Ալիևի «ձիով քայլը»՝ հայերի «Իսկանդերով»

Ադրբեջանի ականազերծման գործակալությունից (ANAMA) հայտնել են, որ Շուշիում հայտնաբերել են «Իսկանդերի» երկու հրթիռ, հաղորդում է report.az-ը:

Գործակալության ներկայացուցիչը նշել է, որ հրթիռները հայտնաբերվել են մարտի 15-ին իրականացված ականազերծման աշխատանքների ընթացքում: Նշվում է նաև հրթիռների հայտնաբերման կոորդինատները՝ 39°45’38.10«N 46°44’33.90»E և 39°45’27.80«N 46°45’25.80»E, ինչպես նաև հրթիռի համար՝ 9М723:

Այսինքն, Արցախում պատերազմի ավարտից գրեթե կես տարի անց, հանկարծ Ադրբեջանը հաստատում է ավելի վաղ Փաշինյանի հայտարարությունը, որը Ռուսաստանը պաշտոնապես հերքեց:

Հիշեցնենք Փաշինյանի աղմկահարույց հայտարարությունը՝ «Իսկանդերի» ռումբերի 10 տոկոսով պայթելու մասին, որից անմիջապես հետո ռուս զինվորականները հայտարարեցին, որ Հայաստանին տրամադրված ռումբերը չեն կիրառվել ղարաբաղյան պատերազմում:

Ինչ է ստացվում, ուրեմն, Փաշինյանն ու Ալիևը՝ ուս-ուստի տված Ռուսաստանին են շտապում ստախոսության մեջ մեղադրել, ինչպես ասում են՝ «միմյանց պասեր տալով»:
Սա, փաշինյանական «թավիշների» իշխանության ու ալիևյան ռեժիմի անուղղակի շահերի համընկնման մի դրսևորում է, որը հնարավոր է ուղղակիորեն ոչ համաձայնեցված դիրքորոշումների, այլ լիովին այլ ուժային կենտրոնների ուղղորդմամբ մի դրսևորում է, որն արտահայտվեց այս ձևով:

Չի կարելի բացառել, իհարկե, որ ռուսները չեն իմացել «Իսկանդերի» կիրառման մասին, ու ադրբեջանցիներն էլ 6 ամիս հետո են հայտնաբերել «Իսկանդերի» բեկորները: Սակայն, այսօր՝ ռուս խաղաղապահների ներկայությամբ պայմանավորված թուրք-ադրբեջանական տանդեմի դժգոհության ֆոնին Ալիևը փաստորեն «ձիով քայլ» արեց, անուղղակիորեն փրկելով Փաշինյանի ավելի վաղ արած հայտարարությունը, որը փաստորեն, հերքեցին ռուսները:

Այսպես, Լեռնային Ղարաբաղում Ռուսաստանի միջոցով խաղաղություն ու որոշակի կայունություն պահելու ջանքերն, այպիսով, մտնում են ձախողելու պաշտոնական փուլ:
Սա մի երևույթ է, որը հետևանքներ կունենա Ռուսաստանի, որպես միջնորդի հետագա գործունեության վրա:

Հիմա հետաքրքական է լինելու Մոսկվայից արձագանքը՝ ադրբեջանական լրատվական այս արտահոսքի առիթով:

Մետաքսյա Շալունց