Դաշնակցությունը մնացել է իր հայհոյանքի տակ

Ոչ ոք չէր էլ կասկածում, որ ընտրություններից հետո Դաշնակցությունն անմիջապես իրեն կնետի ՀՀԿ ոտքերը և կրկին ցանկություն կհայտնի նրա հետ դաշինք կազմել ինչպես խորհրդարանում, այնպես էլ, բնականաբար, նոր կառավարությունում:  Սա այլեւս իրողություն է մի իրավիճակում, երբ ԱԺ-ում ՀՀԿ-ն է մեծամասնություն է կազմում, կարող է միանձնյա տնօրինել բոլոր հարցերը, որոշումներ ընդունել  եւ ՀՅԴ-ն ակնհայտ է, որ   սայլին հինգերորդ անիվ են որպես ծառայում: Բայց որ նման կցորդային կարգավիճակը ու կարող էր հեղինակազրկված ՀՅԴ-ին  գլխապտույտ ինքնավստահություն ներշնչել,  պատկերացնելը դժվար էր: Իսկ որ ՀՅԴ-ն  հեղինակազրկվել է, դա այլեւս քննարկման ենթակա չէ, այդ մասին փաստող հերթական տեսանյութն է օրերս հայտնվել համացանցում, «Դաշնակցություն» խմբակցության ղեկավար Արմեն Ռուստամյանը հանդիպում է ունեցել ամերիկահայերի հետ ու մեղմ ասած խայտառակ իրավիճակում հայտնվել: Հայ համայնքի ներկայացուցիչները նրա երեսին են շպրտել վիրավորանենքր ու այսպես ասած պատին դեմ տվել՝ պահանջելով ռեալ գնահատականներ Հայաստանում քաղբանտարկյալների գոյության մասին: Հանդիպմանը ներկա հայերից մի քանիսը  հարցրել են՝ դաշնակցականները ճանաչո՞ւմ են, որ «Հիմնադիր խորհրդարան»-ի անդամներ Գևորգ Սաֆարյանն ու Ժիրայր Սեֆիլյանը քաղբանտարկյալներ են, Արմեն Ռուստամյանը դաշնակցաբար փորձել է  շրջանցել  հարցը և սկսել բացատրել քաղբանտարկյալ եզրույթը: «Մենք Եվրոպայի խորհրդի անդամ երկիր ենք: Այն ունի հատուկ մոնիթորինգ, որն անցկացվում են տվյալ երկրներում, ու եթե արձանագրվեր, որ Հայաստանում կան քաղբանտարկյալներ, մի կասկածեք՝ Եվրոպայի խորհրդում այդ հարցը կդրվեր, և Հայաստանը սանկցիաների տակ կհայտնվեր: Կան չափանիշներ՝ այդ անձը քաղբանտարկյալ է, թե՝ ոչ: Մենք ունենք զեկուցողներ, և այդ հարցի կապակցությամբ նմանատիպ եզրակացություններ չեն տվել: Մենք չենք փորձում քաղաքականացնել հարցը, քաղբանտարկյալն այն անձն է, որի արարքը որևէ աղերս չպետք է ունենա Քրեական օրենսգրքի հետ»,- ասել է պատգամավորը: Քաղաքացիները պնդել են, որ վերջինս հստակ պատասխանի՝ արդյո՞ք Սաֆարյանն ու Սեֆիլյանն, ըստ նրանց, քաղբանտարկյալ են, թե՝ ոչ, բայց Ռուստամյանը կրկին խուսանավել է պատասխանից: «Ղալաթ ես արել, չաթլախ»,- բղավել է քաղաքացիներից մեկը: Ներկաներից մեկը, որը մասնագիտությամբ իրավաբան է, փորձել է այս թեմայով այլ հարց տալ, սակայն Արմեն Ռուսատմյանը հրաժարվել է պատասխանել՝ նշելով, որ առավել կարևոր հարցեր կան երկրում: Բումերանգի էֆեկտը կրնկակոխ հետապնդում է  ՀՅԴ-ն, Արմեն Ռուստամյանի տարիներ առաջ գործածած այդ վիրավորական բառը ուղիղ իր դեմ է ուղղվել, անցած տարի էլ Հայաստանում ակտիվիստներից մեկը դաշնակցական Արծվիկ Մինասյանին էր ուղղել այդ խոսքերը, այնպես որ ՀՅԴ-ն, կարելի է ասել, մնացել է իր դրած հայհոյանքի տակ: Եւ հենց այս պարագայում է, որ ծիծաղելի է դառնում ՀՅԴ-ի ինքնավստահությունը եւ ինքն իրեն կշիռ հաղորդելու, գործոն դարձնելու ծիծաղելի փորձերը: Ճիշտ նույն պահին, երբ շատերն ըմբոշխնում էին ՀՅԴ-ի անարգանքի հերթական տեսանյութը, Արմեն Ռուստամյանը Ազգային ժողովում լուրջ-լուրջ դեմքով փորձ էր անում խորհրդավորություն ստեղծել, չբացահայտել, թե ով է լինելու ՀՅԴ թեկնածուն 2018-ից հետո: Անշուշտ այս հարցում էլ Ռուստամյանը դաշնակցաբար խաղաց երկու լարի վրա, ասելով, որ գոհ են Կարեն Կարապետյանի կառավարությունից եւ որ վերջինի վերանշանակման հարցում նաեւ իրենց համաձայնությունն են տվել, սակայն անուններ չհնչեցրեց,թե ում է տեսնում հաջորդ ժամկետի վարչապետի թեկնածու: Այստեղ են ասել՝ խելքին աշեցեք, եթե կլինի մեկը, որը լուրջ կընդունի, որ ՀՅԴ-ն այս հարցում գործոն է լինելու, ապա այդ մեկինպետք է փնտրել միայն դաշնակցությունում, որովհետեւ եփած հավին էլ հայտնի է, որ ՀՅԴ-ն կատարելու է այն, ինչը թելադրվելու է Սերժ Սարգսյանի կողմից, պաշտպանելու է այն թեկնածուին, ում ՀՀԿ ղեկավարը կառաջադրի: Անի Սահակյան