Բայդենին սպասելու «օգուտը». քո կապիտուլյացիան, քո խնդիրն է

Մարտ 6-ին Նիկոլ Փաշինյանը հեռախոսազրույց է ունեցել ԱՄՆ պետքարտուղար Էնթոնի Բլինքենի հետ: Ըստ կառավարության լրատվական ծառայության տարածած մամլո հաղորդագրության՝ Նիկոլ Փաշինյանը նախ շնորհավորել է Բլինքենին այդ բարձր պաշտոնում նշանակվելու կապակցությամբ: Խոսելով երկկողմ հարաբերությունների մասին՝ Փաշինյանը բարձր է գնահատել ԱՄՆ կողմից Հայաստանին տրամադրվող մշտական աջակցությունը և ԵԱՀԿ Մինսկի խմբում ԱՄՆ ունեցած դերակատարումը:
Կողմերն անդրադարձել են պատերազմից հետո տարածաշրջանում տիրող իրավիճակին: Ընդգծվել է ԵԱՀԿ Մինսկի խմբի համանախագահության շրջանակում խաղաղ գործընթացի վերսկսման անհրաժեշտությունը:

Զրուցակցի ուշադրությունը հատկապես հրավիրվել է Ադրբեջանի կողմից գերիների, պատանդների և այլ պահվող անձանց անհապաղ վերադարձի անհրաժեշտության վրա: Տվյալ համատեքստում ամերիկյան կողմը շեշտել է Մինսկի խմբի համանախագահության գործունեության կարևորությունը և պատրաստակամություն հայտնել շարունակել իր դերակատարումը հակամարտության կարգավորման ուղղությամբ:

Ըստ հաղորդագրության` ԱՄՆ պետքարտուղարն ընդգծել է Հայաստանի հետ գործընկերային հարաբերությունների զարգացման կարևորությունը: Նա բարձր է գնահատել ժողովրդավարության ասպարեզում Հայաստանի արձանագրած ձեռքբերումները և վստահեցրել, որ ԱՄՆ շարունակելու է բարեփոխումների համար Հայաստանին տրամադրվող օժանդակությունը: Կարևորվել է համագործակցությունը Հայաստանում օրենքի գերակայության ամրապնդման, կոռուպցիայի դեմ պայքարի, արդարադատության համակարգի և ոստիկանության բարեփոխումների ուղղությամբ:

Միացյալ Նահանգների Պետդեպարտամենտի մամուլի խոսնակի գրասենյակի հաղորդագրության համաձայն, որ հրապարակել է Հայաստանում ԱՄՆ դեսպանությունը, պետքարտուղար Բլինքենը և վարչապետ Փաշինյանը երկուստեք ընդգծել են հայ-ամերիկյան երկկողմ հարաբերությունների կարևորությունը։ «Պետքարտուղարը շեշտեց իրավունքի գերակայության ու ժողովրդավարական հաստատությունների նկատմամբ հարգանքի կարևորությունը և մեր շարունակական աջակցությունը հայտնեց Հայաստանում ժողովրդավարական գործընթացների ու հաստատությունների զարգացման հարցում», - ասված է հաղորդագրությունում: «Պետքարտուղարը ողջունեց ջանքերն ուղղված Լեռնային Ղարաբաղի հակամարտության տևական քաղաքական կարգավորման հասնելուն, ինչը շահեկան կլինի տարածաշրջանի բնակչության համար», - հաղորդում է Միացյալ Նահանգների արտաքին քաղաքական գերատեսչության խոսնակ Նեդ Փրայսի գրասենյակը:

Նախ, ուրեմն, Փաշինյան աշխատակազմի տարածած հաղորդագրությունից տեղեկանում ենք, թե կարևորում է ԵԱՀԿ Մինսկի խմբի գործունեությունը, ասել կուզի՝ Փաշինյանը ամերիկյան կողմի հետ քննարկմանը կարևորում է բանակցությունների շարունակությունը, սակայն ԱՄՆ պետքարտուղարի խոսքից հասկացվում է, որ Վաշինգտոնը բավարարված է Լեռնային Ղարաբաղի հակամարտության տևական քաղաքական կարգավորման հասնելուն ուղղված ներկա իրավիճակով:

Վաշինգտոնը համարում է, որ ստեղծված իրավիճակն էլ շահեկան կլինի տարածաշրջանի բնակչության համար, այսինքն՝ թուրք-ադրբեջանական դաշինքի պարտադրած պատերազմի արդյունքում ստեղծված վիճակը, ասել է թե՝ հայկական կողմի կապիտուլյացիան բոլորին ձեռնտու է:

Սա էլ Բայդենին սպասելու «օգուտը»... Փաշինյանի իշխանության ներկայացուցիչները խորաթափանց «մեսիջներ» էին ուղարկում քաղաքական դաշտի տարբեր թևերին, դեռ պատերազմի օրերին, թե՝ «հեսա, սպասեք, Բայդենը գալիս ա, հեսա կտեսնեք ոնց ա մորթելու թուրքերին ու ադրբեջանցիներին...»:

Եկավ, Բայդենը, և ինաուգուրացիայից երկու ամիս անց ամերիկյան պետքարտուղարը Փաշինյանին ասում է՝ «մեզ համար «OK» է ստեղծված վիճակը...», «դե, հակամարտության տևական քաղաքական կարգավորման համար դեմ չենք բանակցելուն»:

Գումարած դրան ԱՄՆ պետքարտուղարը հարկ է համարում զգուշացնել Փաշինյանին՝ շեշտում է իրավունքի գերակայության ու ժողովրդավարական հաստատությունների նկատմամբ հարգանքի կարևորությունը: Այսինքն՝ այլ կրեպ ասած ամերիկացիները Փաշինյանին ասում են. «Տեսնում ենք, թե ինչ խաղեր ես տալիս, չափերդ շատ չանցնես...»:

Մետաքսյա Շալունց