանե վանքում՝ Սուրբ Զատկի ճրագալույցի պատարագին (video) (ՄԱՍ 1)
Սուրբ Գայանե վանքում Սուրբ Հարության Ճրագալույցի Պատարագին Մայր Աթոռ Սուրբ Էջմիածնի դիվանապետ Գերաշնորհ Տ. Արշակ եպիսկոպոս Խաչատրյանն իր քարոզում նախ ասաց, որ անցյալի չսպիացած վերքերի ու ապագայի հանդեպ տագնապների մեջ մխիթարություն փնտրող մեր սրտերը վերստին բացել ենք Հարություն առած մեր Փրկչի առջև և մեր հայացքներն ուղղել այն Միակին, որ ի զորու է փրկել մեզ չարաղետ փորձություններից ու արհավիրքներից և անգին կորուստների հանդիման ապրելու նոր հույս ու կամք ներշնչել մեզ:
«Մթագնած երկնքում բոցավառվող արևի պես է ճառագայթում «Քրիստոս յարեաւ ի մեռելոց» ավետիսը՝ բարի լուրը, որ դարեր շարունակ վերափոխում է մարդկության կյանքը:
Քրիստոսի անձնուրաց հետևորդ, հեթանոսաց առաքյալ Պողոսը, առանց երկիմաստության, բովանդակազուրկ է համարում քրիստոնեական հավատքը՝ առանց Հարության հրաշքի ճանաչման: «Եթե Քրիստոս հարություն չի առել,- ասում է նա,- ապա ընդունայն է մեր քարոզությունը, ընդունայն է նաև ձեր հավատքը» (Ա Կորնթ. ԺԵ 14):
Քրիստոսի հարությունը վեմն է մեր հավատքի: Առանց Հարության հրաշքի չէր կարող իմաստ ստանալ Քրիստոսի զոհաբերությունը՝ Նրա չարչարանքները, Նրա խաչելությունն ու Նրա մահը:
Հետևեք մեզ Viber-ում
