Թուրքերի հետ ջան-ջիգյար, ռուսների հետ հզոր բանակ. 1 օրում՝ 2 հակասություն

Երեկ հայ-ռուսական հարաբերությունների խորացման վերաբերյալ, պայմանավորված տարածաշրջանում ձևավորված նոր իրողություններին, պաշտոնական Երևանից հնչել է մի կարևոր արձանագրում:

ՀՀ Ազգային ժողովում Հայաստանի պաշտպանության նախարար Վաղարշակ Հարությունյանն արձանագրել է, որ գործ ունենք թուրքական բանակի հետ, հայ-ռուսական հարաբերությունները պետք է համապատասխանեցնենք այդ սպառնալիքին:

Նա, մասնավորապես արձանագրել է, որ պատերազմից հետո տարածաշրջանում ռազմաքաղաքական իրադրությունը փոխվել է, մենք գործ ունենք թուրք-ադրբեջանական բանակի հետ, որը գնալով միաձուլվում է: «Դե ֆակտո գործ ունենք թուրքական բանակի հետ։ Որպեսզի կանխենք այդ սպառնալիքը, բնական է, որ մեր բանակի կառուցվածքը, հայ-ռուսական հարաբերությունները պետք է համապատասխանեցնենք այդ սպառնալիքին։ Բանակի բարեփոխումներն ուղղված են դրան։ Բացի դրանից, մենք վերանայում ենք նաև սպայի դերը», - ասել է Վաղարշակ Հարությունյանը։

Նշենք, որ մարտի 23-ի երեկոյան կայացել է ՀՀ պաշտպանության նախարար Վաղարշակ Հարությունյանի և ՌԴ ԶՈՒ ԳՇ պետ, բանակի գեներալ Վալերի Գերասիմովի հեռախոսազրույցը, որի ընթացքում քննարկվել են հայ-ռուսական ռազմական համագործակցությանն առնչվող, մասնավորապես՝ հայ-ռուսական համատեղ զորախմբերի միասնական գործողությունների, ինչպես նաև Սյունիքի անվտանգային խնդիրների լուծման հետ կապված մի շարք հարցեր։

Ըստ ՀՀ ՊՆ-ի տարածած մամլո հաղոր դագրության՝ անդրադարձ է կատարվել հայկական զինված ուժերի արդիականացման և լայնածավալ բարեփոխումների ծրագրերին։ «Վաղարշակ Հարությունյանն ու Վալերի Գերասիմովը պայմանավորվածություն են ձեռք բերել նշված հարցերի շուրջ առավել հանգամանալից քննարկումների նպատակով մոտ ժամանակներս ՌԴ բարձրաստիճան պատվիրակության Հայաստան այցի և բանակցությունների անցկացման վերաբերյալ», ասվում էր ՀՀ ՊՆ-ի հաղորդագրության մեջ:

Մի կողմից ՀՀ պաշտպանության նախարարը, փաստորեն, արձանագրում է, որ հայկական բանակը կարող է բախվել թուրքական բանակի հետ՝ նոր պատերազմում և դրա համատեքստում նախանշում, որ արժե Ռուսաստանի հետ փոխգործակցությունն էլ ավելի խորացնել, մյուս կողմից, սակայն երեկ հնչել է մեկ այլ արձանագրում, որը, մեղմ ասած, տարակուսանք է առաջացնում, թե արդյոք ՀՀ իշխանություններն ունեն ամուր, գիտակցված դիրքորոշում Հայաստանի և Արցախի ապագայի հարցում:

Տարածաշրջանային հաղորդակցությունների ապաշրջափակման մասով առաջընթաց կա, երեկ ԱԺ-կառավարություն հարցուպատասխանի ժամանակ հայտարարել է ՀՀ փոխվարչապետ Մհեր Գրիգորյանը:

Նա տեղեկացրել է, որ այս պահին դեռևս իրականացվում են փորձագիտական բնույթի աշխատանքներ: Փոխվարչապետի խոսքով՝ հիմնականում քննարկվում է երկաթգիծ, ավտոճանապարհ: Ըստ նրա՝ խոսքը սովետական ժամանակվա ենթակառուցվածքների վերականգնման մասին է՝ բոլոր հնարավոր ուղղություններով:

Հիմա Հայաստանի «թավշյա» իշխանությունների մոտ կա՞ միասնական դիրքորոշում երկրի կարևորագույն խնդիրներից մեկի՝ անվտանգության պահպանման և արտաքին քաղաքական վեկտորի վերաբերյալ՝ դեպի ո՞ր կողմ է ձգտում Հայաստանը...

Դեպի Ռուսաստա՞ն, որպեսզի երկրի անվտանգությունը, թե՞ Ադրբեջանի ու Թուրքիայի հետ կոմունիկացիաներն է բացում... Թե՞ միաժամանակ հարևանություն ու թշնամություն են պատրաստվում անել թուրք-ադրբեջանական դաշինքի հետ:

Մետաքսյա Շալունց