Կրեմլից առաջին զուսպ «մեսիջները»՝ նախընտրական Հայաստանին

Մոսկվան Հայաստանի վարչապետ Նիկոլ Փաշինյանի՝ արտահերթ խորհրդարանական ընտրություններ անցկացնելու որոշումը համարում է Հայաստանի ներքին գործը, երեկ այս մասին հայտարարեց Ռուսաստանի ԱԳՆ պաշտոնական ներկայացուցիչ Մարիա Զախարովան՝ անդրադառնալով Հայաստանում արտահերթ խորհրդարանական ընտրությունների անցկացման տեղեկությանը: «ԱԳՆ-ն այդպիսի հարցեր չի մեկնաբանում, քանի որ դրանք գնահատում է որպես ինքնիշխան պետությունների ներքին գործը»,- ասել է Զախարովան:

Բայց այս հայտարարությունից բացի՝ Զախարովան, որը նշել է, որ՝ 2021 թվականին արտահերթ խորհրդարանական ընտրությունների անցկացումը մենք դիտարկում ենք որպես Հայաստանի ներքին գործ, մենք նկատի ենք առել, որ կողմերը եկել են համաձայնության արտահերթ ընտրությունների հարցում, այնուհետև հույս է հայտնել, որ՝ «նախընտրական շրջանը կանցնի կառուցողական մթնոլորտում՝ միտված երկարաժամկետ արդյունքի հասնելուն։

Մոսկվան, կշարունակի «ակտիվ» պասիվ դերում՝ մի կողմ քաշվածի իր կեցվածքով, ցույց տալ, որ չի խառնվելու ներհայաստանյան քննարկումներին, բացահայտ, կամ պաշտոնապես չի սատարելու որևէ կողմի:

Իհարկե, պարզ է, որ Ռոբերտ Քոչարյանի մասնակցության պարագայում ռուսական փորձագիտական, լրատվական դաշտից կլինեն ավելի բաց «մեսիջներ», թե ում կցանկանար Ռուսաստանը տեսնել Հայաստանի իշխանության գլուխ:

Բայց բաց Փաշինյանի իշխանությանը դեմ Ռուսաստանը չի գնա, ուղիղ չի հայտարարի, թե Փաշինյանի հետագա իշխանավարումը վտանգ է:

Հայ-ռուսական հարաբերությունները խորը և պատմական հիմք ունեն, որոնք նաև ռազմավարական բնույթի են: Այդ հարաբերությունները ՌԴ-ի համար կարևոր են, այսօր հայտարարել է Հայաստանում ՌԴ դեսպան Սերգեյ Կոպիրկինը`«Ինտեգրացիա և զարգացում» հետազոտական և վերլուծական հասարակական կազմակերպության կազմակերպած «Հայ-ռուսական ռազմավարական դաշինքի արդիական հարցերը` մեր ժամանակի սպառնալիքների և մարտահրավերների հանդեպ» թեմայով կլոր սեղանի ժամանակ: Հայ-ռուսական հարաբերությունները, դեսպանի գնահատմամբ, բարձր մակարդակի վրա են եղել անգամ անցյալ տարվա ընթացքում, երբ հայտնի պատճառներով շփումները բավական սահմանափակ էին. «Հայ-ռուսական երկխոսությունը որևէ վայրկյան չի դադարել»:

Հայ-ռուսական հարաբերությունների համար դեսպան Կոպիրկինն անկյունաքարային է համարում 44-օրյա պատերազմի շրջանը, որը նա ողբերգական է համարում և Հայաստանի, և Ռուսաստանի համար. «Եվ այդ բարդ շրջանում ՌԴ-նն ու Հայաստանը միևնույն է`միասին էին: Իսկ բարձր մակարդակի համագործակցության արդյունքում հաջողվեց Արցախում կանգնեցնել պատերազմը և շարունակել համատեղ աշխատանքը` տարածաշրջանում անվտանգության մակարդակի բարձրացման ուղղությամբ»: Դեսպանի գնահատմամբ, պատերազմն ի ցույց դրեց հայ-ռուսական հարաբերությունների կարևորությունը, այդ հարաբերություններում փոխվստահության անհրաժեշտությունը, ինչպես նաև անվտանգության գործոնի կարևորությունը:

Սերգեյ Կոպիրկինի գնահատմամբ, այժմ էլ բավական ինտենսիվ աշխատանք է գնում հայ-ռուսական հարաբերությունները`նոր որակով և նոր հարթություն բարձրացնելու ուղղությամբ, միաժամանակ, ՌԴ-ն մեծ ջանքեր է գործադրում Արցախում`խաղաղապահ առաքելության առումով: Պատերազմը և հետպատերազմյան իրողություններն, ըստ նրա, առավել ընդգծեցին հայ-ռուսական հարաբերությունների ամրապնդման անհրաժեշտությունը:

Դեսպանն այդ անհրաժեշտությունը տեսնում է նաև հասարակական կառույցների մակարդակում:

Ռուսաստանի դեսպանը՝ հայ-ռուսական հարաբերությունները`նոր որակով և նոր հարթություն բարձրացնելու մասին է բարձրաձայնում անմիջապես այն բանից հետո, երբ Հայաստանում թեժ քննարկվում է արտահերթ ընտրություններ անցկացնելու թեման:
Սա մի կողմից նշանակում է, որ պաշտոնապես Ռուսաստանին ձեռնտու է կայուն Հայաստան, մյուս կողմից, իհարկե, չի բացառվում, որ Մոսկվան իր թեկնածու վերաբերյալ այլ «մեսիջներ» էլ հղի հայ հասարակությանը՝ առաջիկա երեք ամիսներին:

Մետաքսյա Շալունց