Ծառուկյանի վախերը․ պատասխան քայլ Նիկոլ Փաշինյանին

Հունիսի 20-ին նախանշված ընտրությունները չեղարկման ռեալ վտանգի տակ են: Սրա մասին են վկայում քաղաքական դաշտից հնչող ուղերձներն ու հայտարարությունները: Պատճառը միանշանակ Նիկոլ Փաշինյանն է, ով որոշել է ընտրություններից մեկ-երկու ամիս առաջ փոխել Ընտրական օրենսգիրքը, քաղաքական դաշտին հնարավորություն չտալ պատրաստվել խաղի նոր կանոններին: Առավել եւս, որ հին օրենսգիրքը իր ռեյտինգային ընտրակարգով փողոցի ընդդիմության, մասնավորապես, Հայրենիքի փրկության շարժման մաս կազմող քաղաքական ուժերի, հատկապես Նիկոլ Փաշինյանի հետ արտահերթ ընտրությունների հարցով համաձայնություն կնքած Գագիկ Ծառուկյանի համար ընդունելի ընտրակարգ է:

Թեեւ ԲՀԿ-ականները հայտարարում են, որ իրենք խնդիր չունեն եւ ցանկացած ընտրակարգով կարող են մասնակցել ընտրություններին, բայց բոլորս էլ գիտենք, որ նրանք առնվազն ազնիվ չեն: Պատահական չէ, որ նրանք վերադառնում են փողոց եւ ԲՀԿ-ական Միքայել Մելքումյանն է լրագրողների հետ ճեպազրույցում ասել, որ մասնակցելու են մարտի 28-ին Հայրենիքի փրկության շարժման կազմակերպած համապետական հանրահավաքին: Նա խոստովանել է, որ թեեւ Ծառուկյանի եւ Փաշինյանի միջեւ համաձայնություն է կայացվել, բայց իրենք մտահոգություններ ունեն, որ Փաշինյանը կդրժի խոստումը եւ հրաժարական չի ներկայացնի, հետեւաբար պետք է շարունակել պայքարը փողոցում:

«Եթե նախնական պայմանավորվածություններ չպահպանվեն, ապա լուրջ խնդիրներ կլինեն, բայց ես չգիտեմ՝ ինչ են խոսել Փաշինյանը և Ծառուկյանը: Կգա ապրիլի 20-ը, կտեսնենք՝ ինչ գործողություններ է անում Նիկոլ Փաշինյանը, չեն լինի գործողություններ՝ ժողովուրդը նորից ոտքի կկանգնի, բայց ես ենթադրում եմ՝ ընտրությունները լինելու են»,- ասել է Մելքումյանը հավելելով, որ իրենց խմբակցությունը շարունակելու է գործել «Հայրենիքի փրկության շարժման» հետ, քանի որ նրանք պետք է խուսափեն ֆորս մաժորային իրավիճակներից. «Մենք զուգահեռ գնում ենք 17-ի ձևաչափով, որպեսզի եթե որևէ պայմանավորվածություն խախտվի և ֆորս մաժորային իրավիճակներ լինեն, ընդդիմությունը կարողանա քայլեր ձեռնարկել»:

Նախ առնվազն զարմանալի է՝ Գագիկ Ծառուկյանը գնացել է համաձայնության, սակայն չի վստահում Նիկոլ Փաշինյանին, սա նշանակում է, որ հիմնավոր փաստարկներ չի ներկայացվել, բայց ինքը տվել է իր համաձայնությունը, ինչու, սա մեծ հարցեր է առաջացնում եւ թերեւս հայտնի է միայն Ծառուկյանին: Բայց զուգահեռ մեզ տեղեկություններ են հասել, որ ռեյտինգային ընտրակարգից հրաժարվելու մասին Նիկոլ Փաշինյանի հայտարարությունից հետո Գագիկ Ծառուկյանը իր գործընկեր լիդերներին համոզել է ակտիվ պայքարել փողոցում եւ Նիկոլ Փաշինյանին պարտադրել, որ մտքով չանցնի ընդդիմությանը <քցել> եւ ընտրությունների վերաբերյալ միանձնյա որոշումներ ընդունել առանց նրանց հետ համաձայնեցնելու:

Անի Սահակյան