Թուրքերը մեր ատոմակայանը ուզում են փակվի, բայց իրենցը՝ ռուսները կկառուցեն

Ռուսաստանի և Թուրքիայի նախագահներ Վլադիմիր Պուտինը և Ռեջեփ Էրդողանը հեռուստակամրջի միջոցով այսօր մասնակցելու են «Ակկույու» ատոմակայանի երրորդ բլոկի շինարարության մեկնարկի արարողությանը։

«Ակկույու»-ն ատոմակայան է, որը «Ռոսատոմ» -ը կառուցում է Թուրքիայի Մերսին նահանգում՝ Միջերկրական ծովի ափին։ Ատոմակայանը պետք է ունենա չորս էներգաբլոկ։ Մոսկվան և Անկարան ատոմակայանի կառուցման մասին համաձայնագիրը ստորագրել էին 2010 թվականին։ Պուտինը հույս է հայտնել, որ նախագիծը կավարտվի 2023 թվականին, երբ Թուրքիան նշելու է հանրապետության 100-ամյա հոբելյանը։
«Ակկույու» -ն պետք է դառնա Թուրքիայի առաջին ատոմակայանը և ապահովի երկրի էլեկտրաէներգիայի պահանջարկի մինչև 10 տոկոսը։ Նախագծի արժեքը, «Ռոսատոմ» -ի գնահատականներով, կկազմի մոտ 22 միլիարդ դոլար։ Սա գրեթե ամբողջովին ռուսական նախագիծ է։

Երեկ երեկոյան պաշտոնական Մոսկվան հայտարարեց, որ բավարարված է Թուրքիայում Ռուսաստանի դեսպան Անդրեյ Կարլովի սպանության գործով դատավճիռ կայացնելու փաստով։

Ռուսաստանի արտգործնախարարության հայտարարությունում մասնավորապես ասված է․ - «Գոհունակություն է առաջացնում, որ Թուրքիայի իրավապահ և դատական համակարգերը վերջապես որոշում են կայացրել 2016 թվականի դեկտեմբերի 19-ին Թուրքիայում Ռուսաստանի դեսպան Կարլովի սպանության գործով» ։

Հայտարարությունում, այդուամենայնիվ, նշված է նաև, որ այդ սպանությունը ծանր հետք է թողել ռուս-թուրքական հարաբերությունների պատմության մեջ։
Անկարայի առանձնապես ծանր հանցագործությունների գործերով դատարանը երեկ դեսպան Կարլովի սպանության գործով հինգ մեղադրյալների դատապարտել է ցմահ ազատազրկման։ Կարլովը սպանվել է Անկարայի Արդիական արվեստի թանգարանում ելույթի պահին։ Թուրք ոստիկանները տեղում սպանել են դեսպանի վրա կրակ արձակած նախկին ոստիկան Մևլութ Ալթինթաշին։

Այսպես, Ռուսաստանը Թուրքիայում, այնուամենայնիվ, ատոմակայան է կառուցում:
Դեռ 2020 թ․ հոկտեմբերի 26-ին «Փրայմը» լուր էր տարածել, թե Ռուսական «Ինտեր ՌԱՕ»-ն դուրս է գալիս թուրքական «Ակկույու» ԱԷԿ նախագծային ընկերությունից: Սակայն ժամանակը ցույց տվեց, որ Ռուսաստանը Թուրքիայում, այնուամենայնիվ, ատոմակայան կկառուցի։

Օրերս «Ռոսիա» հեռուստաալիքը հայտնել է, որ Ռուսաստանի նախագահ Պուտինն ու Թուրքիայի նախագահ Էրդողանը կտան «Աքքույու» ԱԷԿ-ի կառուցման հիմնական փուլի մեկնարկը: Այսպիսով, թուրքական Մերսին նահանգում, Միջերկրական ծովի ափին, 4 էներգաբլոկներով և 1200 ՄՎտ հզորությամբ ատոմակայանի շահագործումը նախատեսվում է մինչև 2023 թ.։

Հետաքրքիր է, թուրք-ադրբեջանական տանդեմը ամեն առիթով միջազգային հարթակներում բարձրացնում է հայկական ատոմակայանի խնդիրը. Մերը ցանկանում են փակել, հայկական ատոմակայանի փակման հարցով անհեթեթություններ են տարածում: Իսկ միևնույն ժամանակ Թուրքիան իր ատոմակայանն է կառուցում՝ այն էլ ռուսների միջոցով:

Ի դեպ, այսօր Դոհայում հանդիպելու են Ռուսաստանի և Թուրքիայի արտգործնախարարները։ Հանդիպման օրակարգից առայժմ մանրամասներ չկան։ Կարելի է, սակայն, ակնկալել, որ կողմերը կանդրադառնան նաև ղարաբաղյան հարցին և նոյեմբերի լույս 10-ի գիշերը ստորագրված եռակողմ համաձայնագրի հետ կապված հարցերին, մասնավորապես, ինչպես ադրբեջանական և թուրքական կողմերն են ասում՝ Նախիջևանի «միջանցքին» և տարածաշրջանային նախագծերին։

Մետաքսյա Շալունց