Որ դեպքում պետական բյուջեի եկամուտները կավելանան

Այսօր Ազգային ժողովի արտահերթ նիստում «Պետական գույքի մասնավորեցման 2017-2020 թվականների ծրագրի մասին օրենքի նախագծի քննարկման ժամանակ ՀՀ կառավարությանն առընթեր պետական գույքի կառավարման վարչության պետ Արման Սահակյանը հայտարարեց, որ մասնավոր ընկերություններում ավելի որակյալ ծառայություններ են մատուցում, քան պետական: Ըստ նրա՝ մասնավորեցման ծրագրի իրագործման դեպքում պետական բյուջեի եկամուտները կավելանան: «Պետական գույքի մասնավորեցման մասին օրենքի 4-րդ հոդվածի համաձայն՝ նախորդ ծրագրի ցանկում ընդգրկված, սակայն չմասնավորեցված ընկերություններն ու օբյեկտները նոր ծրագրի մասն են՝ վերջինիս ուժի մեջ մտնելու պահից»,- ասաց նա։ Նա նշեց, որ մասնավորեցվող նոր ընկերությունները ծրագրում ընդգրկելու համար հիմք են հանդիսացել մի շարք գերչատեսչությունների կողմից ներկայացված առաջարկություններն ու հիմնավորումները. «Ծրագրում ընդգրկվել են 11 հանրապետական և գործադիր մարմինների, մարզպետարանների ենթակայության տակ գտնվող թվով 24 ընկերություններ»։ Մասնավորեցման առաջարկվում են հետևյալ ընկերությունները՝ Ֆանարջյանի անվան ուռուցքաբանության ազգային կենտրոնը, Վնասվածքաբանության և օրթոպեդիայի գիտական կենտրոնը, Ճառագայթային բժշկության և այրվածքների գիտական կենտրոնը, Մաշկաբանության և սեռավարակաբանական բժշկագիտական կենտրոնը, «Օշական» մանկական վերականգնողական կենտրոնը, «Դիլիջան» մանկական հակատուբերկուլյոզային առողջարանը, Երևանի երկաթուղու պոլիկլինիկան, «Նևրոզների կլինիկան» և այլն: