Փոխհրաձգություն ՀՀԿ-ի եւ Ծառուկյան դաշինքի միջեւ

Վեցերորդ գումարման ազգային ժողովը այսօր միաձայն հաստատեց, որ իր շարքերում ոչ գողականներ կան, ոչ էլ գողական պանյատով առաջնորդվող պատգամավորներ։ Բոլորը կողմ քվեարկեցին «Կոռուպցիայի կանխարգելման հանձնաժողովի մասին» օրենքի նախագծին, որի շուրջ նախորդ օրը թեժ քննարկում էր ծավալվել։ Խայծը գցել էր ՀՅԴ-ական պատգամավոր Անդրանիկ Կարապետյանը, նա վրդովված ԱԺ ամբիոնից հայտարարել էր, որ ազդարարների ինստիտուտը գործ տվողի ինստիտուտ է ու պետք է հայ ազգի մեջ պառակտություն մտցնել, խարխլել հայապահպանության հիմքերը։ Կողմ քվեարկեց նաեւ Անդրանիկ Կարապետյանը, իսկ ՀՅԴ խմբակցության ղեկավար Արմեն Ռուստամյանը խորհրդարանում լրագրողներին հորդորեց չծայրահեղականացնել իրենց թիմակցի խոսքերը, Կարապետյանը կողմ է հակակոռուպցիոն պայքարին։ Նախքան քվեարկությունը, օրենքի նախագծի հեղինակ Արփինե Հովհաննիսյանը տեղեկացրեց, որ ընդդիմության առաջարկն ընդունել են, մրցութային խորհրդում Կոռուպցիոն հանձնաժողովի կազմում առաջադրման իրավունք կունենան նաև ընդդիմադիր պագամավորները․ «Այն կիրացվի, արդեն կա որոշում, որ ընդդիմադիրները համախոհության կարգով առաջադրվելու են»։ «Ելք» դաշինքի ղեկավար Նիկոլ Փաշինյանն էլ նախապես հիմնավորեց խմբակցության կողմ քվեարկությունը․«Մենք արդեն ասել ենք, որ նեգատիվ չենք տրամադրված: Ճիշտ է՝ մեր պատկերացրած նախագիծը չէ, բայց սա քայլ առաջ է դեպի մեր պատկերացումներին համապատասխանող հակակոռուպցիոն մարմին ստեղծելու ուղղությամբ»։«Ծառուկյան» դաշինքից Միքայել Մելքումյանն էլ նկատեց, որ նախագծից իրենց ակնկալիքներն ավելի մեծ էին, բայց դաշինքը նույնպես կողմ կքվեարկի այս նախագծին: Նախագիծն առաջին ընթերցմամբ դրվեց քվեարկության, ստացավ 86 պատգամավորի վստահության քվե։ Խորհրդարանն այնուհետեւ անցավ ոչ պակաս աղմկահարույց նախագծի քննարկմանը։ Խոսը պետական մի շարք օբյեկտների մասնավորեցման վերաբերյալ կառավարության նախաձեռնության մասին է, որի շրջանակներում մոտ հիսուն տասնյակ օբյեկտներ են հանվել մասնավորեցման, հիմնավորումն էլ ակնկալվող ներդրումներն են՝ մոտ երեսունհինգ միլիոնի չափով։ Խորհրդարանի ընդդիմությունը երեկվանից քննադատում է Կարեն Կարապետյանի ներկայացրած նախագիծը՝ հատկապես ընդվզումը առողջապահական ոլորտի շինությունների մասնավորեցման առիթով է, ինչի մասին ներկայացրել ենք։ Այսօր բավական հետաքրքիր բանավեճ ծավալվեց ԲՀԿ-ական Միքայել Մելքումյանի, որը նախկինում զբաղեցրել է պետգույքի նախագահի տեղակալի պաշտոնը եւ ներկայումս այդ մարմնի ղեկավար Արման Սահակյանի միջեւ։ ՀՀԿ-ական պետ Արման Սահակյանը թարմացրեց ԲՀԿ-ական Միքայել Մելքումյանի հիշողությունը Մասնավորեցման առողջապահական օբյեկտների մասնավորեցման վերաբերյալ Միքայել Մելքումյանի դժգոհությանն ու ընդդիմախոսությանը: Արման Սահակյանը հիշեցրեց, թե 2000-2004 թվականների մասնավորեցման ցանկում եղել է 22 հիվանդանոց: Արման Սահակյանն ակնարկում էր, որ Միքայել Մելքումյանի պաշտոնավարման ընթացքում հիվանդանոցներ մասնավորեցվել են, եւ նա կարծես թե առանձնապես չի դժգոհել ու ընդդիմացել: Միքայել Մելքումյանն էլ խախտելով ԱԺ կանոնակարգ օրենքը ռեպլիկով հակադարձեց Արման Սահակյանին, նա էլ հիշեցրեց, որ 2000-2004 թվականներին իշխող ուժը եղել է ՀՀԿ-ն: Այլ կերպ ասած, Մելքումյանը պատասխանատվությունը թողեց ՀՀԿ-ի՝ Արման Սահակյանի կուսակցության վրա, ակնարկելով, որ ինքն ընդամենը եղել է կատարող։ Անի Սահակյան