Հլա մի հատ ասա՝ «Պո՛նչ, արթո՞ւն ես»

Էկոնոմիկայի նախարար Վահան Քերոբյանն հայտարարել է, որ մինչև տարեվերջ երկնիշ տնտեսական աճ ենք ունենալու։
«2021 թ-ի հունվար-փետրվարի արդյունքներն ավելի լավն են, քան 2019 թ-ի արդյունքները, որովհետև 2020 թ-ի հունվար փետրվար ամիսներն էապես ավելի լավն էին, քան 2019 թ-ի հունվար-փետրվարը: Եթե մենք պահենք աճի նույն տեմպը 2019-ի նկատմամբ, ապա 2021-ի վերջում կունենանք ավելի քան 10 տոկոս տնտեսական աճ»,- ասաց Քերոբյանը՝ հավելելով, որ հաշվի է առել արդեն իրականացված ու ծրագրված ներդրումները:
Բացի այդ, նրա խոսքով, այս տարի մարտին, ի տարբերություն նախորդ տարվա նույն ժամանակահատվածի Հայաստանում արդեն զբոսաշրջիկներ են նկատվում, մասնավորապես՝ Իրանից։ Ամրագրումներ կան նաև ապրիլ-մայիս ամիսների համար։ Հետևաբար Քերոբյանը վստահաբար ենթադրում է, որ այս տարվա տուրիզմի ոլորտի աճը, որը 2020թ-ի համեմատ 319 տոկոսով ավելի է կանխատեսված, միանգամայն իրատեսական է:
Վահան Քերոբյանի տնտեսկան կանխատեսումների իրականացման ռիսկի մեծությունը ճշգրիտ որոշելու բանձև գիտությանն հազիվ թե հայտնի լինի։ Ուստի համոզվելու համար, որ նրա արտաբերած մտքերը իրական են, ոչ թե մտացածաին, նախարարին առաջարկում ենք քաշքշել սեփական թշերից, սթափեցնող ապտակներ հասցնել ինքն իրեն և փարձնական ասել․ «Պո՛նչ, արթո՞ւն ես»։
Իրականում բանական մարդը միայն քնած կամ խմած ժամանակ կարող է կանախատասել տուրիզմի 319 տոկոս աճ, այն դեպքում, երբ համավարակի թվերն ամեն օր աճում են, իսկ պատերազմի ռիկն էլ մեր երկրի համար շարունակում է շատ բարձր մնալ։
Ինչպե՞ս կարող է մարդն արթուն լինել և հայտարարել, թե Հայաստանում երկնիշ աճ է լինելու, այն դեպքում, երբ բոլոր կանխատեսումների համաձայն Հայաստանի տնտեսության աճը, ամենալավատեսական սցենարի դեպքում չի գերազանցի 3-4 տոկոսը։ Մասնավորապես, համաձայն Համաշխարհային բանկի զեկույցի՝ 2020 թվականը Հայաստանը փակում է 8 տոկոս տնտեսական անկմամբ, իսկ 2021 թվականին հայաստանյան տնտեսությունը կարող է աճել շուրջ 3,1 տոկոսով։ Ընդ որում, սա տարվա սկզբին արված կանխատեսում է։
Ավելին, նախորդ շաբաթ՝ մարտի 17-ին հրավիրված մամուլի ասուլիսում Կենտրոնական բանկի նախագահ Մարտին Գալստյանը հայտարարեց, որ ՀՀ ԿԲ-ն վերանայել է հետպատերազմյան 2021թվականի տնտեսական աճի կանխատեսումը՝ 2 տոկոսի փոխարեն սահմանելով ընդամենը 1.4 տոկոս աճ։Թե ինչ հաշվարկների և վերլուծությունների վրա է հիմնված Վահան Քերոբյանի երկնիշ աճի սպասումը, հայտնի չէ։
Չի բացառվում, որ ողջ գաղտնիքը նահանջ տարվա փետրվար ամսվա սովորականից 1 օր ավել ունենալու մեջ է։ Հիշեցնենք, որ նախօրեին Վիճակագրական կոմիտեն հրապարակել է 2021թ․ փետրվարի տնտեսական ակտիվության ցուցանիշը, որը կազմել է 5,3 տոկոս անկում։ «Հաշվի առնելով, որ անցած տարվա փետրվարն ուներ մեկ օր ավել՝ Հայաստանի տնտեսությունը համարյա վերականգնվել է։ Ու դա դեռ զրոյին մոտ տուրիզմի պարագայում»,- վերլուծելով պաշտոնական վիճակագրության արձանագրած ցուցանիշը՝ ֆեյսբուքում գրել էր նախարար Քերոբյանը:

Ըստ էության Հայաստանն աշխարհի միակ երկիրն է, որտեղ էկոնոմիկայի նախարարի տնտեսական վերլուծությունների հիմքում դրված է նահանջ տարվա փետրվար ամսվա 29-րդ օրը՝ չորս տարին մեկ տեղի ունեցող այդ բացառիկ տնտեսական ձեռբերումը։
Եվ այստեղ նորից և կրկին արդիական է հնչեցնել վերնագրում գրված հարցը՝ «Պո՛նչ, արթո՞ւն ես»։

Հայկ Դավթյան