«Պռոստը անթույլատրելի ա». վարչապետ

«Ուսումնասիրելով «Զվարթնոց» օդանավակայանում տաքսի ծառայությունների մատուցման ներկայիս իրավիճակը՝ արձանագրում ենք, որ տաքսի ծառայությունների որակն ակնհայտորեն չի համապատասխանում անհրաժեշտ ստանդարտներին:Իրավիճակը խիստ մտահոգիչ է», - կառավարության յասօրվա նիստում վարչապետ Կարեն Կարապետյանն անդրադարձավ այս խնդրին: Կարեն Կարապետյանը ՀՀ տրանսպորտի, կապի և տեղեկատվական տեխնոլոգիաների նախարարին հանձնարարեց մեկշաբաթյա ժամկետում իրականացնել «Զվարթնոց» օդանավակայանում տաքսի ծառայություններ մատուցողների հետ պրոֆիլակտիկ աշխատանքներ։ «Քննարկել Երևան-«Զվարթնոց» երթուղիների արդիականացման հնարավորությունը», - նշեց վարչապետը։   «Մեկշաբաթյա ժամկետում իրականացնել պրոֆիլակտիկ աշխատանքներ փաստացի առանց լիցենզիայի գործող տաքսիների վարորդների կողմից թույլ տրվող իրավախախտումների բացահայտման, կանխարգելման ու պատասխանատվության միջոցներ կիրառելու ուղղությամբ։Պրոբլեմը բոլորս շատ լավ գիտենք, անթրաշ, չստիկով , սիգարետը բերանին, Երևանյան լիճը Սևանա լճի տեղը Մալաթիա-Սեբաստիայով բերել, տարիֆների տարբեր կիրառում և այլն, լիցենզիա տրամադրելու ժամանակ մենք պահանջո՞ւմ ենք վարորդի տեսքը ինչպիսին պետք է լինի, ուղևորի հետ ոնց պիտի իրան պահի, պարոն Գասպարյան, ձեզանից ակնկալում ենք շատ կոշտ, պռոստը անթույլատրելի ա, 20-30 հազարով Մալաթիա-Սեբաստիայով պտտվելով բերում են Երևանյան լիճ՝ որպես Սևան», - շեշտեց Կարեն Կարապետյանը։ «Այդ խնդիրները տարիներ շարունակ բարձրացնում են։Բավականին աշխատանք ունենք արած, մենք չենք կարողանում հասնել նրան, որ նախկինում կասկածելի անցյալ ունեցող, ծանր հանցագործություններով դատված անձինք, միևնույն է, ստանում են լիցենզիա, հարցը լուրջ անհանգստություն է մեզ պատճառում», -ասաց ՀՀ ոստիկանապետը։