Մեր նախընտրական խաղերն ու թուրք-ադրբեջանական 6 շաբաթանոց 2-րդ զորավարժությունները

Ադրբեջանի և Թուրքիայի զինծառայողները զորավարժություններ կանցկացնեն թուրքական Սպարտա (Ըսպարտա) քաղաքում: Այս մասին Twitter- ի իր էջում հայտնել է Թուրքիայի ազգային պաշտպանության նախարարությունը:

«Մենք շարունակում ենք մեր համագործակցությունը Ադրբեջանի հետ` «Մեկ ազգ` երկու պետություն» սկզբունքով: Օդանավակայանում հանդիպեցինք ադրբեջանական հերոսական բանակի զինծառայողներին, որոնք Ըսպարտա էին ժամանել զորավարժությունների համար, որոնք կտևեն վեց շաբաթ»,- ասվում է Թուրքիայի նախարարության հայտարարության մեջ:

Արցախում պատերազմի ավարտից չորս ամիս անց արդեն երկրորդ համատեղ զորավարժություններն են անցկացնում Ադրբեջանն ու Թուրքիան: Նրանք իրենց «հաղթանակած» կողմ են հայտարարում, ադրբեջանցի ու թուրք յուրաքանչյուր պաշտոնյան որքան ելույթ է ունենում՝ այդքան ժամանակ դրա մասին է շարունակ կրկնում:

Հարց է ծագում՝ եթե պատերազմն ավարտվել է, Թուրքիան ու Ադրբեջանն էլ համարում են, որ պատերազմն ավարտվել է, իրենք՝ ռազմական գործողություններով լուծեցին Ղարաբաղի հարցը, ու հիմա էլ իբր պատրաստվում են խաղաղության ու տարածաշրջանային տարբեր ծրագրերի, էլ ի՞նչ զորավարժություններ... Ի՞նչ նպատակով են զորավարժություններն անցկացնում, հիմա ո՞ւմ դեմ են պատերազմի պատրաստվում:
Ընդ որում, ուշադրություն է պետք դարձնել, թե որքան են տևելու զորավարժությունները: Նախորդ անգամվա «ձմեռային» զորավարժությունները գրեթե երկու շաբաթ տևեցին: Իսկ այս անգամ՝ 6-շաբաթյա զորավարժություններ են անցկացվելու: Նախատեսված է երկու երկրների հետախուզադիվերսիոն զորքերի մասնակցությունը։

Եվ ինչպես նշում են Թուրքիայի պաշտպանության նախարարությունից՝ այս զորավարժությունները ևս անց են կացվում՝ «Մեկ ազգ, երկու պետության» սկզբունքի շրջանակներում։

Իսկ ի՞նչ է կատարվում Հայաստանում...

Հայաստանի քաղաքական ուժերը Փաշինյանի իշխանության պայմաններում՝ պատրաստվում են արդեն ընտրությունների: Նրանք ելույթներն արդեն վաղուց նախընտրական են դարձել: Ո՛չ իշխանությունն է պատկերացնում պահի լրջությունը, ոչ քաղաքական ուժերը: Բոլորը լուծում են քաղաքական ասպարեզում մնալու իրենց խնդիրը:

Հայաստանի գլխին կախված կոնկրետ վտանգի մասին որևէ մեկը չի մտածում՝ այն էլ պատերազմի պարտության պայմաններում, երբ հարկավոր էր արագ ինքնակազմակերպվել՝ Հայաստանի սահմանների ամրացման ու բանակի հզորացման ուղղությամբ:

Մետաքսյա Շալունց