Հանգուցալուծումը մոտ է

Նիկոլ Փաշինյանն, այդուհանդերձ, որոշեց չընդառաջել ընդդիմադիր գործընկերներին եւ ընտրություններից երկու ամիս առաջ փոխել խաղի կանոնները, հրաժարվել հին օրենսգրքից, ընտրությունների գնալ նոր՝ համամասնական ընտրակարգով:
Այսօր Ազգային ժողովն արտահերթ նիստ է հրավիրել, որպեսզի միանգամից երկու ընթերցումով ընդունի ԸՕ-ում փոփոխությունները: Իշխանությունը գաղտնի է պահում փոփոխությունների նախագիծը, որոշել են, որ անգամ գլխադասային հանձնաժողովի եզրակացությունն էլ պետք չէ, թե ինչու, դեռեւս հայտնի չէ: Պարզ է մեկ բան , որ փոխվելու է ընտրական մոդելը եւ ինչպես նշել էր Նիկոլ Փաշինյանը, անցում են կատարելու համամասնական ընտրակարգին: Հիշեցնենք, որ մարտի 24-ին Փաշինյանը խորհրդարանում անսպասելիորեն հայտարարեց, թե Իմ Քայլում որոշել են, որ ռեյտինգային ընտրակարգից կհրաժարվեն: Դրանից հետո խորհրդարանական եւ արտախորհրդարանական մի շարք ուժեր արձագանքեցին եւ հորդորեցին զերծ մնալ այդ քայլից, հատկապես առաջամարտիկ Էդմոն Մարուքյանն էր իր Լուսավոր Հայաստանի գործընկերներով: Ավելի ուշ Փաշինյանը պատասխանեց իրեն ուղղված քննադատություններին, ասելով, որ արտահերթ ընտրությունների շուրջ համաձայնություն կայացնելից ընտրական մոդելը պայմանավորվածության կետ չի հանդիսացել, ավելին թե ԲՀԿ-ն, թե ԼՀԿ-ն հարցն այդ թողել են իշխող ուժի հայեցողությանը: Սակայն որպես կանոն սահմանադրական օրենքները, եւ հատկապես Ընտրական օրենսգրքերը որպես կանոն ընդունվում են քաղաքական դաշտի լայն կոնսենսուսով:
Մոտ տաս օր ծանրութեթեւ անելուց հետո Փաշինյանն այդուհանդերձ որոշել է գնալ փոփոխության: Այսօր խորհրդարանը կամ կընտրի, կամ կբոյկոտի Փաշինյանի այս նախաձեռնությունը: Խնդիրն այն է, որ իշխող ֆրակցիայի ռեյտինգայինով ընտրվածներից ոչ բոլորն են կողմ այս փոփոխությանը:
Իսկ Նիկոլ Փաշինյանին այն օդ ու ջրի պես են պետք, ինչու, այդ մասին արդեն խորը վերլուծություններ են արվել: Գելափի հարցումներն էլ եկան ապացուցելու, որ ընտրակարգի փոփոխությունը Փաշինյանի միակ փրկօղակն է դառնալու իշխանությունը վերարտադրելու հարցում: Հիշեցնենք, որ երեկ Գելափի հարցումներից պարզ դարձավ, որ ընտրություններին պատրաստ են մասնակցել քաղաքացիների 41 տոկոսը, սա նշանակում է, որ ավելի քան հիսուն տոկոս տարբեր պատճառներով հետաքրքրություններ չունի ընտրությունների նկատմամբ, այլ կերպ ասած՝ այդքան չկողմնորոշված զանգված կա:

Ռեյտինգային թեկնածուների բացակայության պարագայում չկողմնորոշվածները կայուն կպահպանեն իրենց կարգավիճակը, իսկ հակառակ դեպքում թեկնածուները տարբեր խոստումներով նրանց կտանեն ընտրատեղամասեր:
Իսկ ռեյտինգային կարգով ակնհայտ է, որ մեծ առավելություն ունի ոչ թե իշխանությունը, ում այսօր վարկանիշ ունեցող որեւէ անձ չի աջակցի, այլ ընդդիմությունը: Սա է գլխավոր պատճառը, որ Նիկոլ Փաշինյանին օդուջրի պես հարկավոր է փոխել ընտրակարգը:

Անի Սահակյան